މަސްތުވާތަކެއްޗާއެކު ކާށިދޫ ވަލުތެރެއިން 2 މީހަކު ހައްޔަރުކޮށްފި
މި ދެމީހުން ހައްޔަރުކޮށްފައިވަނީ ކާށިދޫ ޕޮލިސް ސްޓޭޝަނުން މަސްތުވާތަކެއްޗާ ދެކޮޅަށް ފެށި ޚާއްޞަ އޮޕަރޭޝަނެއްގެ ތެރެއިން
ކާށިދޫ ވަލުތެރެއިން މަސްތުވާތަކެއްޗާއެކު ހައްޔަރު ކުރި ދެ މީހުން
ކ. ކާށިދޫ އުތުރު އަވަށު ވަލުތެރެއިން މަސްތުވާތަކެއްޗާއެކު ދެ މީހަކު ހައްޔަރުކޮށްފިއެވެ.
މި ދެމީހުން ހައްޔަރުކޮށްފައިވަނީ ކާށިދޫ ޕޮލިސް ސްޓޭޝަނުން މިމަހުގެ ހަތްވަނަ ދުވަހު މަސްތުވާތަކެއްޗާ ދެކޮޅަށް ފެށި ޚާއްޞަ އޮޕަރޭޝަނެއްގެ ތެރެއިން މިދިޔަ ބުރާސްފަތި ދުވަހުއެވެ.
ފުލުހުން މައުލޫމާތު ދިންގޮތުގައި، މި އޮޕަރޭޝަނުގައި ހައްޔަރުކުރެވުނު ދެމީހުންނަކީ ކާށިދޫ / ސާދާގެ، އުމުރުން 46 އަހަރުގެ އަޙްމަދު ފިރާޤާއި ހަމަ އެރަށު ޝަރަފް، އުމުރުން 43 އަހަރުގެ ސާލިމް ނަޞީރެވެ. މި ދެމީހުން ހައްޔަރުކޮށްފައިވަނީ މަސްތުވާތަކެތި ގެންގުޅެ އޭގެ ވިޔަފާރިކުރާކަމަށް ލިބުނު މައުލޫމާތަކާ ގުޅިގެންނެވެ.
ފުލުހުން ކުރި ތަޙްޤީޤުތަކުގައި، ހައްޔަރުކުރެވުނު ދެމީހުންގެ ހަށިގަނޑާއި އެވަގުތު ތިބި ސަރަޙައްދު ބަލައި ފާސްކުރުމުން، މަސްތުވާތަކެތި ކަމަށް ޝައްކުކުރެވޭ އެއްޗެއް ހުރި 110 ރަބަރު ޕެކެޓް ވަނީ ފެނިފައެވެ. މި ތަކެތީގެ ވަގުތީ ބަރުދަނަކީ 10.6 ގްރާމްކަމަށް ފުލުހުން ވަނީ ހާމަކޮށްފައެވެ.
މި މައްސަލައިގައި ހައްޔަރުކުރެވުނު ދެމީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، އަޙްމަދު ފިރާޤު ހަތް ދުވަހުގެ މުއްދަތައް ބަންދުކުރަން އަމުރު ކޮށްފައިވާއިރު، ސާލިމް ނަޞީރު 10 ދުވަހަށް ބަންދުކުރުމަށް ކޯޓުން އަމުރުކޮށްފައިވެއެވެ.
މި މައްސަލައިގެ އިތުރު ތަޙްޤީޤުތައް ކާށިދޫ ޕޮލިސް ސްޓޭޝަނުން ދަނީ ކުރިއަށް ގެންދަމުންނެވެ.
