އިގްތިސާދީ ތަރައްގީގައި ގެވެށި މަސައްކަތްތެރިން މުހިންމު ދައުރެއް އަދާކުރޭ - ޑެޕިއުޓީ މޭޔަރ
19 ނޮވެމްބަރު 2021 | ހުކުރު 10:41އަންހެން ވިޔަފާރި ވެރިންގެ ދުވަހުގެ ގޮތުގައި ފާހަގަކުރާ ދުވަހަކީ ނޮވެމްބަރު މަހުގެ 19 ވަނަދުވަސް
ކުޅުދުއްފުށީ ސިޓީގެ ޑެޕިއުޓީ މޭޔަރ އަލީ އަހުމަދު "ހިޔަލަ" އެކްސްޕޯ ހުޅުވާ ދެއްވަނީ
އިގްތިސާދީ ތަރައްގީގައި ގެވެށި މަސައްކަތްތެރިން މުހިންމު ދައުރެއް އަދާކުރާކަމުގައި ކުޅުދުއްފުށި ސިޓީގެ ޑެޕިއުޓީ މޭޔަރ އަލީ އަހުމަދު ވިދާޅުވެއްޖެއެވެ.
ޑެޕިއުޓީ މޭޔަރ މިހެން ވިދާޅުވީ ބައިނަލްއަގްވާމީ ގޭބިސީ ތަކުގައި މަސައްކަތްކުރާ މީހުންގެ ދުވަހާއި، އަންހެން ވިޔަފާރި ވެރިންގެ ދުވަސް ފާހަގަ ކުރުމަށް "ހިޔަލަ" ގެ ނަމުގައި, ބާއްވާ މައުރަޒު ހުޅުވުމުގެ ރަސްމިއްޔާތު ޝަރަފްވެރިކޮށްދެއްވާ ވާހަކަ ދައްކަވަމުންނެވެ.
ޑެޕިއުޓީ މޭޔަރ ވިދާޅުވީ މި ޕްރޮގްރާމްގައި މަދުބަޔަކު ބައިވެރި ވީނަމަވެސް ކުޅުދުއްފުއްޓަކީ ގިނަ އަދަދެއްގެ އަންހެން ވިޔަފާރި ވެރިންނާއި، ގެވެށި މަސައްކަތް ކުރާ ގިނަބަޔަކު އުޅޭ ރަށެއް ކަމަށެވެ. އަދި މިފަދަ މަސައްކަތްތައް ކުރުމަށާއި މި މަސައްކަތްތައް ދިރުވާ އާލާކުރުމުގައި މިހާރަށްވުރެ ބޮޑަށް ޒުވާނުންގެ ދައުރު އިތުރުކުރަން ޖެހޭކަމަށެވެ. އަދި ގެވެށި މަސައްކަތްތެރިންނަށް އިތުރު މާކެޓް ހޯދަދިނުމަކީ ސިޓީ ކައުންސިލްގެ ބޮޑު އަމާޒެއްކަމުގައި ވިދާޅުވިއެވެ.
މިރަސްމިއްޔާތުގައި "ހިޔަލަ" ޕްރޮގްރާމްގެ ދަށުން މިމަހުގެ 17،18 މި ދެދުވަހު ކުރިއަށްގެންދިޔަ މައުލޫމާތު ދިނުމުގެ މަސައްކަތު ބައްދަލުވުމުގެ ބައިވެރިންނަށާއި "ހިޔަލަ" މައުރަޒުގައި ބައިވެރިވި ފަރާތްތަކަށް ވަނީ ހަނދާނީ ލިއުން ހަވާލުކޮށްދެއްވާފައެވެ.
"ހިޔަލަ" މަސައްކަތު ބައްދަލުވުމުގައި އޮތެންޓިކް މޯލްޑިވްސް ފިހާރައިގައި ތަކެތި ވިއްކާނެ ގޮތާއި، ކާބޯތަކެތި ތައްޔާރުކުރުމުގައި ސިއްހީ ގޮތުން ސަމާލުކަން ދޭންވީ ކަންތައްތަކާއި، ވިޔަފާރީގެ ހިސާބު ބަލަހައްޓާނެ ގޮތުގެ އިތުރުން ވިޔަފާރި ފުޅާކުރުމަށް އިތުރު ފައިސާހޯދޭނެ ގޮތްތަކާބެހޭ މައުލޫމާތު ވަނީ ދީފައެވެ. މި މަސައްކަތު ބައްދަލުވުމުގައި މައުލޫމާތު ދެއްވީ ކުޅުދުއްފުށީ ބިޒްނަސް ސެންޓަރާއި، ބީއެމްއެލް، އާއި ދާއިރާއާ ގުޅުންހުރި ބައެއް ފަރާތްތަކުންނެވެ.
ބިޒްނަސް ސެންޓަރުން މައުލޫމާތު ދޭގޮތުގައި މި ޕްރޮގްރާމްގެ މަގްސަދަކީ ގޭބިސީތަކުގައި ތިބެގެން އާމްދަނީ ހޯދަން މަސައްކަތް ކުރާ ފަރާތްތަކަށާއި ވިޔަފާރި ކުރާ އަންހެން ބޭފުޅުންނަށް ދެމެހެއްޓެނިވި ގޮތެއްގައި ވިޔަފާރި ކުރުމާއި ވިޔަފާރި އިތުރަށް ފުޅާކުރުމަށް އެފަރާތްތައް ހޭލުންތެރިކުރުވުމާއި، އެކަމަށް ހުރި ފުރުސަތުތަކާބެހޭ މައުލޫމާތު ފޯރުކޮށްދިނުމެވެ. އަދި އަންނަ އަހަރުވެސް މި ޕްރޮގްރާމް ކުރިއަށް ގެންދިއުމަށް ހަމަޖެހިފައިވާ ކަމަށް އެފަރާތުން މައުލޫމާތު ދެއްވައެވެ.
ބައިނަލްއަގުވާމީ ގޭބިސީތަކުގައި މަސައްކަތްކުރާ މީހުންގެ ދުވަހުގެ ގޮތުގައި ފާހަގަކުރާ ދުވަހަކީ އޮކްޓޯބަރ މަހުގެ 20 ވަނަ ދުވަހެވެ. އަދި އަންހެން ވިޔަފާރި ވެރިންގެ ދުވަހުގެ ގޮތުގައި ފާހަގަކުރާ ދުވަހަކީ ނޮވެމްބަރު މަހުގެ 19 ވަނަދުވަހެވެ.
