ދިރާގު އެޕްރެންޓިސްޝިޕް ޕްރޮގުރާމުގެ ގްރެޖުއޭޝަން ހަފްލާ ބާއްވައިފި
29 ނޮވެމްބަރު 2021 | ހޯމަ 02:55މި ޕްރޮގްރާމުގެ ދަށުން 15 ކުދިން ގްރެޖުއޭޓްވި
ދިރާގު އެޕްރެންޓިސްޝިޕް ޕްރޮގުރާމުގެ ގްރެޖުއޭޝަން ހަފްލާގައި ނާއިބުރައީސް ސެޓްފިކެޓް ހަވާލުކޮށްދެއްވަނީ
ދިރާގު އެޕްރެންޓިސްޝިޕް ޕްރޮގުރާމުގެ ގްރެޖުއޭޝަން ހަފްލާ ބާއްވައިފިއެވެ.
މި ހަފްލާ ބާއްވާފައިވަނީ އާދިއްތަ ދުވަހުގެ ރޭ ކްރޮސްރޯޑްސް މޯލްޑިވްސްގައެވެ. މި ރަސްމިއްޔާތު ނާއިބުރައީސް ފައިސަލް ނަސީމް ޝަރަފުވެރިކޮށްދެއްވާފައިވާއިރު ގްރެޖުއޭޓްވި 15 ކުދިންނަށް ސެޓްފިކެޓް ހަވާލުކޮށްދެއްވީ އެމަނިކުފާނެވެ.
މި ހަފްލާގައި ވާހަކަފުޅު ދައްކަވަމުން ދިރާގުގެ ސީއީއޯ އަދި މެނޭޖިންގ ޑިރެކްޓަރ އިސްމާއިލް ރަޝީދު ވިދާޅުވީ މި ޕްރޮގްރާމު ކުންފުނިން ހިންގަނީ ޒުވާނުން ވަޒީފާގެ މާހައުލަށް ނެރުމަށް ފުރުސަތު ފަހިކޮށްދިނުމަށް ކަމަށެވެ. އަދި މި ޕްރޮގްރާމު މާލެ ސަރަހައްދުގެ އިތުރުން އަތޮޅުތެރޭގައި ސެންޓަރުތަކުގައި ވެސް ހިންގާ ކަމަށް ވިދާޅުވިއެވެ.
ދިރާގުން 2009 ގައި ތަޢާރަފުކުރި މި ޕްރޮގުރާމް ހިންގާތާ މިއީ 12 ވަނަ އަހަރެވެ. މަސައްކަތުގެ ޢަމަލީ އަދި ފަންނީ ތަފާތު ދާއިރާތަކުގައި މަސައްކަތްކުރުމުގެ ފުރުޞަތު ދިރާގު އެޕްރެންޓިސްޝިޕް ޕްރޮގުރާމުގެ ދަށުން ހޮވޭ ކުދިންނަށް ދީފައިވެއެވެ.
މި ޕްރޮގުރާމް ނިންމާ ގިނަ ކުދިންނަކީ ދިރާގުގެ އިތުރުން ރާއްޖޭގެ ތަފާތު ކުންފުނިތަކުގައި ޒިންމާދާރު ވަޒީފާތައް ކާމިޔާބުކަމާއެކު އަދާކުރަމުން އަންނަ ޒުވާނުން ކަމަށާއި، މިއީ ދިރާގު އެޕްރެންޓިސްޝިޕް ޕްރޮގުރާމުގެ ކާމިޔާބު ރަމްޒުކޮށްދޭ އެއް ހެކި ކަމަށް ދިރާގުން ބުންޏެވެ.
މި ޕްރޮގުރާމުގައި ދިރާގުގެ ވަރަށް ގިނަ ދާއިރާތަކުގައި މަސައްކަތް ކުރުމުގެ ފުރުޞަތު ލިބިގެންދާނެއެވެ. އޭގެ ތެރޭގައި ސޭލްސް، މާރކެޓިންގ، ޕްރޮކިއުމަންޓް އެންޑް ޕްރޮޕަޓީ މެނޭޖްމެންޓް، ހިރުމަން ރިސޯސަސް ،ފައިނޭންސް، އިންފޮމޭޝަން ސިސްޓަމްސް، ނެޓްވޯރކްސް އަދި ކަސްޓަމަރ ސޮލިއުޝަންސް ޑިޕާޓްމަންޓް ހިމެނެއެވެ. އަދި ބައިވެރިވާ ކުދިންނަށް އެންމެ ފުރިހަމަ ގޮތުގައި އެހީތެރިވުމުގެ ގޮތުން ކޮންމެ ކުއްޖަކަށް ދިރާގުގެ ފަރާތުން މެންޓޯއެއް ވެސް ކަނޑަޅާފައިވެއެވެ.
މި ޕްރޮގުރާމުގެ ތެރޭގައި ހިމެނޭ ރަސްމީ ކޯސްތަކާއި ޓްރެއިނިން ތަކުގެ ތެރޭގައި ސޮފްޓް ސްކިލްސް ޑިވެލޮޕްމެންޓް ޓްރެއިނިންގް ވެސް ހިމެނެއެވެ.
