ސެޓެލައިޓް ސްކޫލްތައް އަންނަ ޖެނުއަރީ މަހު ހުޅުވުމަށް މިނިސްޓްރީން ތައްޔާރުވަނީ
ދަރިވަރުން ބޭނުންކުރަމުން ގެންދާނީ އެކުއްޖަކު މިހާރު ކިޔަވަމުންދާ ސްކޫލެއްގެ ޔުނިފޯމް
ވ. ތިނަދޫ ސެޓެލައިޓް ސްކޫލްގެ މަސައްކަތް އެޑިއުކޭޝަން މިނިސްޓަރ ބައްލަވާ ލައްވަނީ
ބ. ފެހެންދޫ، ވ.ރަކީދޫ އަދި ވ. ތިނަދޫގައި ސަރުކާރުން ގާއިމުކުރާ ސެޓެލައިޓް ސްކޫލްތައް އަންނަ ޖެނުއަރީ މަސް ތެރޭގައި ހުޅުވުމަށް ތައްޔާރުވަމުންދާކަމަށް އެޑިއުކޭޝަން މިނިސްޓްރީން ބުނެފިއެވެ.
އެޑިއުކޭޝަން މިނިސްޓްރީގެ ޕާމަނަންޓް ސެކެޓަރީ (ޕީއެސް) އަހުމަދު އަލީ ރާއްޖެއެމްވީއަށް ވިދާޅުވީ، ޖެނުއަރީ މަހު ދެވަނަ ޓާމުގެ ކިޔެވުން ފެށޭއިރު ސެޓެލައިޓް ސުކޫލުތަކުގެ ކިޔެވުންވެސް ފެށުމަށް މިނިސްޓްރީން މަސައްކަތް ކުރަމުންދާ ކަމަށެވެ. އަދި އެކަމާ ގުޅޭ ތައްޔާރީތައް ވަމުންދާކަމަށް ޕީއެސް ވިދާޅުވިއެވެ.
އެ ސްކޫލުތަކުގައި ކިޔަވަން ބޭނުންވާ ދަރިވަރުން ބޭނުންކުރަމުން ގެންދާނީ އެކުއްޖަކު މިހާރު ކިޔަވަމުންދާ ސްކޫލެއްގެ ޔުނިފޯމްކަމަށް އެޑިއުކޭޝަނުން މީގެ ކުރިން ވަނީ ބުނެފައެވެ.
ސެޓެލައިޓް ސްކޫލުތަކުގައި ކިޔަވައި ދިނުމަށްޓަކައި ކޮންމެ ރަށެއްގައި ކުދިން ހާޒިރުވެގެން ކިޔަވާނެ އިމާރާތަކާއި ކޮންމެ ގްރޭޑަކަށް ކިޔަވައިދޭނެ މުދައްރިސުން ތިބޭއިރު، ކޮންމެ ދަރިވަރަކަށް ވެސް ބޭނުންވާނެ އިންޓަނެޓާއި ކޮމްޕިއުޓަރުގެ ވަސީލަތްތައް އެޑިއުކޭޝަން މިނިސްޓްރީން ހަމަޖައްސައިދޭނެ އެވެ.
އެޑިއުކޭޝަން މިނިސްޓްރީން ވ. ރަކީދޫ އަދި ވ. ތިނަދޫ ސެޓެލައިޓް ސްކޫލް އިމާރާތްކުރުމަށް އެސްބްރޯ މޯލްޑިވްސް ޕްރައިވެޓް ލިމިޓެޑާ ހަވާލުކޮށްފައިވާއިރު، ބ. ފެހެންދޫ ސެޓެލައިޓް ސްކޫލް އިމާރާތް ކުރުމަށް ހަވާލުކޮށްފައިވަނީ ކޭޑީ އެންޓަޕްރައިޒަސްއާއެވެ. މި މަސައްކަތް ހަވާލުކޮށްފައިވަނީ 2،892،480.66 (ދެމިލިއަން އަށްލައްކަ ނުވަދިހަދެހާސް ހަތަރުސަތޭކަ އަށްޑިހަ ރުފިޔާ ފަސްދޮޅަސް ހަ ލާރި) އަށެވެ. އަދި ވ. ތިނަދޫ ސެޓެލައިޓް ސްކޫލްގެ މަސައްކަތް ހަވާލުކޮށްފައިވަނީ 1،340،681.81 (އެއްމިލިއަން ތިންލައްކަ ސާޅީސްހާސް ހަސަތޭކަ އަށްޑިހަ އެއް ރުފިޔާ އަށްޑިހަ އެއް ލާރި) އަށެވެ.
"ސެޓެލައިޓް ސްކޫލް" ގާއިމުކުރަނީ ސްކޫލް ނެތް ރަށްރަށާއި ކުދިން ހަމަނުވުމުގެ ސަބަބުން ސްކޫލް ނެތް ރަށްރަށާއި، ކުދިން ހަމަނުވުމުގެ ސަބަބުން ސްކޫލް ނުހިންގޭ ރަށްރަށުގައެވެ.
ސެޓެލައިޓް ސުކޫލު ޤާއިމު ކުރެވުމުން އެ ތިން ރަށުގެ ދަރިވަރުން، ކިޔެވުމަށްޓަކައި ފެރީއެއްގައި އެހެން ރަށަކަށް ދިޔުމަށް އުފުލަންޖެހޭ ބުރަ ފިލައިގެންދާނެ ކަމަށާއި، އަދި އެ ތިން ރަށުގެ ދަރިވަރުންނަށް ކިޔަވައިދޭނީ، މާލޭގެ ހުރަވީ ސްކޫލްގައި ގާއިމުކޮށްފައި ހުންނަ ސެޓެލައިޓް ހަބްގައި ތިއްބަވާ ޓީޗަރުންކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިޙުވެސް ވަނީ ވިދާޅުވެފައެވެ.
މިފަދަ މުހިންމު ބަދަލުތައް ތައުލީމީ ދާއިރާއަށް ގެނައުމުގެ ބޭނުމަކީ، ގައުމު ތަރައްގީ ކުރާނެ މީހުން ބިނާކުރުއްވުން ކަމަށް ރައީސް ވިދާޅުވިއެވެ. އަދި ގައުމު ތަރައްގީ ކުރާނެ ގޮތުގެ ވިސްނުން ސިކުނޑީގައި އުފެއްދޭފަދަ، އިލްމީ އަދި ޖިސްމާނީ ގާބިލްކަން ދަރިންނަށް ހޯދައިދެއްވުން ކަމަށް ވިދާޅުވިއެވެ.
