ދިރާގުން ކެއަރ ސޮސައިޓީއަށް ހާއްސަ ހަދިޔާތަކެއް

ކެއަރ ސޮސައިޓީގެ ފަރާތުން ހިންގުމަށް ހަމަޖެހިފައިވާ ވޮކޭޝަނަލް ޓްރެއިނިންގ ކްލާސްތަކަށް ހާއްސަކޮށްގެން ޤާއިމުކޮށްފައިވާ ކޮމްޕިއުޓަރ ލެބްގެ ފެންވަރު ރަނގަޅު ކުރުމުގެ ގޮތުން ދިރާގުން އެހީތެރިކަން ފޯރުކޮށްދީފިއެވެ.

ދިރާގުން ވަނީ ލެބްގައި ހައި ސްޕީޑް އިންޓަނެޓްގެ ޚިދުމަތް މުޅިން ހިލޭ ފޯރުކޮށްދީ ލެބްގައި ބޭނުންކުރުމަށް އާ ކޮމްޕިއުޓަރ ސިސްޓަމްތަކެއް ހަދިޔާކޮށްފައެވެ.

ދިރާގު ހެޑް އޮފީހުގައި ބުރާސްފަތި ދުވަހު ބޭއްވި ރަސްމިއްޔާތުގައި ދިރާގުގެ ފަރާތުން މިތަކެތި ކެއާސޮސައިޓީއާ ހަވާލުކޮށްދެއްވީ ކުންފުނީގެ ސީއީއޯ އަދި އެމްޑީ އަލްފާޟިލް އިސްމާއިލް ރަޝީދެވެ. ކެއަރ ސޮސައިޓީގެ ފަރާތުން މިތަކެއްޗާ ހަވާލުވެވަޑައިގެންނެވީ އެޖަމިއްޔާގެ ވައިސް ޗެއާޕާރސަން އިސްމާއިލް އަދުހަމްއެވެ.

ދިރާގުން ބުނީ އިޖްތިމާއީ ޒިންމާގެ އެއްތަނބު ކަމަށްވާ މުޖްތަމައުގެ ދަށުން ކުޑަކުދިންގެ ތައުލީމާއި ސިއްހަތު އަދި ކުރިއެރުމަކީ އެކުންފުނިން ނުހަނު އިސްކަމެއްދޭ ކަންތައްތައް ކަމަށެވެ. އަދި މިމޭރުމުން ކުރިން ވެސް ކުންފުނިން ވަނީ މިދިޔަ އަހަރުގެ ކުޑަކުދިންގެ ދުވަހާ ގުޅުވައިގެން ކެއަރ ސޮސައިޓީގައި އަރލީ އިންޓަވެންޝަން ކްލާހެއް ހިންގުމަށް ވެސް އެހީތެރިކަން ފޯރުކޮށްދީފައި ވެއެވެ.

މީގެ އިތުރުން ވެސް، ކޮންމެ އަހަރަކު ދިރާގުން ބާއްވަމުން އަންނަ ދިރާގު މޯލްޑްވިސް ރޯޑް ރޭހަކީ ވެސް ކުޑަކުދިން ރައްކާތެރިކުރުމުގެ ޝިޔާރުގުގެ ދަށުން ބާއްވާ ރޭހެކެވެ. މީގެ އިތުރުން، ދިރާގު ސްޕެޝަލް ސްޕޯރޓްސް ފެސްޓިވަލަކީ ވެސް، ހާއްސައެހީއަށް ބޭނުންވާ ކުދިންނަށް ހާއްސަކުރެވިގެން ބޭއްވޭ އެފަދަ އެންމެ ބޮޑު ހަރަކާތެވެ.