ކުޅުދުއްފުށީ ޕޯރޓްގެ 16 ވަނަ އަހަރީ ދުވަހާ ގުޅުވައިގެން ހިންގާ ހަރަކާތްތަކުގެ ތެރެއިން އަފީފުއްދީން ސްކޫލަށް 3 ސްމާރޓް ޓީވީ ހަދިޔާކޮށްފިއެވެ.

މިކަމަށްޓަކައި އަފީފުއްދީން ސްކޫލްގައި ބޭއްވި ކުޑަ ރަސްމިއްޔާތެއްގައި ޓީވީތައް ހަވާލުކޮށްދެއްވީ އެމްޕީއެލްގެ ސީއީއޯ ޝާހިދު އަލީއެވެ. އަފީފުއްދީން ސްކޫލްގެ ފަރާތުން ޓީވީތަކާއި ހަވާލުވެލެއްވީ ސްކޫލްގެ ޕްރިންސިޕަލް ނާސިހާ އިދުރީސެވެ. އެމްޕީއެލްއިން މައުލޫމާތު ދެއްވިގޮތުގައި ކުޅުދުއްފުށީ ޕޯރޓްގެ 16 ވަނަ އަހަރީ ދުވަސް ފާހަގަ ކުރުމުގެ ގޮތުން އަފީފުއްދީން ސްކޫލަށް ހަދިޔާކުރީ 55 އިންޗީގެ 3 ސްމާރޓް ޓީވީއެވެ.

އަހަރީ ދުވަހާއި ގުޅުވައިގެން ޓީވީ ހަދިޔާ ކުރުމަކީ ސްކޫލަށް ލިބުނު ވަރަށް ބޮޑު އެހީތެރިކަމެއް ކަން ފާހަގަކޮށް އަފީފުއްދީން ސްކޫލްގެ ފަރާތުން އެމްޕީއެލް އަށް ވަރަށް ބޮޑަށް ޝުކުރު އަދާކުރެއެވެ.

ކުޅުދުއްފުށީ ޕޯރޓްގެ އަހަރީ ދުވަހުގެ ހަރަކާތްތަކުގެ ތެރޭން ހުކުރު ދުވަހު ހަވީރު ކުދަކުދިންގެ ހަވީރެއްވެސް ވަނީ ބާއްވާފައެވެ. މި ހަވީރުގައި ގިނައަދަދެއްގެ ބަޔަކު ވަނީ ބައިވެރިވެ ބޮޑުތަރުހީބެއް ލިބިފައެވެ.

އަދި ހޮނިހިރު ދުވަހުގެރޭ އަހަރީ ދުވަހު ރަސްމީ ޖަލްސާ ބޭއްވުމަށް ހަމަޖެހިފައިވާކަމަށް އެމްޕީއެލްއިން ބުނެއެވެ.