ބާރަހާހަށްވުރެ ބޮޑު އާބާދީއެއް ދިރިއުޅެމުން އަންނަ ކުޅުދުއްފުށި ސިޓީއަކީ ވެހިކަލް. ގިނަ މަގުތައް ހަލަބޮލި ސިޓީއެކެވެ. އެހެންނަމަވެސް ވާރޭވެހޭ މޫސުމެއް ނަމަ އެސިޓީގެ މަގުތަކަކީ ވަރަށްބޮޑަށް ފެންބޮޑުވާ މަގުތަކެކެވެ.

ކުޅުދުއްފުށީގެ މަގުތަކުގައި ތާރު އަޅައިގެން ޒަމާނީ ފެންވަރަށް ތަރައްޤީކުރުމުގެ ފުރަތަމަ ފިޔަވަހީގެ މަސައްކަތް 2018ވަނަ އަހަރު ނިންމާފައިވާއިރު، 18 މަގެއްގައިވަނީ ތާރުއަޅާފައެވެ. އެހެންނަމަވެސް އެކަށީގެން ފެން ހިންދާ ނިޒާމެއް ޤާއިމުކޮށްފައި ނެތުމުގެ ސަބަބުން އޭގެ ދަތިކަން ކުޅުދުއްފުށީގެ ރައްޔިތުންނަށް އަންނަނީ އިންތިހާއަށް ކުރިމަތިވަމުންނެވެ.

ކުރިން އަޑިގުޑަންކޮށް އޮތް މަގުތަކުގައި ތާރުއަޅައި، ޒަމާނީ ފެންވަރަށް ތަރައްޤީ ކުރުމުން، މަގުތައް ބޭނުންކުރާ މީހުންނަށްވަނީ ލުއިފަސޭހަތަކެއް ލިބިފައެވެ. އަދި ވެހިކަލް ގެންގުޅޭ ފަރާތްތަކަށްވެސް މިއީ ލިބުނު ވަރަށް ބޮޑު ހިތްހަމަޖެހުމެކެވެ.

މަގުތަކުގައި ތާރުއަޅައި މަގުތައް ހަދާފައި ވީނަމަވެސް، ރައްޔިތުންނަށް ކުރިމަތިވާ އެންމެ ބޮޑު ގޮންޖެހުމަކީ މަގުތަކުގައި ފެންބޮޑުވާ މައްސަލައެވެ. އެގޮތުން ތާރު އެޅި ބައެއް މަގުތަކުގައި އެކަށީގެންވާ ފެން ހިންދާ ނިޒާމެއް ނެތުމުގެ ސަބަބުން އެ މަގުތަކުގައިވެސް ފެންބޮޑުވެއެވެ. މިއާއެކު ތާރު އެޅި މަގުތަކާ ކައިރި މަގުތަކަށްވެސް ފެންބޮޑުވުމުގެ މައްސަލަ އަންނަނީ ކުރިމަތިވަމުންނެވެ. ބޯކޮށް ވާރޭވެހޭ މޫސުމުގައި، މަގުތަކުގައި ފެންބޮޑުވުމުގެ އިތުރުން ބައެއް ގޭގެއަށް ފެންވަދެ ބޮޑެތި ގެއްލުންތައް ލިބުމުގެ ހާދިސާތައްވަނީ ހިނގާފައެވެ.

ކުޅުދުއްފުށީގެ މަގުތަކުގައި ތާރު އެޅުމުގެ 2ވަނަ ފިޔަވަހީގެ މަސައްކަތް އެރަށުގައި ފެށުމަށް މިހާރު ދަނީ އެންމެ ފަހުގެ ތައްޔާރީތައް ވަމުންނެވެ. މި މަސައްކަތް އާރްޑީސީއާ ހަވާލުކޮށްފައި ވަނީ މިއަހަރުގެ ފެބްރުއަރީމަހުއެވެ. ކުޅުދުއްފުށީ މަގުހެދުމުގެ މަޝްރޫޢުގެ ފޭސް 2ގެ ދަށުން 24 މަގެއް ޒަމާނީ ފެންވަރަށް ތަރައްޤީ ކުރުމަށް ވަނީ ހަމަޖެހިފައެވެ. އެގޮތުން ޖުމްލަ 6 ކިލޯ މީޓަރުގެ މަގު ހެދުމަށް ހަމަޖެހިފައިވާއިރު، މިއީ ޑިޒައިން އެންޑް ބިލްޑް އުސޫލުން އާރުޑީސީއާ ހަވާލު ކޮށްގެން ކުރިއަށް ގެންދާ މަސައްކަތެކެވެ. މި މަސައްކަތް އާރްޑީސީއާ ހަވާލުކޮށްފައި ވަނީ 100.7 މިލިއަން ރުފިޔާއަށެވެ.

ކުޅުދުއްފުށީގެ މަގުހެދުމުގެ މަޝްރޫޢުގެ ފޭސް 2ގައި ތަރައްޤީކުރާ މަގުތަކުގައި ސައިޑްވޯކް ހެދުމާއި، ފެންހިނދާ ނިޒާމް ޤާއިމުކުރުމާއި، މަގުބައްތި ހަރުކުރުމުގެ އިތުރުން ސްޕީޑް ބްރޭކަރުތައް ހަރުކުރުމަށް ވަނީ ހަމަޖެހިފައެވެ. މަގުހެދުމުގެ ޕްރީ ކާސްޓިންގެ މަސައްކަތްތައް ކުރިއަށްގެންދާ ސައިޓްގެ މަސައްކަތްތައްވެސް މިހާރުވަނީ މުޅިން ނިންމާފައެވެ. އަދި މިދިޔަ ހަފުތާގައި، ވަނީ މި މަސައްކަތަށް ބޭނުންވާ ހިލަޔާއި ހިލަވެލިފަދަ ސާމާނު އެރަށަށް ގެންގޮސްފައެވެ.

މަގުތަކުގައި ފެންބޮޑުވުމުގެ މައްސަލައަކީ ރައްޔިތުން އެންމެ ކަންބޮޑުވާ އެއް މައްސަލައަށްވާއިރު، ކުޅުދުއްފުށީ ކައުންސިލްގެ މޭޔަރ ޢާޠިފް ވިދާޅުވީ، ދެވަނަ ފިޔަވަހީގެ މަސައްކަތްތައް ނިމޭއިރު، ފެންބޮޑުވާ މައްސަލައަށް ބޮޑު ހައްލެއް ލިބިގެންދާނެކަމަށް ގަބޫލުކުރައްވާކަމަށެވެ.