އެކި މާހައުލުތަކުގައި، އެކި ބާވަތުގެ ގޯނާ ކުރުމަކީ މިއަދު މުޖުތަމައުގައި ފެތުރިފައިވާ ވަބާއެއް: ޚުތުބާ
އެކި ގޯނާ ކުރުމަކީ ބިމުގައި ފަސާދަކުރުން ފަދަ ކަމެއް
ރ. ރަސްގެތީމް ޢީދު ނަމާދަށް މީހުން ދަނީ
އެކި މާހައުލުތަކުގައި އެކި ބާވަތުގެ ގޯނާ ކުރުމަކީ މިއަދު މުޖުތަމައުގައި ފެތުރިފައިވާ ވަބާއެއް ކަމަށް ހުކުރު ޚުތުބާގައި ބުނެފިއެވެ.
އަނިޔާތަކާއި ދުރުހެލިވުމަށް ގޮވާލާ ރާއްޖޭގެ އެކި ކަންކޮޅުތަކުގައި އިއްވި ހުކުރު ޚުތުބާގައި ބުނެފައިވަނީ އިލްމުވެރިން ވިދާޅުވާ ފަދައިން އެކި ގޯނާ ކުރުމަކީ ބިމުގައި ފަސާދަކުރުން ފަދަ ކަމެއް ކަމަށެވެ. މަގުމަތީގައި ނުވަތަ އޮފީހުގައި މީހަކު ބޭނުންވާ ނުބައި މަޤްސަދު ހާސިލް ކުރުމަށް އަނެކުންނަށް ބިރު ދެއްކުމަކީ ހަނގުރާމަ ކުރުން ފަދަ އަމަލެއް ކަަމަށެވެ.
ހުރިހާ ބާވަތެއްގެ އިހާނެތިކަންކަމަކީ އިސްލާމްދީން މަނާކުރާ ކަންތައްތައް ކަމަށާއި އެންމެ ބޮޑުވެގެންވާ ރިބާއަކީ މުސްލިމެއްގެ އަބުރަށް އަރައިގަތުން ހުއްދަކުރުން ކަމަށްވާއިރު މުސްލިމެއްގެ އަބުރާއި އިއްޒަތާއި އިއްފަތްތެރިކަމާއި އޭނާގެ ލެއާއި މުދަލަކީ މާތްﷲ ޙުރުމަތްތެރި ކުރައްވާ ހިމާޔަތްކުރައްވާފައިވާ ތަކެތި ކަމަށް ޚުތުބާގައި ބުންޏެވެ.
ދޭދޭ އަފްރާދުންގެ މެދުގައި ހިނގާ އަނިޔާގެ އަމަލުތަކުގެ ސަބަބުން އިޖްތިމާއީ ފޭރާން ވީދި، މުޖުތަމައުގައި އޮންނަ ސުލްހަމަސަލަސްކަން ބޮއްސުންލައިގެން ދާތަން ބަލަން ކަމާބެހޭ މުއައްސަސާތަކުން ތިބެގެންނުވާނެއެވެ. އޭގެ ސަބަބުން މުޖުތަމައުގައި އެކުވެރިކަމާއި އެއްބާރުލުން ނެތިގެންދާތަން ބަލަން ނުތިބެ، ފިޔަވަޅުތައް އަޅަން ޖެހޭ ކަމަށާއި މިކަމުގައި ފަރުވާ ކުޑަކޮށްފިނަމަ މުޖުތަމައުގައި އަރާރުން އުފެދި ދީނީ ގޮތުން ހުއްދަ ނުކުރާ އެތަކެއް އަމަލުތަކަކަށް މަގުފަހިވެގެން ހިނގައިދާނެ ކަމަށް ވެސް ޚުތުބާގައިވެއެވެ.
މިއަދު ނުހަނު ގިނައިން އިވެނީ ތިމާގެ މީހުންނާއި އެކުވެރިންނާއި އަނބިން ނުވަތަ ފިރިން ފަދަ ނުހަނު ގާތް މީހުން އެކަކު އަނެކަކަށް ކުރާ ތުރާތަކާއި އަނިޔާގެ ވާހަކަތައް ކަމަށްވާއިރު މީގެތެރެއިން ގެވެށި އަނިޔާގެ ވާހަކަ ވަކިން ޚާއްސަ ގޮތެއްގައި ފާހަގަކުރެވިފައިވާ ކަމަށް ޚުތުބާގައި ބުންޏެވެ. ގެވެށި އަނިޔާއަކީ ފިރިން އަނބިންނަށް، އަނބިން ފިރިންނަށް ކުރާ އަނިޔާ އާއި މައިންބަފައިން ދަރިންނަށް، ދަރިން މައިންބަފައިންނަށް ކުރާ އަނިޔާއާ އާއިލާގެ މެމްބަރުން އެކަކު އަނެކަކަށް ކުރާ އަނިޔާއާ އިންސާފެއް ނެތި އާއިލާގެ އެކި މީހުންނާ ދޭތެރޭގައި ގެންގުޅޭ ތަފާތުކުރުން ފަދަ އަމަލުތަކެކެވެ. މިއަދު ގޭގަޔާއި ސްކޫލުތަކުގެ ދަރިވަރުންނަށް ވެސް އަނިޔާ ލިބެމުންދާއިރު މިކަންތައްތައް އިތުރުވެގެންދަނީ ކަންބޮޑުވާން ޖެހޭ މިންވަރަކަށެވެ. އެންމެ ގާތް މީހާގެ މައްޗަށް ވެސް މިއަދު އިތުބާރު ކުރެވޭކަށް ނެތެވެ.
އެއްވެސް މުސްލިމަކު އަނެއް މުސްލިމެއްގެ އަބުރާ ބެހުމާއި ފުރައްސާރަ ކުރުމާއި ހޭރުވުމާއި އިއްފަތްތެރިކަމަށް އަރައިގަތުމާއި އިސްލާމްދީން ހުއްދަ ނުކުރާ ފާހިޝް އަމަލުތައް ހިންގުމަކީ ބޮޑެތި ފާފަތަކުގެ ތެރޭގައި ހިމެނޭ ކަންކަން ކަމަށް ޚުތުބާގައި ބުންޏެވެ. އެންމެ އޯގާތެރިކޮށް ހިތަން ޖެހޭ މީހުންނަށް އަނިޔާވެރިވުމަކީ ގެންލުން ހުރި ހަޑިހުތުރު އަމަލެއް ކަމަށާއި އިސްލާމްދީން ހުއްދަ ކުރާ ކަމެއް ނޫން ކަމަށެވެ. ރިވެތި ގޮތުގައި އަނބިންނާއި މުއާމަލާތް ކުރުމަށް މާތްﷲ ފިރިންނަށް އަންގަވާފައިވާ ކަމަށެވެ.
ހުރިހާ ބާވަތެއްގައި އަނިޔާއިން ރައްކާތެރިވާން ޖެހޭކަން ފާހަގަކޮށް ޚުތުބާގައި ބުނީ އެހެނީ އެއަނިޔާ ލިބިގެންވާ މީހާގެ ދުޢާ އަކީ އިޖާބަވުން ވަރަށް އަވަސް ދުޢާއެއް ކަމަށެވެ. އަދި އަނިޔާ ލިބިގެންވާ މީހާގެ ދުޢާ މާތްﷲ އިޖާބަ ކުރެއްވުމަށް އެއްވެސް ހުރަހެއް ނުވާ ކަމަށް ޚުތުބާގައި ބުންޏެވެ.
