އަލިފުށީ އެއަރޕޯޓުގެ މަސައްކަތް އަންނަ އަހަރު ފެށޭނެ: އެމްޓީސީސީ
މިހާރު އީއައިއޭގެ މަސައްކަތްތައް ދަނީ ކުރިއަށް
ރ. އަލިފުށި
ރ. އަލިފުށީ އެއަރޕޯޓުގެ އަމަލީ މަސައްކަތް ފެށޭނީ އަންނަ އަހަރުގެ 2 ވަނަ ކުއާޓަރުގެ ތެރޭގައި ކަމަށް އެމްޓީސީސީގެ ޖެނެރަލް މެނޭޖަރު ރަމްޒީ އަބޫބަކުރު ވިދާޅުވެއްޖެއެވެ.
އެމްޓީސީސީން ކުރިއަށްގެންދާ ޕްރޮޖެކްޓްތަކާ ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން ރަމްޒީ ވިދާޅުވީ، އެމްޓީސީސީން މިވަގުތު 3 އެއަރޕޯޓެއްގެ މަސައްކަތް ކުރިއަށްގެންދާ ކަމަށެވެ. އެއީ ރ. އަލިފުށީ އެއަރޕޯޓު، މ. މުލީ އެއަރޕޯޓު އަދި ގދ. ފަރެސްމާތޮޑާ އެއަރޕޯޓުގެ މަސައްކަތެވެ.
އަލިފުށީ އެއަރޕޯޓުގެ މަސައްކަތް ފެށުމުގެ ކުރިން ބިން ހިއްކަން ޖެހޭނެ ކަމަށް ރަމްޒީ ވިދާޅުވިއެވެ. އެއަރޕޯޓުގެ ކޮންސެޕްޓު ޑިވެލޮޕްކުރުމުގެ މަސައްކަތް ނިމިފައިވާކަމަށާއި، މިހާރު ކުރިއަށްދަނީ އިއައިއޭގެ މަސައްކަތްތައް ކަމަށް ރަމްޒީ ވިދާޅުވިއެވެ.
ރަމްޒީ ވިދާޅުވީ ރަސްމީކޮށް މަސައްކަތް ފެށުމުގެ ކުރިން ނިންމަންޖެހޭ މަރުހަލާތައް ނިންމައި، އަމަލީ މަސައްކަތް ފެށޭވަރު ވާނީ އަންނަ 2022 ވަނަ އަހަރުގެ ދެވަނަ ކުއާޓަރުގައި ކަމަށެވެ. މަސައްކަތް ނިންމަން ހަވާލުކުރި ދުވަހަށް މަސައްކަތް ނިންމާލެވޭނެ ކަމަށް ރަމްޒީ ވިދާޅުވިއެވެ.
އަލިފުށީ އެއަރޕޯޓުގެ އީއައިއޭ މަސައްކަތަށް ގާތްގަނޑަކަށް 3 މަސް ދުވަސް ހޭދަވާނެ ކަމަށް އެމްޓީސީސީގެ ސީއީއޯ އާދަމް ޢާޒިމް ވަނީ މީގެ ކުރިން ވިދާޅުވެފައެވެ.
ޑިޒައިން އެންޑް ބިލްޑް އުސޫލުން ހަވާލުކުރެވުނު މި މަޝްރޫއުގެ ދަށުން، އަލިފުށީގެ 50.5 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. މި ބިމުގެ ތެރެއިން 10 ހެކްޓަރުގެ ބިމަކީ ރަށުގެ ތަރައްގީއާއި ގެދޮރުވެރިކަމުގެ ބޭނުމަށް ޚާއްސަކުރެވިގެން ހިއްކޭ ބިމެކެވެ. އަދި ބާކީ 40.5 ހެކްޓަރު ބިމަކީ އެއަރޕޯޓް ތަރައްގީކުރުމަށް ހިއްކޭ ބިމެކެވެ. މި މަޝްރޫއުގެ ދަށުން، 1200 މީޓަރުގެ ރަންވޭއެއް އެޅުމާއި، ޓެކްސީވޭ، އޭޕްރަން އަދި ސަރވިސް ރޯޑު ހެދުމުގެ މަސައްކަތް ވަނީ މިކުންފުންޏާ ހަވާލުކޮށްފައެވެ. އަދި ހިއްކާ ބިމުގެ ގޮނޑުދޮށް ހިމާޔަތްކުރުމުގެ ގޮތުން 2871 މީޓަރުގެ ރިވެޓްމަންޓަކާއި، 480 މީޓަރުގެ ގްރޮއިންއެއް ވެސް ގާއިމު ކުރެވިގެންދާނެއެވެ.
މިއީ 451.61 މިލިއަން ރުފިޔާގެ މަޝްރޫއެކެވެ. މި މަޝްރޫއު ނިންމުމަށް ހަމަޖެހިފައިވަނީ 750 ދުވަހުގެ ތެރޭގައެވެ.
މަސައްކަތުގެ ގޮތުން ބަލާއިރު މި މަޝްރޫއަކީ އަގުގެ ގޮތުންނާއި، މަޝްރޫއުގެ ދަށުން ކުރަންޖެހޭ އެމްޓީސީސީގެ 40 އަހަރުގެ ދިގު ތާރީޚުގައި ސަރުކާރުން އެ ކުންފުންޏާ ހަވާލުކުރި އެންމެ ބޮޑު މަޝްރޫއެވެ.
