ހަކުރު ބައްޔަށް ހުށަހެޅިފައިވާ 900އަށްވުރެ ގިނަމީހުން ކުޅުދުއްފުށި ސިޓީގައި އެބަތިބި: ޑެޕިއުޓީ ސީއީއޯ
އާބާދީގެ ނިސްބަތުން ބަލާނަމަ 9 އިންސައްތަ މީހުންދަނީ މިބަލި ތަހައްމަލު ކުރަމުން
ހަކުރުބަލީގެ ދުވަސް ފާހަގަ ކުރުމަށް ކުޅުދުއްފުށީ ރީޖަނަލް ހޮސްޕިޓަލްގައި މިއަދު ބޭއްވި ހަރަކާތުގެ ތެރޭން
ހަކުރު ބަލިން ރައްކާތެރިވުމަށް އޮތް އެންމެ ބޮޑު ގޮންޖެހުމަކީ ބައްޔާމެދު ހޭލުންތެރިކަން ކުޑަވުން ކަމަށާއި، މިހާރުވެސް ކުޅުދުއްފުށީގައި ހަކުރު ބައްޔަށް ހުށަހެޅިފައިވާ 900އަށްވުރެ ގިނަ މީހުން އެބަތިބިކަމަށް، ކުޅުދުއްފުށީ ރީޖަނަލް ހޮސްޕިޓަލްގެ ޑެޕިއުޓީ ސީއީއޯ އަޙުމަދު ދާއުދޫ ވިދާޅުވެއްޖެއެވެ.
ދުނިޔޭގެ ހަކުރު ބަލީގެ މީހުންގެ ދުވަސް ފާހަގަކުރުމަށް މިއަދު ކޭއާރުއެޗްގައި ބޭއްވި ހަރަކާތެއް ޝަރަފްވެރިކޮށްދެއްވައި ވާހަކަ ދައްކަވަމުން އޭނާ ވިދާޅުވީ، ބަލި ކޮންޓްރޯލްކޮށް ބަލިން ރައްކާތެރިވުމަށް އޮތް އެންމެ ބޮޑު ގޮންޖެހުމަކީ ބައްޔާމެދު ހޭލުންތެރިކަން ކުޑަވުން ކަމަށެވެ. އަދި ހަމައެއާއެކު ދިރިއުޅުމުގެ ވައްޓަފާޅިއާއި ކެއުން ބުއިމުގެ އާދަތައް ހުންނަ ގޮތުން، ބަލިން ރައްކާތެރިވުމުގައި ގިނަ ގޮންޖެހުންތަކެއް ކުރިމަތިވާކަން ދާއޫދު ފާހަގަކުރެއްވި އެވެ.
ނެޝަނަލް ޑަޔަބެޓިކްސް ސެންޓަރާ ގުޅިގެން ދާދި ފަހުން ކުޅުދުއްފުށީގައި ކުރިއަށްގެންދިޔަ ސްރީންނިންގ ޕްރޮގްރާމަކަށް އަލިއަޅުވާލައްވަމުން އޭނާ ވިދާޅުވީ، އެ ކޭމްޕުންވެސް މުޅިން އަލަށް ހަކުރު ބައްޔަށް މީހުން ޑައިގްނޯސް ކުރެވިފައިވާ ކަމަށެވެ. ރެކޯޑްތައް ދައްކާ ގޮތުން މިހާރު ވެސް ކުޅުދުއްފުށީގައިވެސް 900 އަށް ވުރެ ގިނަ މީހުން ހަކުރު ބައްޔަށް ހުށަހެޅިފައިވާކަމަށާއި، މިއީ އާބާދީގެ ނިސްބަތުން ބަލާ ކަމުގައިވާނަމަ 9 އިންސައްތައަށްވުރެ ގިނަ މީހުންކަމުގައި ކޭއާރުއެޗްގެ ޑެޕިއުޓީ ސީއީއޯ ވިދާޅުވިއެވެ.
މީގެ ތެރެއިން 50އަށްވުރެ ގިނަ މީހުންނަކީ ޓައިޕް 1 ޑައިބެޓީސް (ނުވަތަ ޒުވާން އުމުރުގައި، ނުވަތަ ކުޑަކުދިންނަށް ޖެހޭ ޑައިބެޓީސް) ޖެހިފައިވާ ފަރާތްތައްކަމަށާއި، މިއީ ކަންބޮޑުވާން ޖެހޭ ކަމެއްކަމުގައި އޭނާ ވިދާޅުވިއެވެ.
ހަކުރު ބައްޔަކީ ވަކި އުމުރު ފުރައަކަށް، އަދި ވަކި ޖިންސަކަށް ޚާއްސަ ބައްޔެއް ނޫންކަން ފާހަގަކުރައްވަމުން ދާއޫދު ވިދާޅުވީ، ޑަޔަބެޓީސް ސޮސައިޓީ އޮފް މޯލްޑިވްސްގައި މި އަހަރު ވެސް 11 މަހުގެ ކުއްޖަކާއި 1 އަހަރުގެ ކުއްޖަކުވެސް ރެޖިސްޓަރކޮށްފައިވާކަމަށެވެ.
އަދި ޑައިބެޓީސް ސޮސައިޓީ އޮފް މޯލްޑިވްސްގެ ތަފާސް ހިސާބުން ދައްކާ ގޮތުގައި، ދިވެހިރާއްޖޭގެ އާބާދީގެ 8 އިންސައްތަ މީހުންނަކީ ހަކުރު ބަލީގެ މީހުން ކަމަށް ބެލެވޭ ކަމަށާއި، މިހާރު މި ދާ ރޭޓުން ދާ ކަމުގައި ވާނަމަ ކުރިއަށް އޮތް ދެތިން އަހަރެއްގެ ތެރޭގައި މި އަދަދު ދެ ގުނަ ވުމުގެ ފުރުސަތު އެބަ އޮތްކަން ފާހަގަކުރެއްވި އެވެ.
އެހެންކަމުން ބައްޔާމެދު މުޖުތަމައު ވަރަށް ބޮޑަށް ހޭލުންތެރި ކުރުވަން ޖެހޭކަމަށާއި، އަދި ކެއުން ބުއިމުގައި ސިއްހަތަށް ފައިދާހުރި ކާނާ ބޭނުން ކުރުމާއި، ބަރުދަން ލުއިކޮށް، ކަސްރަތުކޮށް، މީހާގެ ދިރިއުޅުން އިތުރަށް ތާޒާ ނުކުރެވިއްޖެނަމަ ދިރިއުޅުން ނުރައްކަލަށް ހުށަހެޅިގެން ހިނގައިދާނެކަމަށް އޭނާ ވިދާޅުވިއެވެ.
