އަރައްބިއްޔާ ސްކޫލް އިމާރާތުގެ ހާލަތު ދެނެގަތުމަށް އެސެސްމެންޓް ހަދަމުން ދަނީ - އެޑިއުކޭޝަން
އެ ސްކޫލްގެ ކަންކަން މިނިސްޓްރީން ވަރަށް ގާތުން މޮނިޓަރ ކުރޭ
އަރަބިއްޔާ ސްކޫލް އިމާރާތުގައި ރެނދުލާފައި
އަރަބިއްޔާ ސްކޫލްގެ އިމާރާތުގެ ހާލަތު ދެނެގަތުމަށް ސްޓްރަކްޗަރަލް އެސެސްމެންޓް ހެދުމުގެ މަސައްކަތް މިހާރު ފަށާފައިވާ ކަމަށް އެޑިއުކޭޝަން މިނިސްޓްރީން ބުނެފިއެވެ.
އެޑިއުކޭޝަން މިނިސްޓަރ ޑރ. އައިޝަތު އަލީ ރާއްޖެއެމްވިއަށް ވިދާޅުވީ، އަރަބިއްޔާ ސްކޫލް އިމާރާތުގެ ރެނދުލައި އިމާރާތަށް ގެއްލުންވަމުންދާކަން މިނިސްޓްރީގެ ސަމާލުކަމަށް އައި ހިސާބުން އެތަނުގެ ހާލަތު ދެނެގަތުމަށް އިންޖިނިއަރުންގެ ޓީމަކާއެކު މަސައްކަތްކޮށް އޮކްޓޫބަރު މަހުގެ ކުރީކޮޅު ރިޕޯޓެއް އެކުލަވާލި ކަމަށެވެ. އެ ރިޕޯޓުގައި އެތަން ވަގުތުން ހުސްކުރަން އިރުޝާދެއް ދީފައި ނެތް ކަމަށާއި، އެ އިމާރާތުގެ ހާލަތު ދެނެގަތުމަށް ސްޓްރަކްޗަރަލް އެސެސްމެންޓެއް ހެދުމަށް އިރުޝާދު ދީފައިވާ ކަމަށެވެ. އެހެންކަމުން ޚާއްސަ އިންޖިނިއަރުންގެ ޓީމަކަަށް މިހާރު އެ މަސައްކަތް ހަވާލުކޮށްފައިވާ ކަމަށެވެ. އެކަމަށް ގާތްގަނޑަކަށް 2 މަސް ނަގާނެ ކަން ފާހަގަކުރައްވައި މިނިސްޓަރ ވިދާޅުވީ، ޑިސެމްބަރުގައި ސްކޫލް ޗުއްޓީއާ ދިމާކޮށް އެ މަސައްކަތް ކުރުމަށް ރާވާފައިވާ ކަމަށެވެ. އެހެންނަމަވެސް ދަރިވަރުން ބަދަލުކުރަން ޖެހޭ ހާލަތެއް އައިސްފި ނަަމަ އެކަންވެސް މިނިސްޓްރީން ކުރިއަށްގެންދާނެކަމަށް ވިދާޅުވިއެވެ. މިއީ އެ ހާލަތު ނޫން ކަމަށެވެ. އެ ސްކޫލްގެ ކަންކަން މިނިސްޓްރީން ވަރަށް ގާތުން މޮނިޓަރ ކުރައްވާކަމަށް ވިދާޅުވިއެވެ.
އަރަބިއްޔާ ސްކޫލްގެ އިމާރާތުގައި ރެނދުލާފައިވާ ފޮޓޯތައް ސޯޝަލް މީޑިއާގައި ދައުރުވަމުން އަންނައިރު، އިމާރާތް ރައްކާތެރި ނޫންކަމަށް ބުނެ ގިނަ ބަޔަކު އަންނަނީ، ކަންބޮޑުވުން ފައުޅު ކުރަމުންނެވެ.
މިނިސްޓަރ ވިދާޅުވީ، މިހާރުން މިހާރަށް ކުރަން ޖެހޭ މަރާމާތްތައް ކުރަމުން ގެންދާނެ ކަމަށާއި، އިމާރާތަކީ ގާތްގަނޑަކަށް 9 އަހަރުވީ އިމާރާތެއް ކަމުން މުޅި އިމާރާތް ތަޅާލުމުގެ ބަދަލުގައި މަރާމާތުކޮށްގެން ބޭނުންކުރެވޭނެ ކަމަށް އިންޖިނިއަރުންގެ ޓީމުން ލަފަ ދީފައިވާ ކަމަށެވެ
