ޒަމާނީ ފުލުހުންގެ ފަލްސަފާތަކާ ގުޅުވައިގެން ފުލުހުންގެ ޚިދުމަތް ފުޅާ ކުރުމަކީ އަމާޒެއް ކަމަށް ކޮމިޝަނަރ އޮފް ޕޮލިސް މުޙައްމަދު ހަމީދު ވިދާޅު ވެއްޖެއެވެ.
އާދީއްތަ ދުވަހު އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ސީޕީ ހަމީދު ވިދާޅުވީ، ބޮޑެތި ގޮންޖެހުން ތަކަކާއެކު ވެސް މި ވޭތުވެދިޔަ ތިން އަހަރު ފުލުހުންގެ ޚިދުމަތް މީން ދުވަހަކު ކުރިނާރާ މިންވަރަށް ކުރިއަރާފައިވާ ކަމަށެވެ. އަދި ވަކިން ހާއްސަކޮށް ފުލުހުންގެ އައު ގާނޫނެއް ލިބިގެން ދިޔުމަކީ ފުލުހުންގެ ޚިދުމަތަށް ލިބުނު ބޮޑު ކުރިއެރުމެއް ކަމަށް ހަމީދު ވިދާޅުވިއެވެ.
ސީޕީ ހަމީދު ވިދާޅުވީ، ފުލުހުންގެ ގާނޫނާއެކު ފުލުހުންގެ ހިދުމަތް އަތޮޅު ތެރޭގައި ކުރިއަރާދާނެ ކަމަށެވެ. އެގޮތުން މާލެ ފިޔަވައި ރާއްޖޭގެ ފަސް ސަރަހައްދެއް ބެލެހެއްޓުން ސްޕްރިޑެންޓް އޮފިސަރަކު ހުންނާނެކަން ހަމީދު ފާހަގަ ކުރެއްވިއެވެ.
ސީޕީ ހަމީދު އިތުރަށް ވިދާޅުވީ، މީގެ ކުރިން ރާއްޖޭގެ މީހުން ދިރިއުޅޭ ރަށްތަކުގައި ފުލުހުންގެ ހިދުމަތް ދިނީ 98 ރަށުގައެވެ، އެކަމަކު މިހާރު ފުލުހުންގެ ހިދުމަތް ރާއްޖޭގެ މީހުން ދިރިއުޅޭ 108 ރަށުން މިހާރު ލިބޭނެކަމަށެވެ. އަދި މިއަހަރު ނިމުމުގެ ކުރިން މި އަދަދު އިތުރުވާނެ ކަމަށް ސީޕީ ހަމީދު ވިދާޅުވިއެވެ. މީގެ އިތުރުން ފުލުހުންގެ މަސައްކަތް ކުރުމަށް 56 ރަށެއްގައި އައު އިމާރާތް އެޅުމުގެ މަސައްކަތް ކުރަމުން ގެންދާ ކަމަށް ސީޕީ ހަމީދު ވިދާޅުވިއެވެ.
