އައްޑޫ ސިޓީގައި އިމާރާތްކުރާ ފުލުހުންގެ ނެޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްޓްމަންޓު އަންނަ އަހަރުގެ މާރޗް މަހު ރަސްމީކޮށް ހުޅުވާނެ ކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ.
ޑިސެމްބަރ 1 ވަނަ ދުވަހު ފުލުހުންގެ ނެޝަނަލް ކޮލެޖަށް ކުރެއްވި ޒިޔާރަތުގައި އެތަނުގެ މަސައްކަތް ކުރިއަށްދާގޮތް ބައްލަވައިލެއްވުމަށްފަހު ކޮމިޝަނަރ އޮފް ޕޮލިސް ވިދާޅުވީ މަސައްކަތް ގޮސްފައިވާ މިންވަރަށް ބަލާއިރު އަމާޒަކީ ވީހާވެސް އަވަހަކަށް ތަން ހުޅުވުންކަމަށާއި ކުރިއަށް ދޮޅުމަހެއްހާ ދުވަސް ތެރޭގައި އޮޕަރޭޝަނަށް ގެނެވޭނެ ކަމަށެވެ. އެގޮތުން މުޅި ތަން ނިންމަައި އޮޕަރޭޝަނަށް ގެނައުމުގެ ބަދަލުގައި ތަނުގެ މަސައްކަތްތައް ނިމެމުންދާ ވަރަކަށް ހުރި ވަސީލަތްތަކާ އެކު އޮޕަރޭޝަނަށް ގެނައުމަށް ނިންމާފައިވާ ކަަމަށެވެ.
ފުލުހުންނަށް ބޭނުންވާ ތަމްރީނާއި ތައުލީމު ދިނުމަށް ޒަމާނީ ވަސީލަތްތަކާއެކު އިމާރާތްކުރަމުންދާ ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓަކީ އިންޑިއާ ސަރުކާރުގެ ހިލޭ އެހީގެ ދަށުން އިމާރާތްކުރަމުންދާ ތަނެކެވެ.
އިންޑިއަން ހައިކޮމިޝަނަރ މުނު މަހާވަރާ އާއި ކޮމިޝަނަރ އޮފް ޕޮލިސް މުހައްމަދު ހަމީދު ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓްގެ މަސައްކަތްތައް ބައްލަވާލެއްވުމަށް ކުރެއްވި މި ޒިޔާރަތުގައި ފުލުހުންގެ ސީނިއަރ ބައެއް އޮފިސަރުން ބައިވެރިވެވަޑައިގެންނެވިއެވެ.
މި ކޮލެޖާއި ގުޅޭގޮތުން ހޯމް މިނިސްޓަރ އިމްރާން އަބްދުﷲ ވިދާޅުވީ އައްޑޫގައި ގާއިމުކުރެވެމުންދާ ނެޝަނަލް ކޮލެޖް އޮފް ޕޮލިސިންގ އެންޑް ލޯއެންފޯސްމަންޓަކީ ދިވެހި ފުލުހުންގެ ޚިދުމަތުގެ ގާނޫނުގައި ބުނާ ފަދަ ފުލުހުންގެ ޚިދުމަތެއް ރައްޔިތުންނަށް ފޯރުކޮށްދިނުމުގައި މުހިންމު ދައުރެއް އަދާކުރާނެ އަދި ތަމްރީންދޭ މަރުކަޒަކަށް ވެގެންދާނެ ކަމަށެވެ.
އައްޑޫގައި ގާއިމުކުރެވެމުންދާ ނެޝަނަލް ކޮލެޖް އޮފް ޕޮލީސިންގ އެންޑް ލޯއެންފޯސްމަންޓް ވެގެންދާނީ ގާނޫނު ތަންފީޒުކުރުމާއި ޖިނާއީ އަދުލުގެ ނިޒާމާއި އިޖުތިމާއީ އެހެނިހެން މުއައްސަސާތަކުގެ ބައިވެރިން ގުޅިގެން ތަމްރީނު ހިންގާ މަރުކަޒަކަށްކަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވެފައިވަނީ، ފުލުހުންގެ ޚިދުމަތަށް މީހުން އިތުރުކުރުމަކީ ދައުލަތަށް ބުރަ ކަމަކަށްވީނަމަވެސް ރައްޔިތުންގެ ހައްގުގައި ކުރުން އެއީ މުހިއްމު ކަމެއްކަމަށެވެ.
ފުލުހުންގެ ޚިދުމަތުގެ ގާނޫނާއެކު ފުލުހުންގެ ޚިދުމަތް ލާމަރުކަޒު ކުރެވިގެންދާއިރު، މިހާރަށްވުރެ ހުރިހާ ގޮތަކުންވެސް ރަނގަޅު ފެންވަރެއްގައި ރަށްރަށުގައި ފުލުހުންގެ ޚިދުމަތް ގާއިމްކުރުމަށް ފުލުހުންގެ އާ ގާނޫނުން ތަންދެއެވެ.
