ކާށިދޫ ދަނޑުތައް، ވަގުންގެ އަތް ދަށުގައި!
10 ނޮވެމްބަރު 2021 | ބުދަ 09:49ދަނޑުވެރިން ގަބޫލުކުރާ ގޮތުގައި ކާށިދޫ ދަނޑުތަކުން ވައްކަންކުރަނީ ގިނަ ބަޔަކު ގުޅިގެން
ކާށިދޫ ދަނޑުތައް - ދަނޑުވެރިން ގަބޫލުކުރާ ގޮތުގައި، ކާށިދޫ ދަނޑުތަކުން ވައްކަން ކުރަނީ ގިނަ ބަޔަކު ގުޅިގެން
ދިވެހި ރާއްޖޭގެ އެންމެ ބިން ބޮޑު، ފަސް ރަށުގެ ތެރޭގައި ހިމެނޭ ކ. ކާށިދުއަކީ، އާބާދީގެ ގޮތުން ގާތްގަނޑަކަށް ދެހާސް ފައްސަތޭކަ މީހުން ދިރިއުޅޭ ރަށެކެވެ. މި ރަށުގެ ގިނަ ބަޔަކު އާމުދަނީ ހޯދަން ދަނޑުވެރިކަން ކުރަމުން ގެންދާއިރު، އެރަށަކީވެސް ރާއްޖޭގައި ދަނޑުވެރި ކަމަށް ނަން މަޝްހޫރު ރަށެކެވެ. ރާއްޖޭގެ ރަށްތަކަށާއި މާލޭގެ މާރުކޭޓު ތަކަށް ކާށިދޫ ދަނޑުތަކުން އެންމެ ފެންވަރު ރަނގަޅު ތަކެތި ފޯރުކޮށްދޭން ދަނޑުވެރިން މަސައްކަތްކުރާއިރު، ކާށިދޫ ދަނޑުވެރިންނަށް ކުރިމަތިވެފައިވާ ގޮންޖެހުންތައްވެސް އެހާމެ ގިނައެވެ. މި ހުރިހާ ގޮންޖެހުން ތަކުގެ ތެރެއިން، ދަނޑުވެރިން ފާހަގަކުރާ އެންމެ ބޮޑު ގޮންޖެހުމަކީ، ދަނޑުވެރިން ކުރާ ބުރަ މަސައްކަތުގެ ނާޖާއިޒު ފައިދާ ވަގުން ނަގާ މައްސަލައެވެ.
ދަނޑުވެރިން ގަބޫލުކުރާ ގޮތުގައި، ކާށިދޫ ދަނޑުތަކުން ވައްކަން ކުރަނީ ގިނަ ބަޔަކު ގުޅިގެންނެވެ. އަދި މިކަމުގެ އަޑީގައި ތިބެނީ މަސްތުވާތަކެތި ބޭނުންކޮށް، އެކަމުގެ ވިޔަފާރި ކުރާ މީހުނާއި ބިދޭސީންނެވެ. މި މީހުން ވަގަށްނަގާ ތަކެތި ގަންނާނެ މާކެޓެވެސް އޮވެއެވެ. މި ތަކެތި މާލެއަށް ވެސް ބޭރުކުރެއެވެ. އެހެންކަމުން، ދަނޑުތަކުން ވަގަށް ނަގާ ތަކެތިން، އެ ބަޔަކު ގެންދަނީ، ފުޅާ ދާއިރާއެއްގައި ވިޔަފާރި ކުރަމުންނެވެ.
ވަގުންގެ ކިބައިން ދަނޑުތައް ސަލާމަތް ކުރުމަށްޓަކައި ކާށިދޫގެ ދަނޑުވެރިން ގެންދަނީ، އެމީހުންގެ އަމިއްލަ ފެންވަރުގައްޔާއި އަދި ކައުންސިލްގެ އެހީވެސް ލިބިގެން ގިނަ މަސައްކަތް ތަކެއް ކުރަމުންނެވެ. އެގޮތުން ދަނޑުވެރިކަން ކުރަން، ދަނޑުވެރިންނަށް ދީފައިވާ ބިމުގައި ފެންސު ޖެހުމާއި ދަނޑު ހެއްދުމަށް ބޭނުންކުރާ އާލާތްތައް ބަހައްޓާ ގުދަންތަކުގައި، ތަޅުލެވޭ ގޮތަށް ހެދުން ފަދަ ކަންކަން ހިމެނެއެވެ.
މިކަމާއި ގުޅިގެން ކާށިދޫ ކައުންސިލްގެ ރައީސް މުހަންމަދު އާމިރު،، ދެއްވި ބަސްދީ ގަތުމެއްގައި ބުނުއްވީ، ދަނޑުތަކުން ވައްކަން ކުރާ މީހުނާދޭތެރޭގައި ކައުންސިލުން ހަރުކަށި ފިޔަވަޅު ތަކެއް އަޅަމުން ގެންދާ ކަމުގައެވެ. އަދި ވައްކަން ކުރުން މަދުކުރުމަށްޓަކައި މޯލްޑިވްސް ޕޮލިސް ސަރވިސް އާއި ގުޅިގެން، ހިންގޭ ހަރަކާތް ތަކުން އެދެވޭ ނަތީޖާއެއް ފެންނަމުން ވެސް އަންނާތީ، ވައްކަން ކުރުން މިހާރު ކުރިއަށްވުރެ މަދުވެފައި ވާކަން ، ފާހަގަ ކުރެވެމުން އަންނަ ކަމަށެވެ.
ކާށިދޫ ދަނޑުވެރިން ދާ އޮހޮރުވައިގެން ކުރާ ބުރަ މަސައްކަތުގައި މޭވާ އަޅާ ހިސާބުން، އެތަކެތި އަތުން ދޫވާ މަންޒަރު ބަލަން ކާށިދޫ ރައްޔިތުން ތިބެނީ ގޮތްހުސްވެ މާޔޫސްވެފައެވެ. ވަގުންގެ ސަބަބުން އެމީހުންގެ ވިޔަފާރިއަށް ދަނީ ބޮޑުތަނުން ގެއްލުން ލިބެމުންނެވެ.
