ރާއްޖޭގެ އެކި ސަރަހައްދުތަކުގައި ދާންމަތިވެފައިވާ ކުދިންނަށް އާކްގެ ފަރާތުން 20 ހޮސްޕިޓަލް އެނދު ހަދިޔާކޮށްފިއެވެ.
އެ ކުދިންނާ މި އެނދުތައް ހަވާލުކުރުމަށްޓަކައި އާކުން ވަނީ މި 20 އެނދު މިނިސްޓްރީ އޮފް އެޑިޔުކޭޝަނާ ހަވާލުކޮށްފައެވެ.
މި އެނދުތަކުގެ ސަބަބުން އެ ކުދިންގެ އާންމު ދިރިއުޅުމަށް ހެޔޮ ބަދަލުތަކެއް އަންނާނެކަމަށާއި، އެ ކުދިންގެ އާއިލާއަށް އަދި ތައުލީމު ފޯރުކޮށްދިނުމުގައި ޚާއްސަ އެހީއަށް ބޭނުންވާ ކުދިންނާއެކު މަސައްކަތްކުރާ ޓީޗަރުންނަށްވެސް ފަސޭހަވެގެންދާނެކަމަށް އާކުން ބުނެއެވެ.
މިކަން ފާހަގަ ކުރުމުގެ ގޮތުން ހުޅުމާލޭ ޣާޒީ ސްކޫލުގެ ދަރިވަރަކަށް އެނދު ހަވާލުކޮށްދީފައިވެއެވެ. އެނދު ހަވާލުކޮށްދެއްވީ މިނިސްޓްރީ އޮފް އެޑިޔުކޭޝަންގެ ނާއިބު، މުހައްމަދު އިހްސާނެވެ.
އެނދު ހަވާލުކޮށްދެއްވައި އިހުސާން ވަނީ އާކްއިން ނުކުޅެދުންތެރިކަން ހުންނަ ދަރިވަރުންގެ ލާބައާއި މަންފާއަށް ކޮށްދޭ މަސައްކަތްތައް ފާހަގަ ކުރައްވާފައެވެ.
