ފަލަސްތީނުގެ ރައްޔިތުންގެ ހައްގުގައި ވަކާލާތުކުރުމުގައި ދެމިހުންނާނަން: ޝާހިދު
މިހާތަނަށް ކުރެވުނު މަސައްކަތްތަކުން ރަނގަޅު ނަތީޖާއެއް ނުފެންނާތީ ކަންބޮޑުވުން ފާޅުކުރައްވާފައިވޭ
ފަލަސްތީނުގެ ރައްޔިތުންގެ ހައްގުގައި ބޭއްވި ބައްދަލުވުން
ފަލަސްތީނުގެ ރައްޔިތުންނަށް ރަނގަޅު ދިރިއުޅުމެއް ހޯދައިދޭން ދުނިޔޭގެ ގައުމުތަކުން މަސައްކަތްކުރަންޖެހޭ ކަމަށާއި، މިއީ ނުކޮށް ދޫކޮށްލެވެން އޮތް ކަމެއް ނޫން ކަމަށް އދ. ގެ އާންމު މަޖިލީހުގެ ރައީސް އަދި ރާއްޖޭގެ ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.
ޝާހިދު މިފަދައިން ވިދާޅުވީ ފަލަސްތީނުގެ ރައްޔިތުންގެ ހައްގުގައި ބައިނަލްއަގުވާމީ ގޮތުން ފާހަގަކުރާ "އިންޓަރނޭޝަނަލް ޑޭ އޮފް ސޮލިޑެރިޓީ ވިތް ދަ ފަލަސްތީނިއަން ޕީޕަލް" އާ ގުޅިގެން އާންމު މަޖިލީހުގައި ކުރިއަށްދިޔަ ޚާއްސަ ބައްދަލުވުމުގައި ވާހަކަދައްކަވަމުންނެވެ. އިސްރާއީލާއި ފަލަސްތީނާއި ދެމެދު ހިނގަމުންދާ ހަމަނުޖެހުންތައް ހައްލުކުރުމަށް އެތައް މަސައްކަތެއް ކުރެވިފައިވާއިއު މިއިން އެއްވެސް ކަމަކުން ރަނގަޅު ނަތިޖާ އެއް ނުފެންނަކަމީ ކަންބޮޑުވާ ކަމެއް ކަމަށް ޝާހިދު ވިދާޅުވިއެވެ.
މި މައްސަލަ ހައްލުކުރުމަށް ޔޫއެން ސެކިއުރިޓީ ކައުންސިލް ރިސޮލިއުޝަން ނުވަތަ މިނޫންވެސް ރިސޮލިއުޝަންތަކަށް ރިއާޔަތްކޮށް، ބައިނައަލްއަގުވާނީ ގާނޫނުތަކާ ގަވައިދުތަކަށް ރިއާޔަތްކުރުން މުހިންމު ކަމަށް ޝާހިދު ވިދާޅުވިއެވެ. މިކަންކަން ހައްލުކުރުމަށް ކުރަމުންދާ މަސައްކަތުގައި، އެތައް އަނިޔާއެއް ތަހައްމަލްކުރަމުންދާ ފަލަސްތީނުގެ ރައްޔިތުންނާ ދޭތެރޭ ވިސްނައި، އެމީހުންނަށް އަމާން ކަމާއެކު ދިރިއުޅެވޭނެ މަގު ފަހިކޮށްދޭން ޖެހޭ ކަމަށް އާންމު މަޖިލީހުގެ ރައީސް ވިދާޅުވިއެވެ.
ޝާހިދު ވަނީ ފަލަސްތީނުގެ ރެފިއުޖީންނަށް އެހީތެރިކަން ފޯރުކޮށްދިނުމަށް ޔުނައިޓެޑް ނޭޝަންސް ރިލީފް އެންޑް ވޯކްސް އެޖެންސީ ފޮރ ފަލަސްތީން ރެފިއުޖީސް (ޔޫއެންއާރުޑަބްލިއުއޭ) އިން ކުރަމުންދާ މަސައްކަތްތަކަށް ތައުރީފުކުރައްވާފައެވެ. ޔޫއެންއާރުޑަބްލިއުއޭއިން ގެންދަނީ ޖޯރޑަން، ލުބްނާން، ސީރިއާގެ އެކި ސަރަހައްދުތަކުގައި ތިބި 5.6 މިލިއަން ފަލަސްތީނުގެ ރެފިއުޖީންނަށް ތައުލީމާއި، ސިއްހީ ޚިދުމަތާއި، އިޖުތިމާއީ ގޮތުން ފޯރުކޮށްދޭންޖެހޭ ޚިދުމަތްތައް ފޯރުކޮށްދީ އެމީހުންނަށް އެހީވަމުންނެވެ.
އެހެންނަމަވެސް މި މަސައްކަތްތައް ކުރިއަށްގެންދަން ބޭނުންވާ ފަންޑު ޔޫއެންއާރުޑަބްލިއުއޭ ގައި ނެތް ކަމަށާއި، މިއީ ގިނަ ކަންކަމަކަށް ބުރޫ އަރާނެ ކަމެއް ކަމަށް ޝާހިދު ވިދާޅުވިއެވެ. އެގޮތުން އަންހެންކުދިންގެ ތައުލީމާއި، ވެކްސިންގެ ޚިދުމަތާއި، އަދިވެސް މިނޫން އެކި ޚިދުމަތްތަކަށް ބުރޫ އަރާނެ ކަމަށް ޝާހިދު ވިދާޅުވިއެވެ. ޝާހިދު ވަނީ ފަލަސްތީނުގެ ރައްޔިތުންނަށް މި ޚިދުމަތްތައް ލިބޭނެ މަގު ހުއްޓުނަ ނުދިނުމަށް ޔޫއެންއާރުޑަބްލިއުއޭއަށް ބޭނުންވާ ފަންޑު ހޯދައިދިނުމަށް ދުނިޔޭގެ ގައުމުތަކަށް ގޮވާލައްވާފައެވެ.
އަދި ފަލަސްތީނުގެ ރައްޔިތުންނަށް ރަނގަޅު ދިރިއުޅުމެއް ހޯދައިދޭން މިހާތަނަށް ނުކުރެވި ހުރި މަސައްކަތްތަކަށް ނުބަލައި، ކުރިއަށް އޮތް ތަނުގައި ކުރެވޭނެ ކަންކަމާ ދޭތެރޭ ވިސްނައި، ރަނގަޅު މަސައްކަތްތަކެއް ކުރުމަށްވެސް ޝާހިދު ވަނީ ދުނިޔޭގެ ގައުމުތަކަށް ގޮވާލައްވާފައެވެ.
ޝާހިދު ވަނީ އާންމު މަޖިލީހުގެ ރައީސްގެ ހައިސިއްޔަތުން ފަލަސްތީނުގެ ހައްގުގައި ވަކާލާތުކުރުމުގައި ދެމިހުންނަވާނެ ކަމަށް ވިދާޅުވެފައެވެ.
