ޚާއްސަ އެހީއަށް ބޭނުންވާ މީހުންގެ ދުވަސް ކާށިދޫގައި ފާހަގަކުރަން ނިންމައިފި
26 ނޮވެމްބަރު 2021 | ހުކުރު 21:17ކަލަރ ރަންގައި ބައިވެރިވާ ޚާއްސަ އެހީއަށް ބޭނުންވާ ފަރާތްތަކަށް ކިޓް ސްޕޮންސަރ ކުރުމަށް ވަނީ ހަމަޖެހިފައި
ކ.ކާށިދޫ
ބައިނަލްއަގުވާމީ ޚާއްސަ އެހީއަށް ބޭނުންވާ މީހުންގެ ދުވަސް ކުލަގަދަ ގޮތެއްގައި ފާހަގަ ކުރުމަށް ހަމަޖެހިއްޖެއެވެ.
ޚާއްސަ އެހީއަށް ބޭނުންވާ މީހުންގެ ދުވަހާއި ގުޅުވައިގެން ކ.ކާށިދޫގައި ޚާއްސަ ހަވީރެއް ބޭއްވުމަށް ވަނީ ހަމަޖެހިފައިއެވެ. މިއީ ކާށިދޫ އަންހެނުންގެ ތަރައްގީއަށް މަސައްކަތްކުރާ ކޮމެޓީއާއި ކާށިދޫގެ ބައެއް ޖަމިއްޔާތައް ގުޅިގެން ބޭއްވޭ ހަވީރެކެވެ. ކާށިދޫ އަންހެނުންގެ ތަރައްގީއަށް މަސައްކަތް ކުރާ ކޮމެޓީން ހާމަކޮށްފައިވާ ގޮތުގައި މި ހަވީރުގައި ރަށުގެ ކުދިބޮޑު އެންމެހާ ފަރާތްތަކަށް ބައިވެރިވެވޭނެ އެވެ. މި ހަވީރު ކުރިއަށް ގެންދިއުމަށް ހަމަޖެހިފައިވަނީ 4 ޑިސެމްބަރ 2021 ވާ ހޮނިހިރު ދުވަހުގެ ހަވީރު 4:00ން 6:00 އަށެވެ.
މިހަވީރު ކުރިއަށް ގެންދިއުމަށް ހަމަޖެހިފައިވަނީ ރަން ފޯރ މޯލްޑިވްސްގެ "ވާރޗުއަލް ކަލަރ ރަން"އިވެންޓާއި އެއްކޮށް ކަމަށްވެސް ކޮމެޓީން ހާމަކުރެއެވެ. މި ރަންގައި ބައިވެރިވާން ބޭނުންވާ ފަރާތްތަކުން ބޭނުންކުރާނެ ޓީޝާޓާއި ބޭންޑް ހިމެނޭ ކިޓެއް ވިއްކަމުން ދާނެއެވެ. މި ރަންގައި ބައިވެރިވާ ޚާއްސަ އެހީއަށް ބޭނުންވާ ފަރާތްތަކަށް ކާށިދޫ އަންހެނުންގެ ތަރައްގީއަށް މަސައްކަތް ކުރާ ކޮމެޓީން ކިޓް ސްޕޮންސަރ ކޮށްދޭގޮތަށް ވަނީ ހަމަޖެހިފައެވެ.
