ޕަބްލިކް ބޭންކް އެކައުންޓް އޯވަރޑްރޯ ކުރުމުގެ މުއްދަތު އިތުރު އެއް އަހަރަށް ދަންމާލުމަށް އެދިއްޖެއެވެ.
މިކަަމަށް އެދިވަޑައިގެން ފިނޭންސް މިނިސްޓަރ އިބްރާހިމް އަމީރު ރައްޔިތުންގެ މަޖިލީހަށް ފޮނުއްވި ސިޓީ ގައި ވަނީ، ބޯޑަރު ހުޅުވާލުމާއެކު އިގްތިސާދީ ދުވެލި ބާރުވަމުން ދިޔަ ނަމަވެސް މި ބަލިމަޑުކަމުން އަރައިގެންފައި ނުވުމާއި، އިގްތިސާދީ ހިރާސްތައް އަދިވެސް އެބަހުރި ކަމަށެވެ. ކުރު މުއްދަތެއްގެ ތެރޭގައި ޕަބްލިކް ބޭންކް އެކައުންޓްގެ އޯވަރޑްރޯ ކުރި އަދަދު އަނބުރާ ދެއްކުމަކީ ދައުލަތުގެ ކޭޝްފްލޯ މެނޭޖް ކުރުމުގައާއި، ދައުލަތުގެ ބަޖެޓް ތަންފީޒު ކުރުމުގައި، ދަތިތަކެއް ކުރިމަތިވެދާނެ ކަމެއް ކަމުގައެވެ.
މިދިޔަ އަހަރު އޭޕްރީލް މަހު ފިނޭންސް މިނިސްޓްރީން އެދުނީ 4.4 ބިލިއަން ރުފިޔާއަށް ލިމިޓް މަތިކޮށް ދިނުމަށެވެ. އެގޮތަށް މަޖިލީހުން ވަނީ ލިމިޓް މަތިކޮށްދީފައެވެ.
ފައިނޭންސް ހޯދުމަށް ހުރަސްތަކެއް ހުރުމާއެކު 2022ވަނަ އަހަރުން ފެށިގެންވެސް ޕަބްލިކް ބޭންކް އެކައުންޓް އޯވަރޑްރޯ ނުކޮށް ކުރިއަށްދިޔުމަކީ އިގްތިސާދަށާއި ސަރުކާރަށާއި، ރައްޔިތުންނަށް ފޯރުކޯށްދޭ ޚިދުމަތްތަކަސް އެކަމުގެ ނުރަނގަޅު އަސަަރު ކުރާނެ ކަމެއް ކަމަށް އަމީރު ވިދާޅުވިއެވެ.
އިސްތިސްނާގެ ސަބަބުން ދައުލަތުގެ ޚަރަދު ހަމަޖައްސައި، ޚިދުމަތްތަކަށް ބުރޫނާރާ، ދައުލަތް ހިންގުމުގެ ފުރުސަތު ލިބިގެން ދިޔަކަމަށާއި. އިގްތިސާދީ ފުން ވަޅުގަނޑަކަށް ވެއްޓިގެން ދިޔަ ދަނޑިވަޅުގައި، ވިޔަފާރިތަކަށާއި އާއްމު ފަރުދުންނަށް އެހީތެރިކަން ފޯރުކޮށްދިނުމަށާއި، ކޮވިޑަށް ކުރަން ޖެހުނު ޚަރަދުތައް ހަމަޖެއްސުމުގެ ފުރުސަތު ލިބިގެން ދިޔަ ކަމަށްވަނީ ފާހަގަ ކުރައްވާފައެވެ.
އެހެންކަމުން މި ސަބަބުތަކަށް ރިއާޔަތްކޮށް ދައުލަތުގެ ޚަރަދަށް ޒިންމާ ވުމުގެ ގާނޫނުގެ 32 މާއްދާގެ (ހ)، (ރ) އަދި (ބ) ގައި ބަޔާންކޮށްފައިވާ އުސޫލްތަކާއި ހަމަތަކުން އިސްތިސްނާވުމަށް ދީފައިވާ ހުއްދަ 26 އެޕްރީލް 2022ން ފެށިގެން އިތުރު އެއް އަހަރު ދުވަހުގެ މުއްދަތަށް އިތުރުކޮށްދެއްވުމަށް އަމީރުވަނީ އެދިވަޑައިގެންފައެވެ.
ދައުލަތުގެ ޚަރަދަށް ޒިންމާވުމުގެ ޤާނޫނުގެ 32 ވަނަ މާއްދާގެ (ހ) ގައި ބުނެފައިވަނީ ދައުލަތުގެ މަރުކަޒީ ބޭންކުން ދައުލަތަށް ދަރަންޏަށް ފައިސާ ނެގޭނީ 91 ދުވަހުގެ ތެރޭގައި އެފައިސާ ދައްކާ ހަލާސްކުރާ ގޮތަށް، އެއިރެއްގެ އިންޓަރެސްޓް ރޭޓަށްވުރެ ދަށް ނޫން ރޭޓެއްގައި އެޑްވާންސެއްގެ ގޮތުގައެވެ. އަދި އެގޮތަށް ފައިސާ ނެގޭނީ ވޭތުވެދިޔަ ތިން އަހަރު ސަރުކާރަށް ލިބުނު ޖުމްލަ އާމްދަނީގެ މައްޗަށް ބިނާކޮށް އަހަރަކަށް ޖެހޭ އެވްރެޖް އާމްދަނީގެ އެއް ޕަސެންޓަށްވުރެ އިތުރު ނުވާ ގޮތަށް ކަމަށްވެސް އެ މާއްދާގައި ވަނީ ބުނެފައެވެ. މިދިޔަ އަހަރު އޭޕްރީލް މަހު ފިނޭންސް މިނިސްޓްރީން އެދުނީ 4.4 ބިލިއަން ރުފިޔާއަށް އެ ލިމިޓް މަތިކޮށް ދިނުމަށެވެ.
މިމާއްދާގެ (ރ) ގައި ބުނެފައިވަނީ 1 ޖެނުއަރީ 2016 އިން ފެށިގެން ދައުލަތުން ދަރަންޏަށް ފައިސާ ނަގަންވާނީ ޤައުމީ ތަރައްޤީގެ މަޝްރޫޢުތަކާއި އުފެއްދުންތެރިކަން އިތުރުކުރުވޭނެ މަޝްރޫޢުތަކަށް ވަސީލަތްތައް ހޯދުމަށް އެކަންޏެވެ. އެތާރީޚުން ފެށިގެން ދައުލަތުގެ ދަރަނި އަދާކުރުމަށް ދަރަންޏަށް ފައިސާ ނަގައިގެން ނުވާނެކަމަށް އެ މާއްދާގައި ބަޔާންކޮށްފައިވެއެވެ.
(ބ) ގައި ބުނެފައިވަނީ (ރ) ގައި އެހެން ބުނެފައިވީނަމަވެސް ދައުލަތުގެ ކޭޝްފްލޯ މެނޭޖްކުރުމަށްޓަކައި ގިނަ ވެގެން 14 ދުވަހުގެ ތެރޭގައި އަނބުރާ ދައްކާގޮތަށް މިމާއްދާގެ (ހ) ގެ ދަށުން މަރުކަޒީ ބޭންކުން ސަރުކާރަށް ފައިސާ ދެއްކިދާނެ ކަމަށެވެ.
