ނައިބު ރައީސް މާދަމާ ތިލަދުންމައްޗަށް ވަޑައިގަންނަވަނީ
18 ނޮވެމްބަރު 2021 | ބުރާސްފަތި 15:22މިދަތުރުފުޅުގައި ތިލަދުންމަތީގެ 4 ރަށަކަށް ނައިބު ރައީސް ވަޑައިގަންނަވާނެ
ނައިބު ރައީސް ފައިސަލް ނަސީމް
ރައީސުލް ޖުމްހޫރިއްޔާގެ ނައިބު ފައިސަލް ނަސީމް ދެ ދުވަހަށް ކުރައްވާ ދަތުރުފުޅެއްގައި މާދަމާ ތިލަދުންމައްޗަށް ވަޑައިގަންނަވާގޮތަށް ހަމަޖެހިއްޖެ އެވެ. ރައީސް އޮފީހުން ބުނީ މި ދަތުރުފުޅުގައި ތިލަދުންމަތީގެ ހަތަރު ރަށަކަށް ނައިބު ރައީސް ވަޑައިގަންނަވާނެ ކަމަށެވެ.
އެގޮތުން ވަޑައިގަތުމަށް ހަމަޖެހިފައިވަނީ ހޯރަފުށި، ނެއްލައިދޫ، ވައިކަރަދޫ އަދި ކުޅުދުއްފުށި ސިޓީއަށެވެ. މި ދަތުރުފުޅުގައި އެމަނިކުފާނު ހޯރަފުށީ މަގުހެދުމުގެ މަޝްރޫއު ފައްޓަވައިދެއްވާނެ އެވެ. އަދި އެރަށު އެއާޕޯޓަށް 1 އަހަރު ފުރުން ފާހަގަކުރުމަށް ބާއްވާ ރަސްމިއްޔާތުގައިވެސް އެ މަނިކުފާނު ބައިވެރިވެވަޑައިގަންނަވާނެ އެވެ.
އެމަނިކުފާނުގެ މި ދަތުރުފުޅުގައި ކުޅުދުއްފުއްޓަށް ވަޑައިގަތުމަށް ހަމަޖެހިފައިވަނީ ހޮނިހިރުދުވަހު 13:30ގައެވެ. ކުޅުދުއްފުއްޓަށް ވަޑައިގެން އެމަނިކުފާނު ރީޖަނަލް ހޮސްޕިޓަލްގެ "އުފަންވެނި" ހުޅުވައިދެއްވާނެ އެވެ. އަދި ސިޓީ ކައުންސިލާއި އަންހެނުންގެ ކޮމެޓީ އަދި ސްކޫލުތަކުގެ ވެރިންނާ ބައްދަލުކުރައްވާނެއެވެ.
