މާލޭގެ މަގުތަކުގެ މަސައްކަތް ލަސްވަނީ މޭޔަރުގެ ކުއްލި ނިންމުންތަކުގެ ސަބަބުން – އާރުޑީސީ
15 ނޮވެމްބަރު 2021 | ހޯމަ 03:34ކުރީ ކައުންސިލުން ކޮންސެޕްޓް ޕްލޭނިންގ ކުރިން ނިންމާ އެއަށް ކުއްލި ކުއްލި ބަދަލުތަކެއް ނާދޭ
ރޯޝަނީ މަގު ހެދުމުގެ މަސައްކަތް ކުރިއަށްދަނީ
މާލޭގެ މަގުތައް ޒަމާނީ ފެންވަރަކަށް ހެދުމަށް ކުރަމުންދާ މަސައްކަތް ނުނިމި ދިގުލައިގެން ދަނީ ކުއްލިކުއްލިއަށް މާލެ ސިޓީގެ މޭޔަރާއި ޕްރޮޖެކްޓް އޮފިސަރުން މަސައްކަތަށް ބަދަލު ގެންނަން ނިންމާ ނިންމުމުގެ ސަބަބުން ކަމަށް ރޯޑް ޑިވަލަޕްމަންޓް ކޯޕަރޭޝަންގެ މެނޭޖިންގ ޑިރެކްޓަރ މޫސާ އަލި މަނިކު (މޫކޭ) ވިދާޅުވެއްޖެއެވެ.
ރާއްޖެޓީވީގެ “ފަލަސުރުހީ” ޕްރޮގްރާމުގައި ވާހަކަދައްކަވަމުން މޫކޭ ވިދާޅުވީ ކުރިން އޮތް ކައުންސިލާއެކު މަސައްކަތް ކުރަން ފަސޭހަވެގެން ދިޔަ ކަމަށާއި، ކޮންސެޕްޓް ޕްލޭނިންގ ނިންމާ އެއަށް ކުއްލި ކުއްލި ބަދަލުތަކެއް ކުރިން ނާންނަ ކަމަށެވެ. ނަމަވެސް އައު ސިޓީ ކައުންސިލުން މަސައްކަތް ކުރަމުންދާ އިރު ކުއްލިކުއްލިއަށް ބަދަލުތަކެއް ގެންނަން ހުށަހަޅާ ކަމަށާއި، ކޮށްފައި ހުންނަ މަސައްކަތް ދެފަހަރަށް ތިންފަހަރަށް ވެސް ކުރަން ޖެހޭ ކަމަށެވެ.
މޫކޭ ވިދާޅުވީ ރޯޝަނީ މަގުގެ މަސައްކަތް ފަށައިގަނެގެން ގޮސް 3 ބްލޮކް ނިންމާ ހުޅުވާލުމާއެކީގައި އަނެއްކާވެސް ބަދަލުތަކެއް ގެންނަން ޖެހި މުޅި މަސައްކަތް އަލުން ކުރަން ޖެހުނު ކަމަށެވެ. އޭނާ ވިދާޅުވީ މަސައްކަތް ނިމިގެން ހުޅުވާލުމާއި އެކީގައި ސިޓީ ކައުންސިލަށް ފެނިވަޑައިގަތީ ދުވާރު ތަންކޮޅެއް ހަނިކޮށްލަން ޖެހޭކަމަށް ކަމަށާއި، ދެން ކުރީގައި ކުރަން ޖެހުނު މަސައްކަތް އަލުން ބަލުން ކުރަން ޖެހުނު ކަމަށެވެ.
އާރުޑީސީން މަސައްކަތް ކުރަމުން އަންނަނީ ސިޓީ ކައުންސިލުން ފާސްކުރާ ޑިޒައިނާއި އެއްގޮތަށް އެ އޮންނަ ވަގުތެއްގެ ތެރޭގައި މަސައްކަތް ނިންމާލަންކަން ފާހަގަކުރައްވާ މޫކޭ ވިދާޅުވީ މަސައްކަތް ކުރުމުގެ ތެރޭގައި އެބޭފުޅުން ސިޔާސީ ގޮތުން އަޑީގައި ތިއްބަވައިގެން ކުރާ މަސައްކަތުގެ ސަބަބުން މަސައްކަތަށް ބުރޫ އަރާ ކަމަށެވެ. އެގޮތުން އެމްއާރުޑީސީގެ ކުރީގެ އެކްޓިންގ އެމްޑީއަކަށް ހުންނެވި ބޭފުޅަކު އެތަނުގައި ޕްރޮޖެކްޓްގެ ކަންކަން ބަލަން ސިޓީ ކައުންސިލުން ނަގާފައި ހުންނަވާ ކަމަށާއި، އެތަނުގައި ތިއްބަވައިގެން އާރުޑީސީއަށް މިކަން ނުވާފަދަ މޭރުމަކުން މީސް މީހުންލައްވާ ޓްވީޓްކުރުމާއި، މަސައްކަތަށް ހުރަސްއެޅޭ ގޮތަށް އަމަލުކުރައްވާ ކަމަށެވެ.
މޫކޭ ވިދާޅުވީ މަގުތަކުގެ މަސައްކަތް ކުރަމުންދާ އިރު، މާލޭގެ ފެނާއި ނަރުދަމާ ތަރުތީބުކުރުމުގެ މަސައްކަތް ވެސް ކުރިއަށްދާ ކަމަށެވެ. އަދި ދެވަނަ ފަހަރަށް ކޮންނަން ނުޖެހޭގޮތަށް ހޮޅިތައް އަޑީގައި ތަރުތީބުކުރެވިގެން ކުރިއަށް ގެންދެވޭ އިރު، މިއީ އެމްޑަބްލިއުއެސްސީއަށް ވެސް ކުއްލިއަކަށް ކުރަންޖެހުނު ބޮޑު ހަރަދެއް ކަމަށް ފާހަގަކުރެއްވިއެވެ.
އަދި މަގުގެ މަސައްކަތް އާރުޑީސީން ނިންމާލައިގެން ތިއްބަސް ދެން އެހެން ސަރވިސް ޕްރޮވައިޑަރުންގެ އަޕްގްރޭޑިންގެ މަސައްކަތްތަކަށް ބޭނުންވާ ސާމާނު ނުލިބޭކަމުގައި ވާނަމަ އާރުޑީސީގެ މަސައްކަތެއް ނުނިންމޭނެ ކަމަށެވެ.
މޫކޭ ވިދާޅުވީ އާރުޑީސީގެ މުވައްޒަފުން އަދި ކުންފުނިން ކުރަންޖެހޭ ކަމެއް ނުކޮށްގެން ލަސްތަކެއް ނުވާނެ ކަމަށެވެ. ރޯޝަނީ މަގުގައި ވެސް ގެނައި ބަދަލާއެކީގައި މަސައްކަތް އަލުން ކުރަން ޖެހެނު ކަމަށާއި، އެ މަސައްކަތް ފެށި ސްޕީޑުގައި މިހާރު ގޮސް އެ މަސައްކަތް ވެސް ނިމެން ކައިރިވެފައިވާ ކަމަށެވެ.
