ސްޓެލްކޯއިން އުފެއްދި ޖަނަރޭޓަރާއެކު، ވ.ތިނަދޫ އައު އިންޖީނުގެއިން ޚިދުމަތްދޭން ފަށައިފިއެވެ. ތިނަދޫގެ އައު އިންޖީނުގެއިން ޚިދުމަތްދޭން ފަށާފައިވަނީ ސްޓެލްކޯގެ ސްޓެވޯ ވޯރކްޝޮޕުން އެސެމްބަލްކުރި ޖަނަރޭޓަރުތަކުގެ ތެރެއިން STW500 މޮޑެލްގެ މުޅިން އައު ޖަނަރޭޓަރަކާއެކު ކަމަށާއި، މި ޖަނަރޭޓަރަކީ ސްޓެވޯއިން މިހާތަނަށް އެސެމްބަލްކުރި ޖަނަރޭޓަރު ތަކުގެ ތެރެއިން، ކޮމިޝަންކޮށް ބޭނުން ކުރަންފެށި ފުރަތަމަ ޖަނަރޭޓަރުކަމަށް ސްޓެލްކޯއިން ބުނެއެވެ.

ސްޓެލްކޯއިން ބުނީ، އާ ޖަނަރޭޓަރާއެކު ތިނަދޫގެ ޖުމްލަ ކެޕޭސިޓީ 1136 ކިލޯވޮޓް އިތުރުވެފައިވާ ކަމަށެވެ. މީގެ ކުރިން ތިނަދޫގެ ކެޕޭސިޓީއަކީ 656 ކިލޯވޮޓެވެ.

ތިނަދޫގެ އާ އިންޖީނުގެ ބޭނުންކުރަން ފަށާފައި މިވަނީ ތިނަދޫގެ ކަރަންޓު ޑިސްޓްރިބިއުޝަން ނެޓްވޯރކްވެސް އަޕްގްރޭޑް ކުރުމަށްފަހުގައި ކަމަށްވެސް ސްޓެލްކޯއިން ބުންޏެވެ. އަދި އެ ރަށުގެ ބާ އިންޖީނުގޭގައި ހުރި ޖަނަރޭޓަރު ސެޓްތައް އާ އިންޖީނުގެއަށް ބަދަލުކުރުމުގެ މަސައްކަތް މިހާރު ކުރަމުންދާ ކަމަށް އެ ކުންފުނިން ބުނެއެވެ.

ބާ އިންޖީނުގޭގައި ހުރި ޖަނަރޭޓަރުތައް އާ އިންޖީނުގެއަށް ބަދަލު ކުރެވުމާއެކު، ބާ އިންޖީނުގެ ބޭނުން ކުރުން އެއްކޮށް ހުއްޓާލާނެއެވެ.

ސްޓެލްކޯއިން ބުނިގޮތުގައި، ތިނަދޫ އިންޖީނުގޭގައި ސޯލާ އިންސްޓޯލް ކުރުމުގެ މަސައްކަތްވެސް ދަނީ ކުރަމުންނެވެ. އެގޮތުން ތިނަދޫ އިންޖީނުގޭގައި 20 ކިލޯވޮޓްގެ ސޯލާ އިންސްޓޯލް ކުރުމަށް ވަނީ ހަމަޖެހިފައެވެ.