ކުޑަކުދިންގެ ރައްކާތެރިކަމަށް އަޅުގަނޑުމެން މިއަދު ޚާއްސަ ސަމާލުކަމެއް ދޭންޖެހޭ - ނައިބު ރައީސް
20 ނޮވެމްބަރު 2021 | ހޮނިހިރު 14:17ރަނގަޅު ދަރިއެއް އުފެއްދޭނީ އެންމެން ގުޅިގެން ކުރެވޭ މަސައްކަތުން
ނައިބު ރައީސް، ކުޅުދުއްފުށީ ރީޖަނަލް ހޮސްޕިޓަލްގެ "އުފަންވެނި" ހުޅުވުމުގެ ރަސްމިއްޔާތުގައި ވާހަކަ ދައްކަވަނީ
ކުޑަކުދިންގެ ރައްކާތެރިކަމަށް މިއަދު އަޅުގަނޑުމެން ޚާއްސަ ސަމާލުކަމެއް ދޭންޖެހޭކަމަށް ނައިބު ރައީސް ފައިސަލް ނަސީމް ވިދާޅުވެއްޖެއެވެ.
ނައިބުރައީސް މިހެން ވިދާޅުވީ، ކުޅުދުއްފުށީ ރީޖަނަލް ހޮސްޕިޓަލްގައި މިއަދު ބޭއްވި، ދަރިމައިވުމުގެ ސިއްހަތާބެހޭ މަރުކަޒު "އުފަންވެނި" ރަސްމީކޮށް ހުޅުއްވައިދެއްވުމަށްފަހު ވާހަކަ ދައްކަވަމުންނެވެ. ނައިބު ރައީސް ވިދާޅުވީ މިއަދު އަޅުގަނޑު މެންނަށް ފެންނަނީ އިއްޔެ ފެނުން މަންޒަރެއް ނޫންކަމަށާއި އޮއިވަރު މިވަނީ ބަދަލުވެފައިކަމަށެވެ. މިފަދަ ގޮތަކަށް ހިނގަމުންދާ ދުނިޔެއެއްގައި އަޅުގަނޑުމެންގެ ދަރިންގެ ރައްކާތެރިކަމަށާއި ސަލާމަތަށް އެންމެން މަސައްކަތް ކުރަންޖެހޭކަމަށެވެ. ދަރިފުޅުގެ މައިންބަފައިން ދޭ ލޯތްބާއި އޯގާތެރިކަމުން އެކަނި މިއަދު ރަނގަޅު ދަރިއެއް ނުއުފެއްދޭނެކަމަށާއި، މިކަން ކުރަންޖެހޭނީ ހޮސްޕިޓަލްތަކާއި ކައުންސިލްތަކާއި އަދި އެހެނިހެން މުއައްސަސާތައް ގުޅިގެންކަމަށް ނައިބު ރައީސް ވިދާޅުވިއެވެ.
ނައިބުރައީސް ވިދާޅުވީ ވަކި މީހަކަށް ވީތީ އެއްވެސް ކަމެއްގައި ތަފާތުކުރުން އޮވެގެން ނުވާނެކަމަށެވެ. އަޅުގަނޑުމެންގެ ރައްޔިތުންނަކީ އުފާވެރި އަދި ހިތްހަމަޖެހިގެން ތިބޭ ބަޔަކަށް ހެދުމަށް އެންމެން ގުޅިގެން މަސައްކަތް ކުރަން ޖެހޭކަމަށް ނައިބު ރައީސް ވިދާޅުވިއެވެ.
މީގެއިތުރުން ރާއްޖޭގެ ސިއްހީ ދާއިރާއާއި ސްކޫލްތަކާއި ރަށްރަށުގެ ބަނދަރުތަކުގެ އިރުރުން، ރާއްޖޭގައި މިސަރުކާރުން ކުރިއަށްގެންދާ ތަރައްގީގެ މަސްރޫއުތަކަށް އަލި އަޅުވާލައްވައި ވާހަކަ ދައްކަވަމުން ނައިބު ރައީސް ވިދާޅުވީ، ކޯވިޑްގެ ދަތި ދުވަސްތަކުގައިވެސް ރާއްޖޭގެ އުތުރުން ހއ. ތުރާކުނުން ފެށިގެން އައްޑޫއާއި ހަމަޔަށް ހުއްޓުމެއްނެތި ތަރައްގީގެ މަސައްކަތްތައް ކުރިއަށް ދިޔަކަމީ މިސަރުކާރުން ތަރައްގީއަށް ދެއްވާ އަހަންމިއްޔަތު ހާމަވެގެންދާ ކަމެއްކަމަށެވެ. އަދި މިހާރުވެސް އުތުރުން ދެކުނަށް ނަޒަރު ހިންގާލާއިރު ތަރައްގީގެ މަޝްރޫއެއް ކުރިއަށް ނުދާ އެއްވެސް ރަށެއް ނުފެންނަކަމުގައި ނައިބު ރައީސް ވިދާޅުވިއެވެ.
މީގެއިތުރުން ނައިބު ރައީސް ވިދާޅުވީ، މަރުކަޒީ އުސޫލް މިވަނީ ނައްތާލެވިފައި ކަމަށާއި، ކައުންސިލް ތަކުން ކުރަން ބޭނުންވާ ކަންކަން ކުރުމުގެ ބާރާއި އިޚްތިޔާރު، ކައުންސިލްތަކަށް ލިބިގެންވާކަމަށެވެ. އަދި ކައުންސިލުން ކަމެއް ކުރުމަށް ދުރުގައި ތިބި ބަޔަކަށް މިހާރު ސަލާން ޖަހަން ނުޖެހޭނެ ކަމަށްވެސް ނައިބު ރައީސް ވިދާޅުވިއެވެ.
ނައިބު ރައީސްގެ ވާހަކަ ނިންމަވާލައްވަމުން ދަތި ހާލަތުގައިވެސް ރައްޔިތުންނަށް ޚިދުމަތް ދިނުމުގައި، ފޫހިކަމެއް ވަރުބަލި ކަމެއް ނެތި ޚިދުމަތްކޮށްދެއްވި ސިއްހީ ދާއިރާގެ ބޭފުޅުންނަށް ޝުކުރު އަދާކުރެއްވިއެވެ.
