ކ. ތަސްފަރީ ފަރަށް އެރި ބޯޓު ޖޫރިމަނާކުރަން ނިންމި ނިމުން ރަނގަޅު ކަމަށް މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީ އާމިނަތު ޝައުނާ ނިންމަވައިފިއެވެ.

'އެމް.ވީ ނަވިއޯސް އަމަރިލިސް' ނަމަކަށް ކިޔާ ކާގޯ ބޯޓު ކ. ރަސްފަރީ ފަރަށް އެރުމާއި ގުޅިގެން އެންވަޔަރަންމަންޓަލް ޕްރޮޓެކްޝަން އެޖެންސީ (އީޕީއޭ) އިން ވަނީ ޖޫރިމަނާގެ ގޮތުގައި 100 މިލިއަން ރުފިޔާ ދެއްކުމަށް ބޯޓުގެ ވެރިފަރާތަށް އަންގާފައެވެ. އެ މައްސަލަ، ބޯޓުގެ ވެރިފަރާތުން ވަނީ މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީ އާމިނަތު ޝައުނާއަށް އިސްތިއުނާފު ކުރުމަށް ހުށަހަޅާފައެވެ. މިނިސްޓަރު އެމައްސަލަ ބައްލަވައި ނިންމެވީ އީޕީއޭގެ ނިންމުން ބަދަލުކުރަން އަންގަންޖެހޭ ތަނެއް ނެތްކަމަށެވެ.

މިނިސްޓަރުގެ ނިންމެވުމުގައި ފާހަގަކުރެއްވި ކަންތައްތަކުގެ ތެރޭގައި، ބޯޓު ފަރަށް އެރުމުގައި ބޯޓު ދުއްވަން އިން ފަރާތުގެ އިހުމާލު ވަރަށް ބޮޑަށް އޮތްކަން ފާހަގަކުރެއްވެއެވެ. ހާދިސާގެ ލިޔެކިޔުންތަކުން އެނގޭގޮތުން ބޯޓުގެ އިންޖީނެއްގެ ޓެމްޕްރޭޗަރ މަތިވެގެން ކެޕްޓަނަށް އެކަން ފާހަގަކުރެވިފައި ވަނީ 18 އޮގަސްޓް 2021 ގެ 13:00 ގައި ކަމަށް މިނިސްޓްރީން ބުނެފައިވެއެވެ. ދިމާވި މައްސަލަ ބެލުމަށް ބޯޓުގެ އިންޖީނު ނިއްވާލާފައި ވަނީ ހަމަ އެ ދުވަހު 14:30 ގައި ކަމަށާއި، ބޯޓު ފަރަށް އަރާފައި ވަނީ 19 އޮގަސްޓް ގެ މެންދަމު 0300 ގައި ކަމަށް ބުނެފައިވެއެވެ.

އެހެންނަމަވެސް، މި ހާދިސާ ހިނގިކަން ރަސްމީކޮށް ސަރުކާރުގެ މުއައްސަސާތަކަށް ބޯޓުގެ ވެރިފަރާތުން ރިޕޯޓުކޮށްފައި ވަނީ 19 އޮގަސްޓް ވަނަ ދުވަހުގެ ރޭގަނޑު 20:00 ގައިކަމަށް މިނިސްޓްރީން ބުނެފައިވެއެވެ. އަދި ބޯޓު ފަރަށް އެރިކަން އީޕީއޭ އަށް ލިޔުމުން އަންގާފައި ވަނީ 21 އޮގަސްޓް ވަނަ ދުވަހު ކަމަށާއި، އޭގެކުރިން، ބޯޓު ފަރަށް އަރައިގެން އުޅޭކަން އީޕީއޭ އަށް އަންގާފައި ވަނީ ރަސްފަރި ބެލެހެއްޓުމުގެ ޒިންމާ އަދާކުރާ މުވާސަލާތީ ކުންފުނި 'ދިރާގު' ގެ މުވައްޒަފުން ކަމަށް މިނިސްޓްރީން ބުނެފައިވެއެވެ. އެ ކުންފުނިން މި މައްސަލަ އީޕީއޭ އަށް ރިޕޯޓުކޮށްފައި ވަނީ 19 އޮގަސްޓް ވަނަ ދުވަހުގެ މެންދުރު 13:27 ގައި ކަމަށް ބުނެފައިވެއެވެ.

އެހެންކަމުން ބޯޓުގެ ވެރިފަރާތުން ސަރުކާރުގެ ކަމާބެހޭ މުއައްސަސާތަކަށް އަންގައި އެއްބާރުލުން ދިންކަމަށް ބަލައިގަނެވޭނެ ޖާގައެއް ނެތްކަމަށް މިނިސްޓަރުގެ ނިންމެވުމުގައި ފާހަގަކުރެއްވިއެވެ. އިމަރޖެންސީ ހާލަތެއްކަމަށް ގަބޫލުކޮށް، ވަގުތު އޮއްވައި ކަމާބެހޭ ފަރާތްތަކަށް އަންގައި އެ ފަރާތްތަކުގެ އެހީތެރިކަން ބޯޓުން ހޯދިނަމަ، ބޯޓު ފަރަށް އެރުމުން ސަލާމަތްކުރެވުނީސް ކަމަށް ދާއިރާގެ މާހިރުންނާއި ސަރުކާރުގެ ގުޅުންހުރި މުއައްސަސާތަކުން ދެކޭކަމަށްވެސް މިނިސްޓަރުގެ ނިންމެވުމުގައި ފާހަގަކުރައްވާފައިވެއެވެ.

މިނިސްޓަރގެ ނިންމެވުމުގައި ވަނީ ރާއްޖެއަށް ލިބިފައިވާ ގުދުރަތީ އެންމެބޮޑު ރައުސްމާލަކީ ފަރުތަކުގެ ނިޒާމުކަން ފާހަގަކުރައްވާފައެވެ. އަދި ފަރުގެ ނިޒާމަކީ އޭގެ މައްޗަށް ރާއްޖޭގެ މުޅި އިގްތިސާދު ބިނާވެފައިވާ، ވަކިން ޚާއްސަކޮށް ފަތުރުވެރިކަމާއި މަސްވެރިކަން އެއާއި ނުލާ ދެމެހެއްޓެނި ގޮތެއްގައި ކުރިއަށް ނުގެންދެވޭނެ ނިޒާމުތަކެއްކަން މިނިސްޓަރ ފާހަގަކުރެއްވިއެވެ. ބޯޓު ފަރަށް އެރުމުގެ ސަބަބުން ފަރަށް ލިބޭ ގެއްލުމުގެ އިތުރުން ތެޔޮ ލީކުވުން ފަދަ ހާދިސާއެއް ހިނގިނަމަ، ރާއްޖޭގެ ތިމާވެއްޓަށާއި، މަސްވެރިކަމަށާއި، އާންމު ސިއްހަތަށާއި، ފަތުރުވެރިކަމަށް އޭގެ ނޭދެވޭ އަސަރު އަހަރުތަކެއް ވަންދެން ކުރާނެކަމީވެސް ޝައްކެއްނެތް ކަމެއްކަމަށް މިނިސްޓަރ ވިދާޅުވިއެވެ.

ބޯޓު އެރި ފަރަކީ ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާއި ބެހޭ ގާނޫނުގެ ދަށުން 1995 އިން ފެށިގެން ހިމާޔަތްކޮށްފައިވާ ފަރެކެވެ. މިއީ ޑައިވަރުންގެ މެދުގައި މަޝްހޫރު، މާލެ އަތޮޅުގައި އޮންނަ ތިމާވެށީގެ ގޮތުން އެންމެ މުހިއްމު އެއް ސަރަޙައްދެވެ. މި ފަރުގައިވާ މުރަކައިގެ ބަގީޗާގައި، އެންމަޑި ސާފުކުރުމަށް ބޭނުންކުރާ "ކްލީނިންގ ސްޓޭޝަން" އެއްވެސް ހިމެނެއެވެ. މީގެ އިތުރުން މި ސަރަޙައްދަކީ ފަރުމަހުގެ ދިރުމުން މުއްސަނދި އަދި ރާއްޖޭގައި ހިމާޔަތްކޮށްފައިވާ މާހުޅުނބުލަނޑާއާއި، މަޑިއާއި، މިޔަރާއި، ވެލާ ފެންނަ ސަރަޙައްދެކެވެ.