ނެދަރލެންޑްގައި ކޮވިޑް-19 ޖެހިގެން ހޮސްޕިޓަލްތަކުގައި އެޑްމިޓްކުރާ މީހުންގެ އަދަދު އިތުރުވަމުންދިޔުމާއެކު، ކޮވިޑް ކޮންޓްރޯލްކުރުމަށް އަޅާފައިވާ ފިޔަވަޅުތައް އިތުރަށް ވަރުގަދަކުރާނެކަމަށް އެގައުމުގެ ސަރުކާރުން ބުނެފިއެވެ.
ނެދަރލެންޑްސްގައި ވެކްސިން ގެ ދެ ޑޯޒް ޖަހާފައިވާ މީހުންގެ އަދަދު 85 އިންސައްތައަށް އަރައެވެ. ނަމަވެސް ފާއިތުވި ހަފްތާގައި ނެދަރލެންޑްސްގައި ދުވާލެއްގެ މައްޗަށް ކޮވިޑް ޖެހިފައިވާ މީހުންގެ އަދަދު ވަނީ 20،000ން މައްޗަށް އަރާފައެވެ. މިއީ ކުރިން އެގައުމު ކޮވިޑްގެ ޕީކުގައި އޮތްއިރަށްވުރެ މަތީ އަދަދެކެވެ.
ނެދަރލެންޑްސްގެ ހެލްތު މިނިސްޓަރ ހޫގޯ ވިދާޅުވީ ކޮވިޑް ފެތުރުން ކޮންޓްރޯލްކުރުމަށް ވަރުގަދަ ފިޔަވަޅުތަކެއް އަޅަންޖެހޭކަމަށެވެ. ނޮވެމްބަރ މަސް ފެށިގެން އައިއިރު ނެދަރލެންޑްސްގައި ވަނީ ކޮވިޑް ފެތުރުން ކޮންޓްރޯލްކުރުމަށް ފިޔަވަޅުތަކެއް އަޅާފައެވެ. މިނިސްޓަރ ވިދާޅުވީ އެފިޔަވަޅުތަކުން އެދެވޭ ނަތީޖާއެއް ނިކުންނަމުންނުދާ ކަމަށެވެ. އޭރު އެޅި ފިޔަވަޅުތަކުގެ ތެރޭގައި، ފިހާރަތަކުގައި އުޅޭއިރު މާސްކު އެޅުމާއި ގޭގައި ތިބިގެން މަސައްކަތްކުރުމާއި ރެސްޓޯރެންޓްތަކާއި ބާރތައް ރޭގަނޑު 8 ޖަހާއިރު ބަންދުކުރުން ހިމެނެއެވެ.
ނަމަވެސް ކޭސްތަކުގެ އަދަދު މަތިވަމުންދިޔައިރު ދެން އަޅާނެ ފިޔަވަޅުތަކެއް އަދި ނުނިންމާކަމަށް މިނިސްޓަރ ވިދާޅުވިއެވެ.
ނެދަރލެންޑްސްގެ ނޭޝަނަލް ބްރޯޑްކާސްޓަރއިން ރިޕޯޓްކޮށްފައިވާ ގޮތުގައި އެގައުމުގެ އައުޓްބްރޭކް މެނޭޖްމަންޓް ޓީމުން ސަރުކާރަށް ލަފާދީފައިވަނީ ރެސްޓޯރެންޓްރަކާއި ބާރތައް 5 ޖަހާއިރު ބަންދުކުރުމަށާއި ސްކޫލްތައް ހުޅުވުމަށެވެ.
ނެދަރލެންޑްސްގައި މިހާތަނަށް އައިއިރު 2.5 މިލިއަން މީހުންނަށް ކޮވިޑް ޖެހިފައިވެއެވެ. އަދި ބަލީގައި މަރުވި މީހުންގެ އަދަދު 19،000ން މައްޗަށް އަރައެވެ.