ރަށުން ބޭރުގައި ޙާފިޒުކަން ކިޔަވަން ބޭނުންވާ ދަރިވަރުންނަށް އަންނަ އަހަރު ލިވިންގ އެލަވަންސް ހަމަޖައްސައިދެއްވާނެ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

ކީރިތި ޤުރުއާނާބެހޭ ޤައުމީ މަރުކަޒުގެ ދަސްވެނިވުމުގެ ހަފްލާގައި ހޮނިހިރު ދުވަހުގެ ރޭ ވާހަކަ ދައްކަވަމުން ރައީސް ވިދާޅުވީ، އެފަދަ ދަރިވަރުންނަށް މި ޚަރަދުތައް ހަމަޖައްސަވައިދެއްވާނެ ކަމަށެވެ.

ޤުރުއާން ކިޔަވައި ދެއްވާ މުދައްރިސުންނާއި މިސްކިތްތަކުގެ މުދިމުންނާއި އިމާމުންނަކީ ކާބަފައިންގެ ޒަމާނުއްފެށިގެން މުޖުތަމައުގައި މުހިންމު ދައުރެއް އަދާ ކުރައްވަމުން އައި ބަޔެއްކަން ފާހަގަކުރައްވައި ރައީސް ވިދާޅުވީ، އޭރު ރަށު ފެންވަރުގައި ކަންކަން ރާވާ ހިންގާއިރު އެބޭފުޅުންގެ ލަފަޔާއި ބަސް ގަބޫލުކުރާ ކަމަށެވެ.

މުޖުތަމައުގައި ސުލްހައާއި ހަމަޖެހިމުން އޮތް ކަމަށާއި، އޭރު ދިވެހިން އުޅެމުން އައީ އެކަކު އަނެކަކަށް އަޅާލައި، އޯގާތެރިވެ އެހީވާ އެއް އާއިލެއްގެ ގޮތުގައި ކަމަށް ވެސް ރައީސް ވިދާޅުވިއެވެ. އަދި މިއަދު މުޖުތަމައަށް އެ އާދަތައް ބޭނުންވާކަމުގައި ވެސް ވިދާޅުވިއެވެ.

އެ އަޚުލާޤު އެބަ ގެންނަންޖެހޭ ކަމަށާއި، އެކަން ކުރުމަށްޓަކައި، ޤުރުއާން ކިޔަވައި ދެއްވާ މުދައްރިސުންނާއި މިސްކިތްތަކުގެ މުދިމުންނާއި އިމާމުންނަށް ވަރަށް މުހިންމު ދައުރެއް އަދާކުރެއްވޭނެ ކަމަށް ރައީސް ވަނީ ވިދާޅުވެފައެވެ.

ތަޖުވީދު މަގުން ޤުރުއާން ކިޔަވަން ދަސްކޮށް، ހިތުދަސްކޮށްދިނުމަކީ ވަރަށް މުހިންމު ކަމެއް ކަމަށާއި ރީތި ރާގަކަށް ޤުރުއާން ކިޔަވާ އަޑު އެހުމަކީ މީހުންގެ ހިތްތަކަށް ހަމަޖެހުން ލިބޭނެކަމެއް ކަމަށް ވެސް ރައީސް ވިދާޅުވިއެވެ.

މީގެ އިތުރުން ރައީސް ވަނީ ޢަމަލީ ދިރިއުޅުމުގައި ކީރިތި ޤުރުއާން ތަންފީޒު ކުރަން ދަސްކުރަން ޖެހޭކަމަށް ވިދާޅުވެފައެވެ.

ކީރިތި ޤުރުއާނުގެ ޢިލްމަކީ ވަރަށް ތަނަވަސް ދާއިރާއަކަށް ފެތުރިފައިވާ ޢިލްމެއް ނަމަވެސް، އެ ޢިލްމުގެ ބޭނުން ހިފޭތަން ނުފެންނަ ކަމަށް ރައީސް ވިދާޅުވިއެވެ. ސިކުނޑިތައް މުއްސަނދި ވެގެންދާނީ ކީރިތި ޤުރުއާނުގެ ޢިލްމީ ދިރާސާތައް ކޮށްގެން ކަމަށް ރައީސް ވިދާޅުވިއެވެ.

ކީރިތި ޤުރުއާނާބެހޭ މަރުކަޒުގެ ދައުރު ފުޅާވާން ޖެހޭކަން ފާހަގަކުރައްވައި ރައީސް ވިދާޅުވީ، އެ މަރުކަޒުގެ ހަގީގީ ފައިދާ ލިބޭނީ ކީރިތި ޤުރުއާނުގެ ޢިލްމީ ދިރާސާތައް ކޮށްގެން ކަމަށެވެ. މި ސަރުކާރުން ދީނީ ޢިލްމު ރާއްޖޭގައި ފެތުރުމަށް އެހީތެރިކަން ފޯރުކޮށްދެއްވާނެ ކަމަށް ރައީސް ވިދާޅުވިއެވެ.

ޤުރުއާން ކިޔަވައިދެއްވާ ޓީޗަރުންގެ އަޚުލާޤު ހުންނަން ވާނީ ކީރިތި ޤުރުއާނުގެ އަހްލާޤީ އިމުގެ ތެރެއިން ކަމަށް ވެސް ރައީސް ވިދާޅުވިއެވެ.