ފެމިލީ ކޯޓަށް އައްޔަން ކުރެވުނު ދެ ފަނޑިޔާރުން ހުވާ ކުރައްވައިފި
2021 ނޮވެމްބަރު 28 ވަނަ ދުވަހު ފަނޑިޔާރުކަމުގެ ހުވާ ކުރެއްވި
ފަނޑިޔާރު ކަމުގެ ހުވާ ކުރައްވާފައިވަނީ ނަޝީދީހިޔާ، އއ. ފެރިދޫ، އަލްއުސްތާޒާ ޒައީމާ ނަޝީދު އަބޫބަކުރާއި މ.ވިލުފުށީގެ، އަލްއުސްތާޒާ މައީޝާ ޔޫސުފް ސަމީރު
ފެމިލީ ކޯޓަށް އައްޔަން ކުރެއްވި ދެ ފަނޑިޔާރުން ހުވާ ކުރައްވައިފިއެވެ.
އާދިއްތަ ދުވަހު ޖުޑީޝަލް ސަރވިސް ކޮމިޝަނުން ބޭއްވި ރަސްމިއްޔާތެއްގައި ފަނޑިޔާރު ކަމުގެ ހުވާ ކުރައްވާފައިވަނީ ނަޝީދީހިޔާ، އއ. ފެރިދޫ، އަލްއުސްތާޒާ ޒައީމާ ނަޝީދު އަބޫބަކުރާއި މ.ވިލުފުށީގެ، އަލްއުސްތާޒާ މައީޝާ ޔޫސުފް ސަމީރެވެ. އެ ދެބޭފުޅުންނަކީ ފަނޑިޔާރުން ޢައްޔަންކުރާ ކޮމިޓީން އިންޓަރވިއުކޮށް އެންމެ ގާބިލުކަމަށް ފެންނަކަމަށް ނިންމަވައި ކޮމިޝަނަށް ލަފާ ދެއްވި ދެބޭފުޅުންނެވެ.
އަލްއުސްތާޒާ ޒައީމާ ނަޝީދު ވަނީ ކުއްލިއްޔަތުއް ދިރާސާތިލް އިސްލާމިއްޔާއިން ޝަރީއަތާއި ގާނޫނުން ބެޗްލަރ ޑިގްރީ ހާސިލް ކުރައްވައި، ވިލާ ކޮލެޖުން މާސްޓަރ އޮފް ޝަރީއާ ހާސިލް ކުރައްވާފައެވެ. އަލްއުސްތާޒާ ޒައީމާ ނަޝީދު ވަނީ ޖުވެނައިލް ކޯޓުގެ ރެޖިސްޓްރާރުގެ މަގާމުގައި 9 އަހަރަށްވުރެ ދިގު މުއްދަތަކަށް ޚިދުމަތް ކުރައްވާފައެވެ.
އަލްއުސްތާޒާ މަޢީޝާ ޔޫސުފް ސަމީރު ވަނީ ޔުނިވަރސިޓީ އޮފް ލަންޑަނުން ބެޗެލާރސް އޮފް ލޯސް ހާސިލް ކުރައްވާފައެވެ. އަލްއުސްތާޒާ މަޢީޝާ ޔޫސުފް ސަމީރު ވަނީ ޕްރޮސެކިއުޓާރ ޖެނެރަލް އޮފީހުގެ ޕްރޮސިކުޓަރެއްގެ މަގާމުގައި 3 އަހަރަށްވުރެ ދިގު މުއްދަތަކަށް ޚިދުމަތް ކުރެއްވުމުގެ އިތުރުން، އެޓޯލްސް ސެކްޝަންގެ ޔުނިޓް ހެޑް އަދި ފެމިލީ އެންޑް ޗައިލްޑްސް ޔުނިޓުގެ ޔުނިޓު ހެޑްގެ ގޮތުގައި މަސައްކަތް ކުރައްވާފައެވެ.
ފެމިލީ ކޯޓަށް 2 ފަނޑިޔާރުން ހޯދުމަށް ކޮމިޝަނުން ކުރި އިއުލާނާ ގުޅިގެން އެމަގާމަށް ކުރިމަތިލެއްވި ބޭފުޅުންގެ ތެރެއިން، މަގާމަށް އެންމެ ގާބިލު ބޭފުޅުން ހޮވުމަށްޓަކައި އިންޓަރވިއު ކޮށްފައިވެއެވެ.
