ހުރިހާ ދަރިވަރުން ޝާމިލުކޮށްގެން ތައުލީމު ދިނުމުގެ ސިޔާސަތު އެޑިޔުކޭޝަން މިނިސްޓްރީން އާންމުކޮށްފިއެވެ.

މިސިޔާސަތަކީ ހުރިހާ ދަރިވަރުންނަށް އުނގެނުމުގެ ޙައްޤު ކަށަވަރު ކޮށްދިނުމަށްޓަކައި ޕްރީ ސްކޫލުތަކާއި، ފަށާ ތަޢުލީމު ދޭ ސްކޫލުތަކާއި، ސާނަވީ އަދި މަތީ ސާނަވީ ތަޢުލީމު ދޭ ސްކޫލުތަކުގައި އުނގެނުމުގައި ޚާއްޞަ އެހީއަށް ބޭނުންވާ ހުރިހާ ގިންތިއެއްގެ އެންމެހައި ދަރިވަރުންނަށް އުނގެނުމުގެ ޢަދުލުވެރި އަދި ހަމަހަމަ ފުރުޞަތުތައް ފަހިކޮށްދީ، އެ ދަރިވަރުންގެ ޤާބިލުކަން ކުރިއަރުވައި ތަރައްޤީ ކުރުމަށް އެކުލަވާލާފައިވާ ސިޔާސަތެކެވެ.

މިސިޔާސަތު އަމާޒުކޮށްފައިވަނީ ސްޓުޑެންޓްސް ވިތް ކޮމްޕްލެކްސް ލަރނިންގ ޕްރޮފައިލްސް ގެ ގޮތުގައި ބަޔާންކޮށްފައިވާ އުނގެނުމުގައި ޚާއްޞަ އެހީއަށް ބޭނުންވާ ހުރިހާ ގިންތިއެއްގެ ދަރިވަރުންނަށެވެ. މި ސިޔާސަތުގައި ދަރިވަރުން ގިންތިކޮށްފައިވަނީ، ދަރިވަރުންގެ ފަރުދީ ތަފާތުތަކަށް ރިޢާޔަތްކޮށް، ކިޔަވައިދިނުމަށް ބޭނުންވާނެ ވަސީލަތްތަކާއި އާލާތްތައް ހޯދައިދިނުމަށާއި، އަދި އުނގަންނައި ދިނުމަށް ކޮންމެހެން ގެންނަންޖެހޭ ތަފާތު ބަދަލުތަކަށް ސްކޫލުތަކާއި ކަމާގުޅުންހުރި އެންމެހައި ފަރާތްތައް އަހުލުވެރި ކުރުމަށެވެ.

އެގޮތުން ސްޓޫޑެންޓްސް ވިތް ކޮމްޕްލެކްސް ލަރނިންގ ޕްރޮފައިލްސްގެ ތެރޭގައި ހިމެނެނީ ތިން ގިންތިއެއްގެ ދަރިވަރުންނެވެ. މިތިން ގިންތިއަކީ:

- ނުކުޅެދުންތެރިކަން ހުންނަ ދަރިވަރުން

- އުނގެނުމުގައި ތަފާތު އެހީތެރިކަން ބޭނުންވާ ދަރިވަރުން

- ޚާއްސަ ހާލަތްތައް ދިމާވާ ދަރިވަރުން

މިގިންތިތަކުގައި ހިމެނޭ ދަރިވަރުންނަށް ތައުލީމު ފޯރުކޮށްދޭން ޖެހޭނީ އިންޑިވިޖުއަލައިޒްޑް ކަރިކިއުލަމް ޕްލޭން (އައި.ސީ.ޕީ) ތައްޔާރުކޮށް އެ ޕްލޭނާ އެއްގޮތްވާ ގޮތުގެމަތިންކަމަށް ސިޔާސަތުގައި ބުނެފައިވެއެވެ. އަދި 2015 ވަނަ އަހަރު އެކުލަވާލާފައިވާ ދިވެހިރާއްޖޭގެ ގައުމީ މަންހަޖުގެ ލަނޑުދަނޑިތައް ހުރިހާ ދަރިވަރުންނަށް ހާސިލުކޮށްދިނުމުގައި ކިޔަވާދިނުމުގައި ބޭނުންކުރާނެ ގޮތްތައްވެސް މިސިޔާސަތުގައި ބަޔާންކޮށްފައިވެއެވެ. އަދި ހަމަތައް ހިފެހެއްޓުމަށް ނުކުޅެދުންތެރިކަން ހުންނަ ދަރިވަރުންނަށް އިންކްލޫޝަންގެ އަސާސްތަކާ އެއްގޮތަށް ތަޢުލީމު ފޯރުކޮށްދިނުމަށް ވަކި ވަސީލަތްތައް ސްކޫލުތަކުގައި ޤާއިމުކުރަންވާނެ ކަމަށް ވަނީ ބަޔާންކޮށްފައެވެ.

ހުރިހާ ދަރިވަރުން ޝާމިލުކޮށްގެން ތައުލީމު ދިނުމަށްޓަކައި އެޑިޔުކޭޝަން މިނިސްޓްރީ އާއި ޑިޕާޓްމަންޓް އޮފް އިންކްލޫސިވް އެޑިޔުކޭޝަނާއި ސްކޫލުތަކާއި ބެލެނިވެރިންނަށް ވަކިވަކި ޒިންމާތަކެއް ވަނީ ކަނޑައަޅާފައެވެ.

މިއީ 2020 ވަނަ އަހަރު އަމަލުކުރަން ފެށި ތައުލީމުގެ ގާނޫނުގެ 8 ވަނަ މާއްދާގެ ރ ގެ ދަށުން އެކުލަވާލާފައިވާ ސިޔާސަތެކެވެ. އެގާނޫނުގެ 8 ވަނަ މާއްދާއަކީ ދިވެހިރާއްޖޭގެ ތަޢުލީމީ ނިޒާމަކީ އުނގެނުމުގައި ޚާއްޞަ އެހީއަށް ބޭނުންވާ ކުދިން ބައިވެރިކުރާ ތަޢުލީމީ ނިޒާމަކަށް ހެދުމާއި ގުޅޭ މާއްދާއެވެ. އެމާއްދާގެ ރ ގައި ބުނެފައިވަނީ އުނގެނުމުގައި ޚާއްސަ އެހީއަށް ބޭނުންވާ ކުދިންނަށް ދިވެހިރާއްޖޭގެ ސްކޫލްތަކުން ފުރުޞަތު ދިނުމުގައި އަދި އެކުދިންނަށް ތަޢުލީމު ދިނުމުގައި ކަށަވަރު ކޮށްދޭންޖެހޭ ޙައްޤުތަކާއި ފޯރުކޮށްދޭންޖެހޭ ވަސީލަތްތަކާއި ހިފަހައްޓަންޖެހޭ ހަމަތައް ބަޔާންކުރާ ސިޔާސަތެއް، މިނިސްޓްރީން ކަނޑައަޅާ އިއުލާނުކުރަންވާނެ ކަމަށެވެ.

ގާނޫނަށް އަމަލުކުރަން ފަށާފައިވަނީ މިއަހަރުގެ ދިރާސާ އައު އަހަރު ފެށުމާއެކުއެވެ. ގާނޫނަށް އަމަލުކުރަން ފަށާތާ ތިން މަސްތެރޭގައި މިސިޔާސަތު އެޑިޔުކޭޝަން މިނިސްޓްރީން އެކުލަވާލަންޖެހެއެވެ.