ހޮނިހިރު ދުވަހަކީ ކުޅުދުއްފުއްޓަށް ވިޔަފާރި ކުރަން ގިނަ އަދަދެއްގެ ދަތުރުވެރިން އަރާ ދުވަހެކެވެ. ހޮސްޕިޓަލުގެ ޚިދުމަތާއި ވިޔަފާރީގެ އެކިއެކި ބޭނުންތަކަށް އެތައް ސަތޭކަ ބަޔަކު ކުޅުދުއްފުއްޓަށް އަރާ ދުވަހަކަށް ހޮނިހިރު ދުވަސް ވެއެވެ. އެދުވަސް އެންމެ ބޮޑަށް ޚާއްސަވާ އެއްސަބަބަކީ، ސަރަހައްދުގެ ރަށްތަކުގެ ދަނޑުވެރިން ތަފާތު ބާވަތްތަކުގެ ތަކެތި ވިއްކުމަށް ބާއްވާ ބާޒާރުގެ ސަބަބުންނެވެ. މިކަމަށް ބޭނުން ކުރަން ފެށުނީ ހޮސްޕިޓަލުގެ އުތުރުން، އަދި ވަނި އިމާރާތުގެ ދެކުނުން އޮންނަ ހިތްފަސޭހަ ސަރަހައްދެވެ.

ހޮނިހިރު ދުވަހު ދަނޑުވެރިން އެތަނުގައި ވިއްކާތަކެތި ކުޅުދުއްފުށީ އާއްމު ރައްޔިތުންގެ އިތުރުން ވިޔަފާރި ވެރިންވެސް ގަނެއެވެ. އަދި އެ ބާޒާރު ވެގެން ގޮސްފައިވަނީ ސަރަހައްދުގެ ގިނަ ބަޔަކު އެއްތަނަކުން ބައްދަލުވެ ސަލާންގަލާންކުރާ މަޖިލީހަކަށެވެ. އިޖްތިމާއީ ގުޅުންތައް އާލާވާ ހޮޅުއައްޓަކަށެވެ. އެގޮތުން "ހޮނިހިރު ބާޒާރޭ" ބުނެފިނަމަ ކުޅުދުއްފުށީގެ މަތިން އެންމެންވެސް ހަނދާންވާނެއެވެ.

ކުޅުދުއްފުށީ ހޮނިހިރު ބާޒާރުގެ ވާހަކަ މިހާރު ވަނީ ބޮޑުތިލަދުންމަތިން ނުކުމެ ރާއްޖޭގެ އެކިހިސާބުތަކުގައި ދެކެވޭ ވާހަކައަކަށް ވެފަ އެވެ. މާލެއިން ނުވަތަ ރާއްޖޭގެ އެހެން ހިސާބަކުން ކުޅުދުއްފުއްޓަށް އަލަށް އަންނަ ފަރާތްތަކަށް ހޮނިހިރު ބާޒާރު ވަނީ ވަރަށް ޝައުގުވެރިކުރުވާ ކަމަކަށެވެ. މިއީ މިގޮތަށް ރާއްޖޭގެ ރަށެއްގައި އޮންނަ މިފަދަ އެންމެ ބޮޑު މާރުކޭޓެވެ. މިތަނަށް ޒިޔާރަތްކޮށްފައިވާ އެކިފަންތީގެ މީހުން ހޮނިހިރު ބާޒާރުގެ ވާހަކަ ވަނީ ވަރަށް ޝައުގުވެރިކަމާއެކު ދައްކާފައެވެ. ރާއްޖޭގެ ބޮޑެތި ކުންފުނިތަކުންނާއި މުއައްސަސާތަކުން ވެސް ހޮނިހިރު ބާޒާރުގެ ބޭނުން ހިފައެވެ. ތަފާތު މައުލޫމާތު ދޭ ރޯޑްޝޯވ ތަކާއި ޕްރޮމޯޝަންތައް އެތަނުގައި ވަނީ ހިންގާފައެވެ. އެކަމުގެ ސަބަބުން ދޭން ބޭނުންވާ މައުލޫމާތު ގިނަ ބަޔަކަށް އެއްތަނަކުން ފޯރުކޮށްދިނުމުގެ އިތުރުން، ރައްޔިތުން ބޭނުންވާ ގިނަ މައުލޫމާތުތަކެއް ފަސޭހައިން ލިބުމަށް އެހީތެރިވެދެއެވެ.

އެހެންނަމަވެސް އެތަނުގައި މީހުން އެއްޗެހި ވިއްކަން ތިބުމަށް ޚާއްސަ މާރުކޭޓެއް ހެދިފައެއް ނުހުރެއެވެ. ވާރޭވެހޭނަމަ މިކަމުގެ ސަބަބުން އުނދަގޫތަކާ ކުރިމަތިވެއެވެ. އަދި ކުޅުދުއްފުއްޓަށް ޚާއްސަ ހޮނިހިރު ބާޒާރު ތަރައްގީކުރަން ޖެހިފައިވާކަމަށް އެންމެންވެސް ގަބޫލުކުރެއެވެ.

ކުޅުދުއްފުށީގެ މަޝްހޫރު ހޮނިހިރު ބާޒާރުގެ އަސްލު ނުގެއްލޭނެހެން ޒަމާނީ ގޮތަކަށް އެތަން ތަރައްގީކުރުމަށް ނިންމާފައިވާކަމަށް ކުޅުދުއްފުށީ ޑެޕިއުޓީ މޭޔަރު އަލީ އަހުމަދު މިވަނީ ވިދާޅުވެފައެވެ.

ގެވެށި އަންހެނުންނާއި އަންހެން ވިޔަފާރިވެރިންގެ ދުވަސް ފާހަގަކުރުމުގެ ގޮތުން ކުރިއަށްގެންދިޔަ "ހިޔަލަ އެކްސްޕޯ" ހުޅުވުމުގެ ގޮތުން އިއްޔެ ހަވީރު އަމީރު އަމީން ސްކޫލުގައި ބޭއްވި ރަސްމިއްޔާތު ޝަރަފްވެރިކޮށްދެއްވައި ވާހަކަދައްކަވަމުން ޑެޕިއުޓީ މޭޔަރު އަލީ އަހުމަދު ވިދާޅުވީ، ގިނަ ބަޔަކު އެއްވެ ތަކެތި ވިއްކަމުންދާ ހޮނިހިރު ބާޒާރަކީ މި ޒަމާނަށް ބަލާއިރު އެންމެ ފުރިހަމަ ވަސީލަތްތަކާއެކީގައި ކުރިއަށްދާ ބާޒާރެއް ނޫން ކަމަށެވެ.

އެގޮތުން ޑެޕިއުޓީ މޭޔަރ ވިދާޅުވީ އުންމީދަކީ ޒަމާނީ ވަސީލަތްތަކާއެކީގައި ގަނެވިއްކުމުގެ ކަންތައްތައް ފަސޭހަ ނިޒާމެއްގެ ތެރެއިން، ހޮނިހިރު ބާޒާރުގެ އަސްލު ނުގެއްލޭނެ ފަދައިން އެތަން އިތުރަށް ތަރައްގީވެގެން ދިޔުންކަމަށެވެ. އެގޮތުން އެފަދަ ހޮނިހިރު ބާޒާރެއް އަންނަ 2022 ވަނަ އަހަރު ތަރައްގީކުރުމަށް ހަމަަޖެހިފައިވާކަމަށެވެ.

ކުޅުދުއްފުށީގައި އެއާޕޯޓް އަޅައި ލޯކަލް ޓޫރިޒަމަށް ފުރުސަތު ހުޅުވި ނުވަތަ ރާއްޖޭގެ އެހެން ހިސާބުތަކަށް ކުޅުދުއްފުށީގެ ޚާއްސަކަން ވިއްކުމުގެ ފުރުސަތު ހުޅުވިފައިވާ މިދަނޑިވަޅުގައި، ހޮނިހިރު ބާޒާރު މިހާރަށްވުރެ ފުރިހަމަ ތަނެއްގެ ގޮތުގައި ތަރައްގީ ކުރެވިގެން ދިއުމަކީ، ކުޅުދުއްފުއްޓަށް އެއިން ސީދާ ގޮތުންނާއި ނުސީދާ ގޮތުން ފައިދާ ތަކެއް ލިބޭނެ ކަމެކެވެ.