ނުކުޅެދުންތެރިކަން ހުންނަ ކުދިންނަށް ޚާއްސަކޮށް ހުޅުވި ލިފްޓު ޔާމީނަށް ވީ ޖޯކަކަށް!
ރައީސް ޔާމީނު ޖޯކު ޖެއްސެވުމުގެ ސަބަބުން ގިނަ ބަޔަކު ދަނީ އެކަމަށް ފާޑު ކިޔަމުން
ނުކުޅެދުންތެރިކަން ހުންނަ ކުދިންނަށް ހާއްސަކޮށްގެން ކަލާފާނު ސްކޫލުގައި ބެހެއްޓި ލިފްޓު ހުޅުވުމުގެ ރަސްމިއްޔާތުގެ ތެރެއިން
ނުކުޅެދުންތެރިކަން ހުންނަ ކުދިންނަށް ޚާއްސަކޮށްގެން މި ސަރުކާރުން ކަލާފާނު ސްކޫލުގައި ލިފްޓެއް ބަހައްޓާފައިވާއިރު، އެކަމަށް ކުރީގެ ރައީސް އަބްދުﷲ ޔާމީނު ފާޑުވިދާޅުވެއްޖެއެވެ.
ނުކުޅެދުންތެރިކަން ހުންނަ ކުދިންނަށް ކަލާފާނު ސްކޫލުގައި ބެހެއްޓި ލިފްޓަކީ އެޑިއުކޭޝަން މިނިސްޓްރީގެ ބަޖެޓުން ޚަރަދު ކޮށްގެން ބަހައްޓާފައިވާ ލިފްޓެކެވެ. ލިފްޓު ބޭނުންކުރުން ރަސްމީކޮށް ފައްޓަވައިދެއްވީ ނާއިބުރައީސް ފައިސަލް ނަސީމާއި އެޑިއުކޭޝަން މިނިސްޓަރު ޑރ. އާއިޝަތު އަލީ އެވެ.
އެހެންނަމަވެސް، ރައީސް ޔާމީނު ވަނީ އެކަމަށް ޖޯކު ޖައްސަވާ މޭރުމަކުން ވާހަކަ ދައްކަވާފައެވެ. ހުކުރު ދުވަހުގެރޭ އިދިކޮޅު ކޯލިޝަނުން ބޭއްވި ޖަލްސާގައި ވާހަކަ ރައީސް ޔާމީނު ވިދާޅުވީ، މި ސަރުކާރުން މުޅިންވެސް ފެންނަނީ "ރިބަން ފަށް" ކަނޑާ މަންޒަރު ކަމަށެވެ.
އެގޮތުން މިއަދުގެ ނާއިބުރައީސް ކުރައްވަނީ ކޮން މަސައްކަތެއްތޯ ސުވާލު ކުރައްވައި ރައީސް ޔާމީނު ވަނީ "ނުހަނު ބުރަކޮށް އުޅުއްވައި ލިފްޓެއް ހުޅުވައިދެއްވާފައިވާ" ކަމަށް ސަމާސާ ރާގެއްގައި ވިދާޅުވެފައެވެ. އަދި ކުދިންނަށް ރާއްޖޭގެ ތައުލީމީ ސިޔާސަތު ވިސްނައިދިނުމަށް ޕްރައިމަރީ ސުކޫލުތަކަށް ވަޑައިގަންނަވާ ވަޑައިގެންނެވުމަށްވެސް ރައީސް ޔާމީނު ވަނީ ޖޯކު ޖައްސަވާފައެވެ.
ކަލާފާނު ސުކޫލުގެ ލައިބްރަރީ އާއި މިއުޒިކް ރޫމާއި ކޮމްޕިއުޓާ ލެބް ފަދަ އިތުރު ވަސީލަތްތައް ގާއިމްވެފައިހުރި ރޫމްތައް ހުންނަނީ މަތީ ފަންގިފިލާތަކުގައެވެ. އެހެންވުމުގެ ސަބަބުން ނުކުޅެދުންތެރިކަން ހުންނަ ކުދިންނަށް އެކަމުގައި ބޮޑެތި ގޮންޖެހުންތަކެއް ދިމާވެއެވެ. ވަކިން ޚާއްސަކޮށް މުޅި ތައުލީމީ ނިޒާމުގައި އެފަދަ ކުދިންވެސް ބައިވެރިކޮށްގެން ސުކޫލުތަކުގައި ހަރަކާތްތައް ހިންގުމަށް ވަނީ މަގުފަހިވެގެން ގޮސްފައެވެ.
އަދި މިއީ ޚާއްސަ އެހީއަށް ބޭނުންވާ ކުދިންނަށް ވެސް އެހެން ކުދިން ފަދައިން އުޅުމުގެ ފުރުސަތު ދިނުމަށް އެޅުނު މުހިއްމު ފިޔަވަޅެއްގެ ގޮތުގައި ގިނަ ބަޔަކު ސިފަ ކުރެއެވެ.
ވުމާއެކު، އެކަމަށް ރައީސް ޔާމީނު ޖޯކު ޖެއްސެވުމުގެ ސަބަބުން ގިނަ ބަޔަކު ދަނީ އެކަމަށް ފާޑު ކިޔަމުންނެވެ.
