ރ. ވާދޫ ކައުންސިލުން އިސްނަގައިގެން އެ ރަށުގައި މީދާ ހިފުމުގެ މުބާރާތެއް ބާއްވަން ނިންމުމުން އެކަމާ އެރަށުގެ ބައެއް ޒުވާނުން ހިތްހަމަނުޖެހި އަޑުއުފުލައިފިއެވެ.
ވާދޫ ކައުންސިލް އޮފީހުގެ ބޭރުގައި ކުރި މުޒާހަރާގައި ބައިވެރިވި ބައެއް ޒުވާނުން މައުލޫމާތު ދިންގޮތުގައި އެ ރަށުގައި ފުޓްސަލް މުބާރާތެއް ބާއްވަން ޒުވާނުން ކައުންސިލްގައި އެދެމުން އަންނަތާ ވަރަށް ގިނަ ދުވަސްވެފައިވެއެވެ. އެހެންނަމަވެސް، ކައުންސިލުން ބަޖެޓު ނެތް ކަމަށް ބުނެ އެ މުބާރާތް ނުބާއްވަން ނިންމާފައި ވާތީ ޒުވާނުން މާޔޫސްވެފައިވާ ކަމަށެވެ. މިއީ ޒުވާނުންނަށް ބަލައިގަނެވޭނެ ކަމެއް ނޫންކަމަށް އެރަށު ޒުވާނުން ބުނެއެވެ.
ވާދޫގައި މީދާ މަދުކުރުމަށް، މީދާ ހިފުމުގެ މުބާރާތެއް ބާއްވަން ނިންމައި، އެކަމުގައި ބައިވެރިވާން ކައުންސިލުން ހުޅުވާލީ އިއްޔެ އެވެ.
ވާދޫގައި ދިރިއުޅޭ މީހުނަށް އެކަނި ބައިވެރި ވެވޭގޮތަށް ހުޅުވާލި މިމުބާރާތުގައި، އެއްވަނައަށް ހޮވޭ ފަރާތަކަށް 3000 ރުފިޔާ، ދެވަނައަށް ހޮވޭ ފަރާތަކަށް 2000 ރުފިޔާ އަދި ތިންވަނައަށް ހޮވޭ ފަރާތަކަށް 1000 ރުފިޔާގެ އިނާމެއް ދިނުމަށް ކައުންސިލުން ވަނީ ނިންމާފައެވެ. މިމަހުގެ 25 ވާ ބުރާސްފަތި ދުވަހު ފަށާ މި މުބާރާތް، އަންނަ މަހު ފަހެއްގެ ނިޔަލަށް ކުރިއަށް ގެންދަން ވަނީ ތާވަލުކޮށްފަ އެވެ. މި މުބާރާތުގައި ހިފާ މީދާތައް ނައްތާލަން ނިންމާފައި ވަނީ ރަށުގެ ކަނޑައެޅިފައިވާ ވަކި ސަރަހައްދެއްގައި ވަޅުލައިގެންނެވެ.
