3 ރަށެއްގެ ގޮނޑުދޮށް ހިމާޔަތްކުރުމަށް، 72 މިލިއަން ރުފިޔާގެ މަޝްރޫއެއް އެމްޓީސީސީއަށް
މިއީ 72 މިލިއަން ރުފިޔާގެ މަޝްރޫއެއް
3 ރަށެއްގެ ގޮނޑުދޮށް ހިމާޔަތްކުރުމަށް އެމްޓީސީސީއާ ހަވާލުކުރުން
ތިން ރަށެއްގެ ގޮނޑުދޮށް ހިމާޔަތްކުރުމަށް 72 މިލިއަން ރުފިޔާގެ މަޝްރޫއެއް އެމްޓީސީސީއަށް މިއަދު ހަވާލު ކޮށްފިއެވެ. އެއީ ބ. ދަރަވަންދޫއާއި އެ އަތޮޅު ކެންދޫ އަދި ސ. ހިތަދޫގެ ގޮނޑުދޮށް ހިމާޔަތްކުރުމުގެ މަޝްރޫއެވެ.
ޕްލޭނިން މިނިސްޓްރީއާ އެމްޓީސީސީއާ ދެމެދު ވެވުނު އެއްބަސްވުމުގެ ދަށުން، ކެންދޫގެ ގިރާ ސަރަހައްދު ހިމާޔަތްކުރުމަށް 803 މީޓަރުގެ ބްރޭކްވޯޓަރއާއި، 90 މީޓަރުގެ ދެ ގްރޮއިން ހަދާނެ އެވެ. އަދި 80 މީޓަރުގެ ބޮޑު ހިލައިގެ ރިވެޓްމެންޓެއް ޖެހުމާއެކު، 20 މީޓަރު ފުޅާ 40 މީޓަރު ދިގު ސަރަހައްދެއް ފުންކޮށް، މޫދަށް އެރޭ ސަރަހައްދެއް ތަރައްގީކުރާނެ އެވެ. ޖުމްލަ 39.9 މިލިއަން ރުފިޔާގެ މި މަޝްރޫއު ނިންމުމަށް ދީފައި ވަނީ އެއް އަހަރެވެ.
ދަރަވަންދޫގެ ގޮނޑުދޮށް ހިމާޔަތްކުރުމުގެ މަޝްރޫއުއަކީ 22 މިލިއަން ރުފިޔާގެ މަޝްރޫއެކެވެ. ގާތްގަނޑަކަށް 6 މަސްދުވަހުގެ ތެރޭގައި ނިންމާ ގޮތަށް ހަވާލުކުރި މި މަޝްރޫއުގެ ދަށުން، އެ ރަށުގެ ގިރާ ސަރަހައްދުގައި 490 މީޓަރުގެ 7 ބްރޭކްވޯޓަރ ހަދައި، 96 މީޓަރުގެ ރިވެޓްމަންޓް ޖަހާނެއެވެ.
ހިތަދޫ ގޮނޑުދޮށް ހިމާޔަތްކުރުމުގެ މަޝްރޫއަކީ 165 ދުވަހުގެ ތެރޭގައި ނިންމާ ގޮތަށް ހަމަޖެހިފައިވާ، 11.6 މިލިއަން ރުފިޔާގެ މަޝްރޫއެކެވެ. މި މަޝްރޫއުގައި ހިތަދޫގެ ހުޅަނގުފަރާތުން 570 މީޓަރުގެ ސަރަހައްދެއްގައި ޖިއޯޓިއުބް ރިވެޓްމެންޓް ޖެހުމާއި، 15 މީޓަރު ފުޅާ 50 މީޓަރު ދިގު ސަރަހައްދެއް ފުންކޮށް، މޫދަށް އެރޭ ސަރަހައްދެއް ވެސް ހަދާނެ އެވެ. އެ ރަށުގައި ވެސް 100 މީޓަރުގެ ބޮޑު ހިލައިގެ ބްރޭކްވޯޓަރއެއް ހަދާނެ އެވެ.
