ޗައިނާގެ ޓެނިސް ތަރި ޝުއާއީ ހާލު ރަނގަޅު ކަމަށް ބުނެފި

ޗައިނާގެ ޓެނިސް ތަރި ޕެންގް ޝުއާއީ ވީޑިއޯ މެދުވެރިކޮށް އިންޓަނޭޝަނަލް އޮލިމްޕިކް ކޮމެޓީގެ ރައީސް ތޯމަސް ބެކްއާ ބައްދަލުކޮށް ހާލު ރަނގަޅުކަމަށް ބުނެފިއެވެ.

ނޮވެމްބަރު މަހުގެ ކުރީކޮޅު ޗައިނާގެ އިސް އޮފިޝަލަކާ ދެކޮޅަށް ޖިންސީ ގޯނާގެ ތުހުމަތު ކުރި ފަހުން ޝުއާއީގެ ހަބަރެއް ނުވާތީ އޭނާ ދިރިހުރިކަމުގެ ހެކި ދައްކަން ޗައިނާއަށް އެކި ފަރާތްތަކުން ދިޔައީ ޕްރެޝަރު ކުރިމަތިކުރަމުންނެވެ.

އައިއޯސީގެ ރައީސް ތޯމަސް ބެކްއާ އެކު ބޭއްވި 30 މިނެޓުގެ ވީޑިއޯ ބައްދަލުވުމުގައި ޝުއާއީ ވަނީ އޭނާގެ ހާލު ރަނގަޅުކަމަށް ބުނެފައެވެ. އަދި އޭނާގެ ހާލާއިމެދު އެކި ފަރާތްތަކުން ކަންބޮޑުވުން ފާޅުކުރަމުން އަންނާތީ އެކަމަށް ޝުކުރުއަދާކޮށްފައިވެއެވެ.

އައިއޯސީން ނެރުނު ބަޔާނެއްގައި ބުނީ ޝުއާއީގެ ހާލު ރަނގަޅު ކަމަށާއި، ބެއިޖިންގައި ހުންނަ ގޭގާއި އޭނާ މިހާރު އުޅެމުންދާތީ، އޭނާގެ ޒާތީ ދިރިއުޅުމަށް އިހުތިރާމް ކުރުމަށް އެދިފައިވާ ކަމަށެވެ.

ނޮވެމްބަރު މަހުގެ ކުރީކޮޅުން ފެށިގެން ޝުއާއީގެ ޚަބަރެއް ނުވާތީ އެކަމާ ގިނަ ފަރާތްތަކުން އައީ ކަންބޮޑުވުން ފާޅުކުރަމުންނެވެ. އަދި އޭނާ ގެއްލުނީ ޗައިނާގެ ބޮޑުވަޒީރުގެ ކުރީގެ ނާއިބު ޒަންގް ގައޮލީއާ ގުޅޭ ތުހުމަތުތަކެއް ޗައިނާގެ ސޯޝަލް މީޑިއާ ވެއިބޯގައި ޕޯސްޓްކުރި ފަހުންނެވެ.

ޝުއާއީ ބުނީ 2013 އިން 2018 އަށް ޒާންގްއާ އެކު ޖިންސީ ގުޅުމެއް ބާއްވަން އޭނާ އަށް މަޖުބޫރު ކުރުވި ކަމަށެވެ. ފަހުން އެ ޕޯސްޓު ވަނީ ޑިލީޓްކޮށްފައެވެ. އަދި އޭގެ ފަހުން ޝުއާއީގެ ޚަބަރެއް ވެސް ނުވެއެވެ.