އަބަދުވެސް އަޑުއިވޭ ވާހަކައެއް އޮވެއެވެ. ރާއްޖޭގައި ވަރި ގިނަވާ ވާހަކައެވެ. ކައިވެނި ކުރުމަށްފަހު ވަރިއާ ހިސާބަށް ދިޔުމަށް ނަގާ މުއްދަތު އަވަސް ވާހަކައެވެ. މިއީ މިހާރު މި މުޖުތަމައަށް ބަލާލިޔަސް ފެންނަން އޮތް ހަގީގަތެކެވެ.
ދެމީހަކު އެކުގައި ގުޅިގެން ޒަވާޖީ ހަޔާތެއް ފަށަނީ ވަރަށް ގިނަ ފޮނި އުންމީދުތަކާއެކުއެވެ. އެކުގައި މުޅި އުމުރު ދުވަސް ހޭދަކުރާނެކަމަށް ބުނެ، ކޮންމެ ފަދަ ހާލަތެއް ދިމާވިޔަސް ދޫކޮށް ނުދާނެކަމުގެ ވައުދުތައް ވަމުންނެވެ. އެހެންނަމަވެސް ކައިވެންޏަށް މާގިނަ ދުވަސްތަކެއް ނުވެ، ދެމަފަރިންގެ މެދުގައި މައްސަލަތައް ޖެހެން ފަށައެވެ. ކުދި ކުދި މައްސަލަތައް ބޮޑުވެ، ހައްލު ނުކުރެވި ދިގުލައިގެން ދިޔުމުން ގިނަ ފަހަރަށް ވަރިއާ ހިސާބަށް ދެއެވެ.
ކައިވެންޏެއްގައި އެންމެ މުހިންމު އެއްކަމަކީ އެ ލޯބި ދަމަހައްޓައި އެކަކު އަނެކަކަށް އަޅާލާ އޯގާތެރިވުމެވެ. އަނެކާގެ އިހުސާސްތައް ވެސް ދެނެގަނެ، އެ އިހުސާސްތަކަށް އިހްތިރާމު ކުރުމެވެ. އެހެންނަމަވެސް މިފަދައިން ކަންތައް ނުކުރެވޭ ތަން އައުމުން ނުވަތަ މައްސަލަ ހައްލު ނުވުމުން ކޮންމެވެސް އެކަކު ދުރުވާން ވިސްނައެވެ. ގިނަ ފަހަރަށް ވަރިވާން އެދި ފޯމު ވެސް ހުށަހަޅާނީ އަންހެން މީހާއެވެ.
ޖުޑީޝަލް ސަރވިސް ކޮމިޝަން (ޖޭއެސްސީން) އިން ބުނީ އާއިލީ ކޯޓަށް ޚިދުމަތް ހޯދަން ދާ މީހުންގެ ތެރެއިން މައްސަލަ ހުށައެޅުމުގެ ބޮޑު ބައެއް ހިއްސާކުރަނީ އަންހެނުން ކަމަށެވެ. އަދި އެހެން އެއްވެސް ކޯޓަކަށް އެ ނިސްބަތުން ޚިދުމަތް ހޯދުމަށް އަންހެނުން ނުދާ ކަމަށްވެސް ވަނީ ބުނެފައެވެ. އޭގެ ތެރޭގައި ދަރިފުޅަށް ޚަރަދު ނުދިނުމާއި، ހަޟާނާތުގެ މައްސަލަތަކާއި، ގެވެށި އަނިޔާގެ މައްސަލަތަކާއި، ފިރިމީހާގެ އެކި މައްސަލަތަކާއި ގުޅިގެން ވަރިވާން ބޭނުންވެގެން ހުށައަޅާ މައްސަލަތައްވެސް ހިމެނޭ ކަމަށް ޖޭއެސްސީން ވަނީ ބުނެފައެވެ.
އިސްލާމްދީނުގައި ވަރި ކުރުމުގެ ބާރު އޮންނަނީ ފިރިމީހާއަށެވެ. އެހެންނަމަވެސް އިތުރަށް ނޫޅެވޭނެކަން ޔަގީންވާ ހާލަތުގައި އަންހެން މީހާއަށް ވެސް ވަރިވުމަށް އެދި ކޯޓަށް މައްސަލަ ހުށަހެޅިދާނެއެވެ. ގިނަ ފަހަރަށް އަންހެންމީހާ އަމިއްލައަށް ވަރިވުމަށް އެދި ކޯޓަށް ހުށަހެޅުމުން، އާއިލާގެ ފަރާތުންނާއި ގާތްތިމާގެ މީހުންގެ ފަރާތުން އަންނަ ޕްރޮޝެރ ބޮޑުވެގެންދެއެވެ. ކަންތައްތައް ހަނދާން ނައްތާލުމަށްފަހު، ނޫނީ ފެންނަ ކަންތައްތައް ނުފެންނަ ކަންތައްތަކަށް ހެދުމަށްފަހު، ދަރިން ތިބިނަމަ އެ ދަރިންނަށްޓަކައި ވެސް ކައިވެނި ދަމަހައްޓަން މަސައްކަތް ކުރާށޭ ބުނާތަން އާދެއެވެ.
އެހެންނަމަވެސް ގަބޫލުކުރަންވީ ހަގީގަތަކީ ގުޅުމެއް ދެމެހެއްޓޭނީ ދެމީހުންގެ ވެސް އެއްބާރުލުމާއެކު ކަމެވެ. އެކަކު ކިތަންމެ ވަރަކަށް މަސައްކަތް ކުރިޔަސް ގުޅުން ކުރިއަށް ނުދާނެ ކަމެވެ. ޖޭއެސްސީގެ މެމްބަރު އަލީ ސަމީރު ވެސް ވިދާޅުވަނީ މިފަދައިންނެވެ. ސަމީރު ވިދާޅުވީ ދެމަފިރިންގެ ދެމެދުގައި ލޯތްބާއި އޯގާވެރިކަން ފެންނަން ނެތް ހާލަތެއްގައި، އެ ދެމަފިރިންނަށް ކުރާ ހުކުމަކުން އެ ލޯބި ގެނައުމަކީ ވާނެކަމެއް ނޫން ކަމަށެވެ.
މިސާލަކަށް އަނބިމީހާގެ ފަޔަށް ފިރިމީހާ ދެތިން މޮހަރު ޖަހައިގެން އަދިވެސް ސުލްހަވެގެން އުޅޭށޭ ބުނުން، އެއީ ލޯތްބާ އޯގާވެރިކަމުގެ އަސްލުކަމުގައި ބަލައިގެން ދެވޭ ފަރުވާއަކަށް ނުވޭ، ވަރިވާން އެދި އަނބިމީހާ ކޯޓަށް މައްސަލަ ހުށަހެޅުމުން ދެތިން އަހަރު މައްސަލައަށް ގޮތެއް ނުނިންމާ އެއީ އެއީ ލޯތްބާ އޯގާވެރިކަމުގެ އަސްލުކަމުގައި ބަލައިގެން ދެވޭ ފަރުވާއަކަށް ނުވޭ، އެނޫން އެހެން ގޮތެއް ނެތިގެން އަނބިމީހާ ވަރިވާން އެދުމުން ބާރަ ނޫނީ ތޭރަ ފަހަރު ސުލްހަވާން އެންގުން އެއީ ލޯތްބާ އޯގާވެރިކަމުގެ އަސްލުކަމުގައި ބަލައިގެން ދެވޭ ފަރުވާއަކަށް ނުވޭ، ފިރިމީހާއާއެކު ނޫޅެވިގެން ފިރިމީހާގެ ގެއިން އަނބިމީހާ ނިކުމެގެން ދިޔުމުން ފުލުހުންނަށް އަމުރުކޮށްގެން އަނބިމީހާ ނަގައިގަނެގެން ފިރިމީހާގެ ގެއަށް ގެންދަން ކޯޓުން އަމުރު ނެރުން އެއީ ލޯތްބާ އޯގާވެރިކަމުގެ އަސްލުކަމުގައި ބަލައިގެން ދެވޭ ފަރުވާއަކަށް ނުވޭ، ދެމަފިރިން އެއްދާން ކުރުމަކީ ހުއްދަ ކަމެއްކަމުގައިވާތީ ކަމަށް ބުނެ ފިރިމީހާ އައިސް އަނބިމީހާ ރޭޕް ކުރުމުން އެއީ ކުށެއް ނޫންކަމަށް ދުށުން އެއީ ލޯތްބާ އޯގާވެރިކަމުގެ އަސްލުކަމުގައި ބަލައިގެން ދެވޭ ފަރުވާއަކަށް ނުވޭއަލީ ސަމީރު
ސަމީރު ވިދާޅުވީ އެ ވާހަކަތަކަކީ ރާއްޖޭގައި ކަން ހިނގާފައިވާ ގޮތުގެ މިސާލުތައް ކަމަށާއި އަދި އެކަމުގެ ޝަކުވާ އެ ކޮމިޝަނަށް ހުށަހެޅިފައި ވެސް ވާ މައްސަލަތައް ކަމަށެވެ. ސަމީރު ވިދާޅުވީ މިފަދަ ބައެއް އަމަލުތަކަކީ އިސްލާމްދީނުގެ ނަމުގައި ކުރެވޭ ކަންތައްތަކެއް ކަމަށެވެ. އެހެންނަމަވެސް އެގޮތަށް އަމަލު ކުރުމަކީ ކީރިތި ގުރުއާނާއި ރަސޫލާގެ ސުންނަތުން ވެސް އެނގެން ނެތް ކަންތައްތައް ކަމަށެވެ. ދީނުގައި އަންގަވާފައިވަނީ އާއިލީ ދުނިޔެއަކީ ލޯތްބާއި ހަމަޖެހުމާއި އެކަކު އަނެކަކަށް އަޅާލުމާއި އަމާން ތަނެއްގެ ގޮތުގައި ބޭއްވުމަށެވެ.
ގިނަ ފަހަރަށް އަނބިމީހާ އިސްވެ ވަރިއަށް އެދުމުން މުޖުތަމައުގެ ތެރެއިން ވެސް އެ މީހަކަށް ފުރައްސާރައާ ކުރިމަތިލާން ޖެހެއެވެ. ވަރިވެފައިވާނަމަ އެމީހާއާ ދޭތެރޭގައި ދެކޭގޮތް ވެސް ތަފާތުވެގެންދެއެވެ. ސަމީރުގެ ވާހަކަތަކަށް ރިޔާއަތް ކުރާއިރުވެސް ސާފުވާން އެއްކަމެއް އެބައޮތެވެ. އަންހެނަކާމެދު އިހުމާލު ވެވޭ ކަމަށްވާނަމަ އެކަމާއި ދެކޮޅަށް އަޑު އުފުލުމަކީ ކުރަންވާނެ ކަމެއް ކަމެވެ. ފިރިމީހާ އަނިޔާވެރިވާއިރު އެއީ ލޯތްބާ އޯގާވެރިކަމުގެ އަސްލުކަމުގައި ބަލައިގެން ކުރިއަށް ދިޔުމަކީ ހައްލު ނޫން ކަމެވެ.
