ރޯނުވެށުމުގެ މަސައްކަތްކުރާ ކަނބަލުންގެ އުންމީދުއާވެއްޖެ

ކުޅުދުއްފުއްޓަކީ ރާއްޖޭގައި ރޯނުވެށުމަށް އެންމެ މަޝްހޫރު މީހުން އުޅޭ ރަށެވެ. އަދި ރާއްޖޭގައި އެންމެ ގިނައިން ރޯނުވަށާ އަންހެނުންވެސް އުޅެނީ ކުޅުދުއްފުށީގައެވެ. ޒަމާނުންސުރެވެސް މިކަންއޮތީ މިގޮތަށެވެ.

ތަރައްގީގެ ބައެއް ޕްރޮޖެކްޓްތައް ހިންގުމަށާއި ރަށުތެރެ ސާފުކޮށް ބެހެއްޓުމަށް ކުޅުދުއްފުށީގެ ބައެއް ސަރަހައްދުތަކުގައި ހުރި ބޮނބި އޮޅުތައް ނަގަން އެންގުމުން، ރޯނު ވެށުމުގެ މަސައްކަތް އުވިދާނެކަމުގެ ބިރު ހީވިއެވެ. އަދި އެކަންވީ ޒަމާނުންސުރެ އެ މަސައްކަތުން އާމްދަނީ ހޯދުމަށް މަސައްކަތްކުރާ އަންހެންވެރިންގެ ބޮޑު ކަންބޮޑުވުމަކަށެވެ.

ޒަމާނުންސުރެ ކުޅުދުއްފުށީގައި ރޯނުވެށުމުގެ މަސައްކަތް ކުރަމުންއަންނަނީ ރަށުގެ ވަލުތެރޭގަޔާއި ކުޅީގައި އޮޅުކޮނެ އޮޅަށް ބޮނބިއަޅައި ފާކޮށްގެންނެވެ. އެހެންނަމަވެސް ދާދިފަހުން ސިޓީކައުންސިލުންވަނީ، ބައެއް ސަރަހައްދުތަކުގައި ހުރި މިފަދަ އޮޅުތައް 21 ދުވަސްތެރޭ ހުސްކުރުމަށް އަންގާފައެވެ. މިކަމާގުޅިގެން މިމަސައްކަތްކުރާ އެތައްބަޔަކު ކައުންސިލަށް ޝަކުވާ ހުޅަހަޅަންފެށިއެވެ. އެހެންކަމާއެކު ސިޓީ ކައުންސިލުން ނިންމީ ބޮނބި އޮޅުތަކުގެ ވެރިންނާ ބައްދަލުކޮށް އެ މީހުންގެ ޚިޔާލާއި މަޝްވަރާ ހޯދައިގެން މަސައްކަތް ކުރިއަށްގެންދިޔުމަށެވެ.

އެގޮތުން ރޭ ކުޅުދުއްފުށީ ސިޓީކައުންސިލްގައި ބޭއްވި ބައްދަލުވުމުގައި މިމަސައްކަތްކުރާ 90އަށްވުރެ ގިނަ އަންހެނުންބައިވެރިވެ، އެމީހުންގެ ކަންބޮޑުވުންތައްވަނީ ހިއްސާކޮށްފައެވެ. އެ މީހުންގެ އެންމެ ބޮޑު ކަންބޮޑުވުމަށްވީ އެ މަސައްކަތް ކުރާނެ ތަނެއް ނުދައްކައި އޮޅުތައް ނަގަން އެންގުމުންނެވެ. އަދި އޮޅުތައް ނަގަން ދިން މުއްދަތު ކުޑަވުމަކީވެސް ނުތަނަސްވުމެކެވެ. އެހެންނަމަވެސް މި ބައްދަލުވުމުގައި މޭޔަރު އާތިފު ދެއްވީ އުންމީދީ ޖަވާބެކެވެ. ވިދާޅުވީ އަންހެންވެރިން ކުރަމުންދާ މި މަސައްކަތް ހުއްޓުމަށް ބޭނުންނުވާ ކަމަށާއި، މި މަސައްކަތަށް ޒުވާން ކުދިން ނެރެން ބޭނުންފުޅުވާ ކަމަށެވެ. އަދި ބޮނބިއަޅާ ސަރަހައްދެއް އުތުރުކޮޅު ކުޅިން ޚާއްސަކުރައްވާނެކަމަށެވެ. މީގެ އިތުރުން ދެކުނުކޮޅު މާފަލު ފެންގަނޑުގައިވެސް، ޖާގަ އޮތް މިންވަރަކުން އޮޅު ހެދޭނެކަމަށެވެ. އަދި މީގެއިތުރުން މޭޔަރު ވިދާޅުވީ، އޮޅުތައް ނެގުމަށް ކުރު މުއްދަތެއް ދޭން ޖެހުނީ ވެލިއެޅުމަށް ބޭނުންކުރާ، އެމްޓީސީސީ އާއި ވެމްކޯގެ ވެހިކަލްތައް ގިނަ ދުވަހަށް ލިބެން ނެތުމުން ކަމަށެވެ. އެކަމަކު އޮޅުތައް ހުސްކުރަން އިތުރު ވަގުތު ބޭނުންވާ ނަމަ އެކަމަށް އެދުމުން ވަގުތު ދޭނެކަމަށް މޭޔަރު ވިދާޅުވި އެވެ.

މި ބައްދަލުވުމުގައި މޭޔަރު ވަނީ، މި މަސައްކަތަށް ޒުވާނުން ނެރުމަށް ކުރެވިދާނެ ކަންކަމާމެދުވެސް މަޝްވަރާކޮށް ޚިޔާލު ބަދަލުކުރައްވާފައެވެ. މި ބައްދަލުވުމުގައި ޚިޔާލު ފާޅުކުރި އަންހެނަކު ބުނީ، ކުޅިވަރު ކުޅުމަށް ދަނޑު ހަދައި، ކުޑަކުދިން ކުޅެން ޕާކް ހަދާގޮތަށް، ބޮނބި ފާކުރުމަށް ބޮނބި ޕާކެއް ހަދަން ބޭނުންވާކަމަށެވެ. މިއީ ގިނަބަޔަކަށް ކަމުދިޔަ ޚިޔާލަކަށްވިއެވެ.

ކޮންމެ ގޮތެއް ހަދާފައިވެސް ރޯނުވެށުމުގެ މަސައްކަތައިގެން ކުރިއަށްދިއުމަށް ކުޅުދުއްފުށި ސިޓީގެ ކަނބަލުން ތިބީ އަތުކުރި އޮޅާލައިގެންނެވެ. އަދި މޭޔަރުގެ ޖަވާބާއެކު ކަނބަލުން ބައްދަލުވުން ނިންމާލީ އުންމީދުންފުރިގެންނެވެ.