ހދ. ނޮޅިވަރަމުގެ ދަނޑުވެރިންނަށް ދަނޑުވެރިކަމާބެހޭ ފަންނީ މަޢްލޫމާތު ދިނުމުގެ ތަމްރީނު ޕްރޮގުރާމެއް ހިންގައިފިއެވެ.
އެގްރޯނެޓް ކުންފުނީގެ ބިޒްނަސް ޑިވެލޮޕްމަންޓް ޑިޕާޓްމަންޓުގެ ފަރާތުން މިޕްރޮގްރާމް ކުރިއަށް ގެންދިޔައީ އަމަލީ މަސައްކަތާއެކުއެވެ. އެގޮތުން މިތަމްރީން ޕްރޮގްރާމްގައި ގަސް އިންދުމަށް ބެޑް ހަދާނެގޮތާއި، މުޑުވައްކުރާނެ ގޮތާ އަދި ގަސްކާނާ ބޭނުންކުރާނެ ގޮތާބެހޭ މައުލޫމާތު ދީފައިވެއެވެ.
މީގެއިތުރުން ޢާންމުކޮށް ގަސްގަހަށް ޖެހޭ ބަލިތަކާ، އެފަދަ ބަލިތަކަށް ބޭސްދިނުމާ ބަލިތަކުން ރައްކާތެރި ކުރާނެ ގޮތްތަކާ، ހާވެސްޓް ރަގަޅު ވާނެ ގޮތްތަކާ، ދަނޑުވެރިކަމުގެ ވިޔަފާރިން ނަފާ އިތުރު ކުރެވޭނެ ގޮތްތަކާއި ބެހޭގޮތުންވެސް މައުލޫމާތު ދީފައިވެއެވެ.
އެގްރޯނެޓުން ހިންގާ ކޮންޓްރެކްޓް ފާމިންގ އަކީ މުޑުވައްކުރާ ހިސާބުން ފެށިގެން ހައްދާ ބާވަތެއް ކެނޑުމާ ހަމައަށް އިންތިޒާމުކުރެވިގެން ބެލެހެއްޓިގެން ހިންގޭ ދަނޑުވެރިކަމެކެވެ. އެގްރޯނެޓުން ހިންގާ ކޮންޓްރެކްޓް ފާމިން ޕްރޮގްރާމްގެ ދަށުން އެކުންފުންޏާއި ބައިވެރިވެރިވެފައިވާ ދަނޑުވެރިން ތިބި ގިނަ ރަށްތަކެއްގައި މިހާރުވެސް ވަނީ މީގެ ޕްރޮގްރާމްތައް ހިންގާފައެވެ.
ދިވެހި ސަރުކާރުން ޙިއްޞާވާ ދަނޑުވެރިކަމަށް ޚާއްޞަ ކުންފުނި "އެގްރޮ ނޭޝަނަލް ކޯޕަރޭޝަން" އަކީ ދިވެހިރާއްޖޭގައި ދަނޑުވެރިކަމުގެ ސިނާއަތް ކުރިއެރުވުމުގެ މަޤްޞަދުގައި އުފައްދާފައިވާ ކުންފުންޏެކެވެ. މި ކުންފުނީގެ މައިގަނޑު މަސައްކަތާއި މަޤްޞަދުތަކުގެ ތެރޭގައި ހިމެނޭ އެއް ކަމަކީ ސަރުކާރުގެ ސްޓްރެޓެޖިކް އެކްޝަން ޕްލޭންގެ ތެރެއިން، ނޫ އިޤްތިޞާދުގެ އަމާޒުތަކާއި އެއްގޮތްވާގޮތުގެ މަތިން، ދިވެހިރާއްޖޭގައި ދަނޑުވެރިކަމުގެ ސިނާއަތް ކުރިއަރުވާ އާލާކުރުމެވެ.
