މި ހިނގަމުންދާ 2021 ވަނަ އަހަރުގެ ނިޔަލަށް ހިންގާ ޕީއެސްއައިޕީއަށްވުރެ އަންނަ އަހަރު ރާވަފައިވާ ޕީއެސްއައިޕީ 20.1 އިންސައްތަ އިތުރުވާނެކަމަށް ލަފާކޮށްފިއެވެ.

އަންނަ އަހަރުގެ ބަޖެޓުގައިވާގޮތުން 2022 ވަނަ އަހަރަށް ހުށަހަޅާ ޕީއެސްއައިޕީއަކީ 6,273 މިލިއަން ރުފިޔާއެވެ. މިއީ ޖުމުލަ ބަޖެޓުގެ 17 އިންސައްތައެވެ. އަދި މި އަހަރުގެ ނިޔަލަށް ހިނގާނެކަމަށް މިހާރު އަންދާޒާކުރާ ޕީއެސްއައިޕީއަށްވުރެ 20.1 އިންސައްތަ އިތުރު އަދަދެކެވެ.

މި އަހަރުގެ ޕީއެސްއައިޕީ ބަޖެޓުގައި ކޮވިޑް-19 އާ ގުޅިގެން މަޑުޖައްސާލެވުނު މަޝްރޫއުތައް ނިންމުމަށް އަދި އިގުތިސާދީ އައު ހަރަކާތްތައް އިތުރުކުރާނެ ކަންތައްތަކަށާއި ރައްޔިތުންގެ ދިރިއުޅުމުގެ ފެންވަރު ރަނގަޅުކުރާނެ މަޝްރޫއުތަކަށް ބަޖެޓުން ޖާގަދީފައިވެއެވެ. 2022 ވަނަ އަހަރަށް ހުށަހަޅާ ޕީއެސްއައިޕީ ބަޖެޓު ބެހިފައިވާގޮތަށް ބަލާއިރު، ދައުލަތުގެ ޑޮމެސްޓިކް ބަޖެޓުން 2،615.3 މިލިއަން ރުފިޔާ، ބޭރުގެ ފަރާތްތަކުން ނަގާ ލޯނުން 2،694.3 މިލިއަން ރުފިޔާ، ބޭރުގެ ހިލޭ އެހީއިން 548.9 މިލިއަން ރުފިޔާ އަދި ޓްރަސްޓް ފަންޑްތަކުން 414.5 މިލިއަން ރުފިޔާ ޚަރަދުކުރުމަށް ހިމަނާފައިވެއެވެ.

އެހެން އަހަރުތަކެކޭ އެއްފަދައިން، ޓްރަސްޓް ފަންޑްތަކުން ހިންގާ މަޝްރޫއުތަކުގެ ތެރެއިން އެންމެ ބޮޑު ހިއްސާއެއް ވަނީ މޯލްޑިވްސް ގްރީން ފަންޑުންނެވެ. މިއީ ޕީއެސްއައިޕީ ބަޖެޓުގެ 6.6 އިންސައްތައެވެ. 2022 ވަނަ އަހަރަށް ހުށަހަޅާ ޕީއެސްއައިޕީ ބަޖެޓުގައި އަލަށް ފަށާ 287 މަޝްރޫއަކަށް 1,342.6 މިލިއަން ރުފިޔާ، ޓެންޑަރިންގ މަރުހަލާގައިވާ 105 މަޝްރޫއަށް 141.0 މިލިއަން ރުފިޔާ ހިމެނޭއިރު ޕްރީޓެންޑަރިން މަރުހަލާގައިވާ 290 މަޝްރޫއުއަށް 783.3 މިލިއަން ރުފިޔާ އަދި ހިނގަމުންދާ 431 މަޝްރޫއަށް 3,635.2 މިލިއަން ރުފިޔާ ބަޖެޓުކޮށްފައިވެއެވެ.

އަދި މި އަހަރުގެ ތެރޭގައި ނިމިފައިވާ 163 މަޝްރޫއެއްގެ ރިޓެންޝަން ފައިސާއަށް 112.6 މިލިއަން ރުފިޔާ ބަޖެޓުކޮށްފައިވެއެވެ. 2022 ވަނަ އަހަރަށް ހުށަހަޅާ ޕީއެސްއައިޕީގެ ތެރޭގައި ސަރުކާރުން ވެފައިވާ ގިނަގުނަ ވައުދުތައް ފުއްދުމަށް އިސްކަމެއް ދީފައިވެއެވެ. މީގެ އިތުރުން ނޭޝަނަލް ރެޒިލިއެންސް އެންޑް ރިކަވަރީ ޕްލޭނުގައި ހިމެނޭ ކަންތައްތައް ފުރިހަމަކުރުމަށް ބަޖެޓުން ޖާގަދީފައިވެއެވެ. މިގޮތުން، ފަތުރުވެރިކަމުގެ އިތުރުން، އިގުތިސާދީ އައު ހަރަކާތްތަކަށް މަގުފަހިކުރުމާއެކު، ރައްޔިތުންނަށް ދިމާވެފައިވާ ބޯހިޔާވަހިކަމުގެ ދަތިކަމަށް ހައްލެއް ހޯދައި ދިނުމަށް މި ބަޖެޓުގައި މަޝްރޫއުތައް ވަނީ ހިމަނާފައެވެ.

އިގްތިސާދީގޮތުން ރާއްޖެ އައު ހަރުފަތަކަށް ގެނައުމަށްޓަކައި މަގުފަހިކުރުވަދޭނެ މަޝްރޫއުތައް ހިންގުމަށްޓަކައި އަންނަ އަހަރުގެ ބަޖެޓުން ޖާގަދީފައިވެއެވެ. އެގޮތުން ވެލާނާ އިންޓަރނޭޝަނަލް އެއަރޕޯޓުގެ ޓާރމިނަލް އަދި ރަންވޭ ޑިވަލަޕްމަންޓް ޕްރޮޖެޓާއި، ތިލަފުށީ ބްރިޖް މަޝްރޫއު އަދި ޓްރާންސްޝިޕްމަންޓް ޕޯޓުގެ މަސައްކަތް ކުރުމަށް ވަނީ ބަޖެޓުގައި ހިމަނާފައެވެ.