ކ. މާލެ
|
4 ޑިސެންބަރ 2021 | ހޮނިހިރު 17:40
އދ. އާންމު މަޖިލީހުގެ ނަމޫނާ ބައްދަލުވުން
އދ. އާންމު މަޖިލީހުގެ ނަމޫނާ ބައްދަލުވުން
އަހުމަދިއްޔާ އިންޓަރނޭޝަނަލް ސްކޫލު
ޔޫއެން ނަމޫނާ ޖަލްސާ
ޔޫއެން ޖަލްސާ އަހުމަދިއްޔާ ހޯލުން، ވަރަށް ތަފާތު!
 
ކުރިއަށް އޮތް ތަނުގައިވެސް މިފަދަ ހަރަކާތްތައް ކުރިއަށްގެންދާނެ ކަމަށް ސްކޫލުން ބުނޭ
 
33 ގައުމަކުން ކަރުދާސް ހުށަހަޅާފައިވޭ
 
މި ބައްދަލުވުމުގައި ދަރިވަރުން ވަނީ 63 ގައުމު ތަމްސީލުކޮށްފައި

ދުނިޔޭގެ ފެންވަރުގައި މުހިންމު ނިންމުންތައް ނިންމާ އެއް ތަނަކަށް ވާނީ ހަމަ ގައިމުވެސް އދ. ގެ އާންމު މަޖިލީހެވެ. މިހާރު ކުރިއަށްދާ އދ.ގެ އާންމު މަޖިލީހުގެ 76 ވަނަ ސެޝަނުގެ ރައީސަކަށް ހުންނެވީ ރާއްޖޭގެ ޚާރިޖީ ވަޒީރު އަބްދުﷲ ޝާހިދެވެ. ދުނިޔޭގެ ބޮޑެތި ނިންމުންތައް ނިންމާ މަޖިލީހެއްގެ ރައީސަކަށް ރާއްޖޭގެ ވަޒީރަކު އިންތިޚާބުވުން ވެގެންދިޔައީ ދިވެހިންނަށް ދުނިޔޭގެ އެންމެ އުހަށް ދެވޭނެ ކަމުގެ އުންމީދު އައު ވެގެން ދިޔަ ކަމަކަށެވެ. ކުރިއަށްދާން މަސައްކަތްކޮށްފިނަމަ ކޮންމެ ހިސާބަކަށްވެސް ދެވިދާނެ ކަމުގެ އުންމީދު އާލާވިއެވެ.

އަދި މިކަން ނަމޫނާއެއްގެ ގޮތުގައި ބަލައިގެން އެހިސާބަށް ވާސިލްވުމަށް މަސައްކަތްކުރާނެ އެއް ބަޔަކަށް ވާނީ ހަމަ ގައިމުވެސް ބޮޑުވަމުން އަންނަ ކުދިންނެވެ. ހިތްވަރާއެކު މަސައްކަތްކުރާނަމަ ކާމިޔާބަށް ވާސިލްވާނެ ކަން މިއަދު މިއޮތީ ވަރަށް ސާފުކޮށް ފެންނާށެވެ. މިކަމުން ބޮޑުވަމުންދާ ޖީލަށް އައު ހިތްވަރެއް ލިބިފައިވާކަން އަހުމަދިއްޔާ އިންޓަރނޭޝަނަލް ސްކޫލުން ވަނީ ދައްކުވައިދީފައެވެ. އެ ސްކޫލުން އިންތިޒާމުކޮށްގެން، އެ ސްކޫލްގެ 7 އަދި 8 ގައި ކިޔަވަމުންދާ ދަރިވަރުންގެ ބައިވެރިވުމާއެކު ވަނީ އދ. އާންމު މަޖިލީހުގެ ނަމޫނާ ބައްދަލުވުމެއް ބާއްވާފައެވެ.

މި ބައްދަލުުމުގައި އެ ސްކޫލުގެ ގްރޭޑް 7 އަދި 8 ގެ ދަރިވަރުން ވަނީ ދުނިޔޭގެ 63 ގައުމެއް ތަމްސީލުކޮށްފައެވެ. ބައްދަލުވުމުގެ ރިޔާސަތު ބަލަހައްޓާފައިވަނީ އެ ސްކޫލްގެ ގްރޭޑް 11 ގައި ތައުލީމު ހާސިލްކުރަމުންުދާ އަންޖަލް މުހައްމަދު އަގީލެވެ. ނާއިބުރައީސަކީ ގްރޭޑް 11 ގައި ތައުލީމު ހާސިލްކުރަމުންުދާ އާދަމް ނާއިޝް ނަސީމެވެ. ސެކްރެޓަރީ ޖެނެރަލަކީ، ގްރޭޑް 11 ގައި ތައުލީމު ހާސިލްކުރަމުންދާ މަރިޔަމް ނައިސަމް ސައީދެވެ. މި ބައްދަލުވުމުގައި 63 ގައުމު ތަމްސީލުކުރި ދަރިވަރުންވަނީ އެ ގައުމުތަކުގައި ހުރި މައްސަލަތަކާ ގުޅޭގޮތުން ވަހަކަދައްކާފައެވެ. އަދި 33 ގައުމަކުން ވަނީ އެ ގައުމުތަކުގައި ހުރި މައްސަލަތަކާ ގުޅޭގޮތުން ކަރުދާސް ހުށަހަޅާފައެވެ. މި ކަރުދާސްތައް ތައްޔާރުކޮށްފައިވަނީ އެ ދަރިވަރުން އަމިއްލައަށް ކުރަންޖެހޭ ދިރާސާތައް ކުރުމަށްފަހުއެވެ.

އދ. އާންމު މަޖިލީހުގެ ނަމޫނާ ބައްދަލުވުން - އަހުމަދިއްޔާ އިންޓަރނޭޝަނަލް ސްކޫލު

މި ބައްދަލުވުން ޝަރަފުވެރިކޮށްދެއްވީ މިނިސްޓްރީ އޮފް ފޮރިން އެފެއާޒްގެ ފޮރިން ސެކެޓްރީ އަބްދުލްޣަފޫރު މުހައްމަދެވެ. އޭނާ ވަނީ ދަރިވަރުންގެ ފަރާތުން އެހާ ފުރިހަމައަށް އދ. ގެ އާންމު މަޖިލީހުގެ ކަންކަން ދައްކުވައިދިނީތީ އެކަމަށް ތައުރީފުކުރައްވާފައެވެ. އަދި ކުރިއަށްއޮތް ތަނުގައި އެ ދަރިވަރުން ފޮރިން މިނިސްޓްރީއާ ގުޅޭނެ ކަމަށް އުންމީދު ކުރައްވާކަމަށް އޭނާ ވިދާޅުވިއެވެ. އަދި ރާއްޖޭގެ ޚާރިޖީ ޚިދުމަތަށް އޮތީ ފާގަތި ކުރިއެރުމެއް ކަމުގައި ގަބޫލުކުރައްވާކަމަށް ފޮރިން ސެކެޓްރީ ވިދާޅުވިއެވެ. ގައުމުތައް ތަމްސީލުކުރައްވާ ދަރިވަރުން ދީފައިވާ ސްޕީޗްތަކުގައި އެގައުމުތަކުން ކުރިމަތިލަމުންދާ ބޮޑެތި ކަންކަން ފާހަގަކޮށްފައިވާކަމަށް އޭނާ ވިދާޅުވިއެވެ.

މި ބައްދަލުވުން ކުރިއަށްދިޔަވަގުތު ގައުމުތައް ތަމްސީލުކުރި ދަރިވަރުންގެ ބެލެނިވެރިންނަށް އެހެން މާލަމެއްގައި ތިބެގެން ޖަލްސާ ބެލޭނެ އިންތިޒާމު ސްކޫލުން ވަނީ ހަމަޖައްސައިދީފައެވެ. ދަރިވަރުންގެ ބަހުގެ ހުނަރު ކުރިއެރުވުމަށާއި، ދުނިޔޭގެ އެކި ކަންކޮޅުތަކުގައި ހިނގާ ކަންތައްތަކަށް ދަރިވަރުން ހޭލުންތެރިކުރުވުމަށް އަހުމަދިއްޔާ އިންޓަރނޭޝަނަލް ސްކޫލުން ބޭއްވި މި ބައްދަލުވުން ވަރަށް ކާމިޔާބުކަމާއެކު ނިންމާލެވިފައިވުމާއެކު އެ ސްކޫލްގެ އަމާޒަކީ ކުރިއަށް އޮތްތަނުގައިވެސް މިފަދަ އެކި ހަރަކާތްތައް ކުރިއަށްގެންދިއުމެވެ.

ސްކޫލަކުން އިސްނަގައިގެން މިފަދަ ހަރަކާތެއް ކުރިއަށްގެންދިއުމުން މިކަމުން އެންމެ ބޮޑަށް ދައްކުވައިދެނީ ސްކޫލްތަކުންވެސް ދަރިވަރުން މިފަދަ ކަންކަމަށް އަހުލުވެރިކުރުވުމަށް ދޭ އަހައްމިއްޔަތުކަމެވެ. އަދި މިއީ ޖިންސީ ހަމަހަމަކަން ގާއިމްކުރުމަށް ވަރަށް ބޮޑަށް މަސައްކަތްކުރަމުންދާ ޒަމާނަކަށް ވާއިރު، އަހުމަދިއްޔާ ސްކޫލުން ބޭއްވި އދ. ގެ އާންމު މަޖިލީހުގެ ނަމޫނާ ބައްދަލުވުމުގައި ޖަލްސާގެ ރިޔާސަތުގައި އަންހެން ދަރިވަރަކު އިނުން ވެގެން ދިޔައީ ގިނަ ބައެއްގެ ލޮލުގައި އަޅައިގަތް ކަމަކަށެވެ. އަންހެނަކަށްވެސް އެފަދަ މަގާމަކަށް ދެވިދާނެކަން މިކަމުން ދައްކުވައިިދިނެވެ.

އެންމެ ފަހުން އަޕްޑޭޓް ކުރީ: 4 ހަފްތާ ކުރިން
ރިވިއު ކުރީ: އިމާދު ލަތީފް
0%
0%
0%
0%
0%
0%
ކޮމެންޓް