ބުރުނީ ގިރާ ސަރަހައްދު ހިމާޔަތްކުރަން ބޭނުންވާ ވެލި ނަގަން ފަށައިފި

ތ. ބުރުނީ ގޮނޑުދޮށް ހިމާޔަތް ކުރުމުގެ މަޝްރޫއުގެ ދަށުން، ގިރާ ސަރަޙައްދު ހިމާޔަތް ކުރުމަށް ބޭނުންވާ ވެލި ނެގުމަށްޓަކައި ކޮނުމުގެ މަސައްކަތް ފަށައިފިކަމަށް އެމަސައްކަތް ކުރާ ކުންފުނި އެމްޓީސީސީން ބުނެފިއެވެ.

އެ ކުންފުނިން މިއަދު ބުނީ، މި މަޝްރޫއުގެ ދަށުން، ގިރާ ސަރަހައްދު ހިމާޔަތް ކުރުމަށް ބޭނުންވާ ވެލި ނެގުމަށްޓަކައި ކޮނުމުގެ މަސައްކަތް މިހާރު ފެށިގެން ކުރިއަށްދާ ކަމަށާއި، ތާވަލާއި އެއްގޮތަށް މަސައްކަތް ނިންމާލެވޭނެ ކަމުގެ އުއްމީދު އެބައޮތް ކަމުގައެވެ.

ރަށުގެ ގިރާފައިވާ ސަރަޙައްދަށް ވެލިއެޅުމުގެ އިތުރަށް، 369 މީޓަރުގެ ބޮޑުހިލައިގެ ބޭރު ތޮއްޓެއްލުމާއެކު، 220 މީޓަރުގެ ރިވެޓްމަންޓެއް ޖަހާނެއެވެ. މި މަސައްކަތް އެމްޓީސީސީއާ ހަވާލުކޮށްފައިވަނީ 8 މަސް ދުވަހުން ނިންމާގޮތަށް، 28.8 މިލިއަން ރުފިޔާއަށެވެ. މި މަޝްރޫއުގެ މަސައްކަތް ފެށުމަށްޓަކައި ޕްރޮޖެކްޓް ސައިޓް މޮބިލައިޒް ކޮށްފައި ވަނީ ނޮވެމްބަރު 22ގަ އެވެ.