ރައްޔިތުންނަށް އޮޅުވާނުލައި، ޒިންމާދާރުކަމާއެކު ވާހަކަދެއްކެވުމަށް ރައްޔިތުންގެ މަޖިލީހުގެ މެމްބަރުންގެ ކިބައިން ފިނޭންސް މިނިސްޓަރ އިބްރާހިމް އަމީރު އެދިވަޑައިގެންފިއެވެ.

2022 ވަނަ އަހަރަށް ލަފާކުރާ ބަޖެޓާ ގުޅޭ ގޮތުން ބަހުސް ކުރަމުން އަންނައިރު ރައްޔިތުންނަށް ތެދު މައުލޫމާތު ފޯރުކޮށްދިނުމަކީ ވަރަށް މުހިންމު ކަމެއްގެ ގޮތުގައި މިނިސްޓަރ ފާހަގަކުރެއްވިއެވެ. އެގޮތުން ބައެއް މެމްބަރުން ވިދާޅުވާ ހިސާބުތައް ދިމާނުވާކަން ފާހަގަކުރައްވައި މިނިސްޓަރ ވަނީ ޒިންމާދާރުކަމާއެކު ރައްޔިތުންނަށް އޮޅުވާނުލައި ވާހަކަދެއްކެވުމަށް ހުރިހާ މެމްބަރުންނަށް އިލްތިމާސްކުރައްވާފައެވެ.

އަދި މީގެ ކުރީގެ ސަރުކާރުތަކުން ފިސްކަލް ސްޓްރެޓެޖީތަކާއި، މާލީ ރިސްކުތައް ހެދި ނަމަވެސް އެމައުލޫމާތުތައް ރައްޔިތުންނާ ހިއްސާނުކޮށް ފޮރުވާފައި ހުންނަކަން މިނިސްޓަރ ފާހަގަކުރެއްވިއެވެ. އެއާ ޚިލާފަށް މިސަރުކާރުން އެހުރިހާ މައުލޫމާތުތަކެއް ރައްޔިތުންނަށް ފެންނާނެގޮތަށް ހާމަކަން ބޮޑު ގޮތެއްގައި މިނިސްޓްރީގެ ވެބްސައިޓުގައި ޝާއިއުކުރެވިފައި ހުންނާނެކަމަށް މިނިސްޓަރ ވިދާޅުވިއެވެެ. އަދި މިސަރުކާރުން ދެފުށްފެންނާނެ ގޮތަށް ރައްޔިތުންނަށް ކަންތައްތައް ހާމަކޮށްފައިވާކަން އައިއެމްއެފްއާއި ވޯލްޑްބޭންކް ފަދަ ޖަމިއްޔާތަކުން ފާހަގަކޮށްފައި ވާކަމަށް މިނިސްޓަރ ވިދާޅުވިއެވެ.

މިނިސްޓަރ އިތުރަށް ވިދާޅުވީ 2020 ވަނަ އަހަރު ކޮވިޑް-19ގެ ސަބަބުން އެންމެ ބޮޑަށް އިޤްތިޞާދު ދަށަށްދިޔަ ޤައުމަކީ ދިވެހިރާއްޖެ ކަމަށެވެ. މިދިޔަ އަހަރު ރާއްޖޭގެ އިޤްތިޞާދު ވަނީ 32.6 އިންސައްތަ ދަށަށް ގޮސްފައެވެ. ނަމަވެސް މިއަހަރު ރާއްޖޭގެ އިޤްތިޞާދު 33 އިންސައްތަ ކުރިއަރާނެކަމަށް މިނިސްޓަރ ވިދާޅުވިއެވެ. އަދި ރާއްޖޭގެ އިޤްތިޞާދު މިހާ ހަލުވިކަމާއެކު ކުރިއަރައިގެން ދިޔަ ސަބަބަކީ ސަރުކާރުން އެޅި ހަރުދަނާ ފިޔަވަޅުތައް ކަމަށެވެ. މީގެ އިތުރުން މިއީ ސަރުކާރުން ރައްޔިތުންނާ ގުޅިގެން ކަންތައްތަކެއް ކުރުމުގެ ނަތީޖާ ކަމަށް ވެސް މިނިސްޓަރ ވިދާޅުވިއެވެ.

މިދިޔަ އަހަރު ދައުލަތުގެ ބަޖެޓަށް 38 ބިލިއަން ރުފިޔާ ކަނޑައަޅާފައިވީ ނަމަވެސް ކޮވިޑް-19ގެ ސަބަބުން އެ އަދަދު ވަނީ 26 ބިލިއަން ރުފިޔާއަށް ކުޑަކޮށްފައެވެ. މިދިޔަ އަހަރު ނިމުނުއިރު ސަރުކާރުން ޚަރަދުކޮށްފައިވަނީ ގާތްގަނޑަކަށް 29 ބިލިއަން ރުފިޔާއެވެ. މިޚަރަދުގެ ބޮޑު ބައެއް ހޭދަކޮށްފައި ވަނީ ކޮވިޑްގެ ތެރޭގައި ސިއްޙީ ނިޒާމު އިތުރަށް ހަރުދަނާ ކުރުމަށާއި، އިންކަމް ސަޕޯޓް އެލަވަންސް ދިނުމުގެ އިތުރުން ލޯނުތައް ދީގެން ވިޔަފާރިތައް އިނދަޖެހުނަ ނުދީ ހިފެހެއްޓުމަށެވެ.

މިނިސްޓަރ ވިދާޅުވީ ބޮޑުތަނުން ޚަރަދު ކުޑަ ނުކުރި ނަމަ ކުރިއަށް އޮތް 10 ނުވަތަ 15 އަހަރާ ހަމައަށް ދިވެހިރާއްޖޭގެ އިޤްތިޞާދު ބޮޑު އަނދަވަޅަކަށް ވެއްޓިގެންދާނެ ކަމަށެވެ. އަދި މީގެ ސަބަބުން ދަރިންގެ ދަރީންނާ ހަމައަށް ދާއިރުވެސް ރާއްޖެ އިޤްތިޞާދީ އަނދަވަޅުން އަރައިނުގަނެވި، ދިގު މުއްދަތަކަށް އިޤްތިޞާދީ ހީނަރުކަމެއްގައި ރާއްޖެ އޮންނާނެ ކަމަށެވެ.