ފަނޑިޔާރަކަށް ކުރެވޭ އެންމެ ކަމަކުން އެމީހާގެ މުޅި އުމުރު ދުވަހަށް އެކަން ލައްގަނޑެއްހެން ފިލައި ނުގޮސް ހުންނާނެ ކަމަށް ދިވެހިރާއްޖޭގެ ސުޕްރީމް ކޯޓުގެ ފަނޑިޔާރު ހުސްނުއްސުއޫދު ވިދާޅުވެއްޖެއެވެ.
ފެމިލީ ކޯޓަށް އައްޔަނުކުރެއްވި ދެ ފަނޑިޔާރުން ހުވާ ކުރުމުގެ ރަސްމިއްޔާތުގައި ވާހަކަދައްކަވަމުން ފަނޑިޔާރު ހުސްނުއްސުއޫދު ވިދާޅުވީ، މިއީ ވަރަށް ކުޑަ މުޖުތަމައެއް ކަމަށެވެ. ފަނޑިޔާރުންގެ އުޅުން ބައްޓަންކުރާއިރު އިތުރަށް ސަމާލުވާން ޖެހޭ ކަމަށާއި، ކުރެވޭ ކޮންމެ ކަމަކުންވެސް ފަނޑިޔާރުންގެ އަގު ވެއްޓިދާނެ ކަމަށެވެ. އަދި ކުރެވޭ އެންމެ ކަމެއްގެ ލައްގަނޑު މުޅި އުމުރު ދުވަހު ނުފިލައި ހުރުން އެކަށީގެންވާކަމަށް ހުސްނުއްސުއޫދު ވިދާޅުވިއެވެ.
ފަނޑިޔާރު ވިދާޅުވީ ފެމިލީ ކޯޓުގެ މަސައްކަތްތަކަކީ މުހިންމުކަން ކުޑަ މަސައްކަތްތަކެއްކަން ބައެއް މީހުން ދުށް ނަމަވެސް، އެ މަސައްކަތްތަކަކީ އެއްގޮތަކަށްވެސް މުހިންމުކަން ކުޑަ މަސައްކަތެއް ނޫން ކަމަށް ހުސްނުއްސުއޫދު ވިދާޅުވިއެވެ. އެހެންނަމަވެސް ފެމިލީ ކޯޓަށް ހުށަހެޅޭ މައްސަލަތައް ނިންމުމަށް ގިނަ ދުވަސް ނަގާ ކަމަށާއި، އެއީ އެ މައްސަލަތަކަކީ އެހެން ކޯޓުތަކަށް ހުށަހަޅާ މައްސަލަތަކާ ތަފާތު މައްސަލަތަކަކަށް ވާތީ ކަމަށް ވިދާޅުވިއެވެ.
ހުސްނުއްސުއޫދު ވިދާޅުވީ، ފެމިލީ ކޯޓަށް ހުށަހެޅޭ މައްސަލަތަކަކީ، ގާނޫނުތަކެއް ހިންގައިގެން ހައްލު ކުރެވޭނެ މައްސަލަތަކެއް ނޫން ކަމަށެވެ. އެ ކޯޓަށް ހުށަހެޅޭ ގިނަ މައްސަލަތަކަކީ މީހުންގެ ތެރޭގައި އުފެދޭ ޚިލާފު ތަކަކަށްވާތީ، ނުވަތަ ގުޅުންތަކަކަށް ބުރޫ އަރައިގެން ހުށަހެޅޭ މައްސަލަތަކެއް ކަމުން މިފަދަ ގިނަ މައްސަލަތައް ހައްލުކުރެވޭނީ ސުލްހަ ގެނެވިގެން ކަމަށެވެ. އެއީ ގާނޫނަކުން ނުވަތަ ހުކުމަކުން ހައްލު ގެނެވޭނެ މައްސަލަތަކެއް ނޫން ކަމަށް އޭނާ ވިދާޅުވިއެވެ.
ފެމިލީ ކޯޓުގެ ޚިދުމަތްތައް ރައްޔިތުންނަށް ލިބެންޖެހެނީ ލުއި ފަސޭހަކޮށް ކަމަށާއި، މިހާރުވެސް ދަތިތައް ހުރިކަން ފާހަގަކުރެވޭކަމަށް އޭނާ ވިދާޅުވިއެވެ. އެހެންކަމުން އެ ދަތިތަކުގެ އަޑު އަހައި އެކަންކަމަށް ހައްލު ހޯަދައިދޭން މަސައްކަތްކުރަންޖެހޭކަމަށް އޭނާ ވިދާޅުވިއެވެ.
މީގެ އިތުރުން ފަނޑިޔާރުން ހުކުމްތައް ލިޔާއިރު ތަފްސީލުކޮށް ލިޔުމަކީ ވަރަށް މުހިންމު ކަމެއްކަން ފަނޑިޔާރު ފާހަގަކުރެއްވިއެވެ. އެއީ އެ ހުކުމް ރައްދުވާ ފަރާތަށް، ހުކުމް ކުރި ސަބަބު އިތުރަށް އެނގިގެންދާނެ ކަމެއް ކަމަށާއި، ފަނޑިޔާރުންނަށް ކުރާ އިތުބާރުވެސް ބޮޑުވެގެންދާނެ ކަމެއް ކަމަށް އޭނާ ވިދާޅުވިއެވެ.
އާދިއްތަ ދުވަހު ޖުޑީޝަލް ސަރވިސް ކޮމިޝަނުން ބޭއްވި ރަސްމިއްޔާތެއްގައި ފަނޑިޔާރު ކަމުގެ ހުވާ ކުރައްވާފައިވަނީ އއ. ފެރިދޫ، ނަޝީދީހިޔާ، އަލްއުސްތާޒާ ޒައީމާ ނަޝީދު އަބޫބަކުރާއި މ. ވިލުފުށީގެ، އަލްއުސްތާޒާ މައީޝާ ޔޫސުފް ސަމީރެވެ. އެ ދެބޭފުޅުންނަކީ ފަނޑިޔާރުން އައްޔަނުކުރާ ކޮމިޓީން އިންޓަރވިއުކޮށް އެންމެ ގާބިލުކަމަށް ފެންނަކަމަށް ނިންމަވައި ކޮމިޝަނަށް ލަފާ ދެއްވި ދެބޭފުޅުންނެވެ.
