ދިރުވާލައިގެން ރާއްޖެ އެތެރެކުރި 600 ގްރާމަށްވުރެ ގިނަ ރަނާއި މައުދަން ދައުލަތަށް

ދިރުވާލައިގެން ރާއްޖެ އެތެރެކުރި 600 ގްރާމަށްވުރެ ގިނަ ރަނާއި، އެހެނިހެން މައުދަނުގެ މިކްސްޗަރ ދައުލަތަށް ނެގުމަށް ކްރިމިނަލް ކޯޓުން ހުކުމް ކޮށްފިއެވެ.

މި މައްސަަލައަކީ އިންޑިއާގެ ރައްޔިތެއް ކަމަށްވާ އަބްދުލްމަނާފް އަޔަންކޯލީގެ މައްޗަށް އުފުލާފައިވާ ދިވެހިރާއްޖެއަށް ސިއްރުން މުދާ އެތެރެކުރުމުގެ ކުށުގެ ދައުވާއެވެ. އެގޮތުން އޭނާ 26 ސެޕްޓެމްބަރުގައި ރާއްޖެ އައިސްފައިވާއިރު، އޭނާގެ އަމަލުތައް ހުރި ގޮތުން އޭނާގެ ހަށިގަނޑާއި ލަގޭޖް ވަނީ ބަލައި ފާސްކޮށްފައެވެ. އަދި ހަށިގަނޑު ބަލައި ފާސް ކުރުމުގެ ތެރޭގައި ހަށިގަނޑުގައި އެއްޗެހިތަކެއް ފޮރުވާފައި ހުރިކަމަށް ފާހަގަ ކުރެވިގެން ކަސްޓަމްސްގެ ސްޕެޝަލް އޮޕަރޭޝަންސް ސެކްޝަނުން ވަނީ އޭނާ އައިޖީއެމްއެޗަށް ގެންގޮސް ސްކޭން ހަދާފައެވެ. އަދި އޭނާގެ ހަށިގަނޑުގެ ތެރޭގައި އެބާވަތުގެ އެއްޗެހިތަކެއް ހުރިކަން ސްކޭނުން ވަނީ ފާހަގަވެފައެވެ.

މި މައްސަލައިގައި ކްރިމިނަލް ކޯޓުން ނިންމި ނިންމުމުގައި ބުނެފައިވާ ގޮތުން އޭނާ ބޮޑުކަމުދިޔައިރު ފެނިފައިވާ 4 ބުލެޓު ނަގައި އޭގެ ފިޒިކަލް އެގްޒެމިނޭޝަން ހެެދިއިރު އޭގައި ގާތްގަނޑަކަށް 605.8 ގްރާމް ރަން އަދި އެހެނިހެން މާއްދާތައް ހިމެނޭ މިކްސްޗަރ ހުރިކަމަށް ތަހުލީލުން ދައްކާ ކަމަށެވެ.

އޭނާ ވަނީ ދައުވާއަށް އިއުތިރާފުވާ ކަމަށާއި، އޭނާގެ ބައްޕަ ނިޔާވުމާއި ގުޅިގެން ވީހާވެސް އަވަހަށް އަނބުރާ ގައުމަށް ދާން ބޭނުންވާކަމަށް ބުނެފައެވެ. އެއާއެކު 31 އޮކްޓޯބަރުގައި އޭނާއާއި ދައުލަތާއި ދެމެދު ވަނީ އިއުތިރާފު އެއްބަސްވުމެއް އެކުލަވާލާފައެވެ. އެ އެއްބަސްވުން ޝަރީއަތުންވެސް ވަނީ ބަލައިގަނެފައެވެ. އަދި އަވަސްނިޔާގެ އަޑުއެހުމެއް 5 ދުވަހުގެ ތެރޭގައި ބޭއްވުމަށް އޭރު އޮތީ ނިންމާފައެވެ.

މި މައްސަލައަކީ އެކަށީގެންވާ ޝައްކެއް ނެތް މިންވަރަށް ޝަރީއަތަށް ސާބިތުވާ މައްސަލައެއް ކަމަށް ކްރިމިނަލް ކޯޓުން ކުރި ހުކުމުގައި ވަނީ ބުނެފައެވެ. އަދި މި މައްސަލައިގައި ހިމެނޭ ކުށުގެ އަސާސީ އަދަބަކީ 6 މަސް ދުވަހާއި 2 އަހަރު ދުވަހުގެ މުއްދަތަށް ޖަލަށް ލުން ނުވަތަ 10،000 ރުފިޔާއާއި 240،000 ރުފިޔާއާ ދެމެދުގެ އަދަދަކުން ޖޫރިމަނާ ކުރުން ކަމުގައިވީނަމަވެސް، އިއުތިރާފު އެއްބަސްވުމަށް ރިއާޔަތްކޮށް އޭނާ 60،000 ރުފިޔާއިން ޖޫރިމަނާ ކުރުމަށް ވަނީ ނިންމާފައެވެ.

އެ ފައިސާ 18 ނޮވެމްބަރުން ފެށިގެން 5 ދުވަހުގެ ތެރޭގައި މީރާއަށް ދެއްކުމަށާއި، އޭނާ އެތެރެކުރި ރަނާއި އެހެނިހެން މާއްދާތަކުގެ މިކްސްޗަރ ދައުލަތަށް ނެގުމަށްވެސް ޙުކުމުގައި އަންގާފައިވެއެވެ.

ކްރިމިނަލް ކޯޓުގައި މި މައްސަލަ ބެއްލެވީ ގާޒީ ސަފްއަތު ހަބީބެވެ.