ރައީސްކަން ކުރުމަކީ މިހާ އަނިޔާވެރިވާން ޖެހޭ ކަމެއްކަމަށް ހިއެއް ނުކުރަން: ޔާމީން

ރައީސްކަން ކުރެއްވުމަކީ މިހާ އަނިޔާވެރިވާން ޖެހޭ ކަމެއްކަމަށް ހީފުޅު ނުކުރައްވާކަމަށް ކުރީގެ ރައީސް އަބްދުﷲ ޔާމީނު ވިދާޅުވެއްޖެއެވެ.

ހުކުރު ދުވަހުގެ ރޭ އިދިކޮޅު ކޯލިޝަނުން ބޭއްވި ޖަލްސާގައި ވާހަކަ ދައްކަވަމުން ރައީސް ޔާމީނު ވިދާޅުވީ، 2013 ގައި ވެރިކަމަށް ކުރިމަތިލެއްވިއިރު، ކުރިއަށް ވަޑައިގަތުމުގެ ރޫހާއި އަޒުމު ހުރި ކަމަށެވެ. ނަމަވެސް ވެރިކަން ކުރެއްވުމަކީ މިހާ އަނިޔާވެރިވާން ޖެހޭ ކަމެއްކަމަށް ހީފުޅު ނުކުރައްވާކަން ފާހަގަ ކުރައްވައި ރައީސް ޔާމީނު ވިދާޅުވީ، އެމަނިކުފާނަކީވެސް ހަމަ އިންސާނެއް ކަމަށެވެ. ވީއިރު އޭރު ހުރި ޝައުގުވެރިކަން ދަމައްޓަވަން ކުރާނީ ކިހާ މަސައްކަތެއްތޯ އެމަނިކުފާނު ވަނީ ސުވާލު ކުރައްވާފައެވެ.

Advertisement

އަނބިކަނބަލުންނާއި ދަރިކަލުން ތަހައްމަލު ކުރެއްވި ހިތްދަތިކަމަށް އަލިއަޅުވާލައްވާ ރައީސް ޔާމީނު ވަނީ އަނެއްކާވެސް ގައުމީ ޒިންމާއަށް ނުކުމެވަޑައިގަންނަވަން އެމަނިކުފާނުގެ އާއިލާ ތައްޔާރުތޯވެސް ސުވާލު ކުރައްވާފައެވެ. ނަމަވެސް ރައްޔިތުންގެ އެދުމަކީ އެމަނިކުފާނު ގައުމުގެ ޒިންމާއާ ޙަވާލުވުންކަން އެނގިވަޑައިގަންނަވާކަމަށް ރައީސް ޔާމީނު ވިދާޅުވިއެވެ. އެގޮތުން ދިވެހިރާއްޖެ އަނެއްކާވެސް ސަލާމަތް ކުރަން ނުކުންނަވަން ތިއްބެވީވެސް އެމަނިކުފާނުމެންކަަމަށް ރައީސް ޔާމީނު ވިދާޅުވިއެވެ.

ރައީސް ޔާމީނު ވަނީ ރައްޔިތުން ކުރާ އިތުބާރާއި ރައީސް ޔާމީނާ ޙަވާލު ކުރައްވާ މަސްއޫލިއްޔަތަކީ ވަރުގަދަ އަމާނާތެއްކަން އެނގިވަޑައިގަންނަވާ ކަމަށް ވިދާޅުވެފައެވެ.

އެމަނިކުފާނުގެ ވާހަކަފުޅު ނިންމަވާލެއްވީ މާނަފުން ޅެންބައިތަކުންނެވެ.

ޖަލު ހުކުމުން މިނިވަންވެވަޑައިގެން ދެއްކެވި ވާހަކަފުޅުގައި ރައީސްކަން ކުރެއްވުމަކީ މިހާ އަނިޔާވެރިވާން ޖެހޭ ކަމެއްކަމަށް ހީފުޅު ނުކުރައްވާކަމަށް ރައީސް ޔާމީނު ވިދާޅުވެފައިވާއިރު، އެމަނިކުފާނުގެ ވެރިކަމުގައި ސިޔާސީ އިދިކޮޅު ހުރިހާ ލީޑަރުން ތިއްބެވީ ޖަލުގައެވެ. ޕާޓީތަކުގެ ލީޑަރުން ޖަލުގައި ތިއްބަވަން ޖެހެނީ ކުށެއް ކުރައްވައިގެން ނޫން ކަމަށާއި އެބޭފުޅުން ޖަލުގައި ތިއްބަވަން ޖެހެނީ ރައީސް އަބްދުﷲ ޔާމީނަން ބިރަކަށް ވުމުން ކަމަށް އޭރުވެސް އިދިކޮޅު ސިޔާސީ ފަރާތްތަކުން ގެންދިޔައީ ބުނަމުންނެވެ.

އޭރު އިދިކޮޅު ސިޔާސީ ލީޑަރުން ހައްޔަރު ކުރުމާއި، އިދިކޮޅު ސިޔާސީ ފަރާތްތަކަށް ބިރު ދެއްކުން ހުއްޓާލުމަށް ޔޫރަޕިއަން ޔޫނިއަނުން ދިވެހި ސަރުކާރަށްވެސް ގޮވާލާފައިވެއެވެ. ޔޫރަޕިއަން ޔޫނިއަނާއި، ކެނެޑާ, ނޯވޭ، ސްވިޒަލޭންޑްގެ އިތުރުން އެމެރިކާ ގުޅިގެން ނެރުނު ބަޔާނެއްގައި ވަނީ، އެއްވެ އުޅުމުގެ މިނިވަންކަމާއި، ޚިޔާލުފާޅުކުރުމުގެ މިނިވަންކަމަށް އިހުތިރާމް ކުރުމުގެ މިނިވަންކަން އޮންނަންޖެހޭކަން ފާހަގަކޮށް، ޖަލަށް ލުމުގެ ބިރެއް ނެތި އިދިކޮޅު ސިޔާސި ފަރާތްތަކުން ރާވާ ހަރަކާތްތައް ހިންގުމުގެ ފުރުސަތު ދޭންޖެހޭކަމަށް ބަޔާންކޮށްފައެވެ.

ރައީސް ޔާމީނުގެ ވެރިކަމުގައި ޖޭޕީގެ ރައީސް ގާސިމް އިބްރާހިމާއި، ގާސިމްގެ ދަރިކަލުންނާއި، އެމްޑީޕީގެ ރައީސް މުހައްމަދު ނަޝީދާއި، އަދާލާތު ޕާޓީގެ ރައީސް ޝެއިޚް އިމްރާން އަބްދުﷲ ވަނީ ޖަލަށް ލާފައެވެ. އެބޭފުޅުންގެ އިތުރުން ކުރީގެ ޑިފެންސް މިނިސްޓަރު މުހައްމަދު ނާޒިމާއި، ގެލޮޅު ދެކުނު ދާއިރާގެ މެންބަރު އަހުމަދު މަހުލޫފާއި، ކުރީގެ ނާއިބު ރައީސް އަހުމަދު އަދީބުވެސް ޖަލަށް ލާފައިވެއެވެ.