ތަރައްގީގެ ނަމުގައި ވެށި ހަލާކު ނުކުރަމާ!

އުފެދުމުގައިވެސް ދިވެހިރާއްޖެއަކީ ނާޒުކު ތިމާވެއްޓެއް އޮތް ގައުމެކެވެ. ގުދުރަތީ ގޮތުން ހިމާޔަތާ ރައްކާތެރިކަން ލިބިފައި އޮތް ގައުމެކެވެ. ރަށްރަށުގެ ހޭޅިފަށުގައި ހެދިފައިވާ ގަސްތަކާއި، ވަށައިގެންވާ ފަރުތަކާއި މުރަކަތަކުން ހިމާޔަތް ލިބެއެވެ.

އެހެންނަމަވެސް ޒަމާނަށް އައި ބަދަލާއި، ދިރިއުޅުމުގެ ވައްޓަފާޅިއަށް އައި ބަދަލާއެކު، ދިވެހިން ބޭނުންވާ އުމްރާނީ ތަރައްގީގެ ސިޔާސަތުތައް ތަންފީޒުކުރުމަށް ސަރުކާރުތަކުން ކުރަން ފެށި މަސައްކަތުން ދިވެހިރާއްޖޭގެ ނާޒުކު ތިމާވެއްޓަށް މިވަނީ ބަދަލު އައިސްފައެވެ. ގައުމު ދެމި އޮންނާނެ ކަމުގެ ބިރު މިވަނީ ހީވެފައެވެ.

ރާއްޖެއަކީ ސިނާއީ ބޮޑެތި މަޝްރޫއުތައް ހިންގައިގެން ޖައްވަށް ވިހަ ގޭސް ބޭރުކުރާ ގައުމަކަށް ނުވި ނަމަވެސް މިއަދު ރާއްޖެއަށް އޮތް ބިރުވެރިކަން ކުޑައެއް ނޫނެވެ. ދިވެހިންގެ އަމިއްލަ އަތުން ވެށި ހަލާކުކުރުމުގެ ނަތީޖާއަކީ، ރަށްތައް ނެތިދިއުމެވެ. ހޭޅިފަޅުގައި ހުރި ވަރުގަދަ ގަސްތައް ކަނޑައި ބިމާ ހަމަކޮށް ތަރައްގީ ގެނައުމަށް ކުރާ މަސައްކަތުން ރަށް ގިރުމާއި، ރަށްރަށުގެ މަލަމަތިން ފެންނަ ފެހިކަން ނެތިގެންދަނީއެވެ. ފަޅުތަކާއި، ފަރުތައް ހިއްކުމުގެ ނަތީޖާއަކަށް ވެގެންދަނީ ވަށައިގެންވާ ބައޯ ޑައިވަރސިޓީއަށް ބަދަލު އައުމެވެ. ގުދުރަތީ ގޮތުން ކަންކަން ހިނގަމުން އަންނަ އުސޫލަށް ބަދަލު އައުމެވެ.

ފަތުރުވެރިކަން ފުޅާވެ ފަޅުރަށްތަކުގައި ރިސޯޓުތައް ތަރަގީކޮށް ރަށްތައް ހުސްވުމުން ފަޅުތައް ހިއްކައި އެތަންތަންވެސް ރިސޯޓުތަކުގެ ގޮތުގައި ތަރައްގީ ކުރުމަށް އަމާޒު ހިފާފައިވާއިރު، އިސާހިތަކު އެ ފަޅުތައްވެސް ހުސްވެގެން ހިނގައިދާނެއެވެ.

ކަންކަން މިހެން ތަރުތީބު ވަމުން އަންނައިރު، މިކަމުގެ ގެއްލުމާއި، ބިރުވެރިކަން މިހާރު އިންތިހާއަށް ބޮޑުވެފައިވާކަން ބައިނަލްއަގުއާމީ މަސްރަހުގައި ހިނގަމުން އަންނަ ބޮޑެތި ބަހުސްތަކުން އަންދާޒާ ކޮށްލެވެއެވެ. މި ބިރުވެރިކަމުގެ ވާހަކަ ގައުމުގެ އިސްވެރިން މިފަދަ ފޯރަމްތަކުގައި ދައްކަވާއިރު، ރާއްޖޭގެ ތަރައްގީގެ ޕްލޭންތައް އޮތީ ތިމާވެށި ހިމާޔަތް ކުރެވޭނެ ރޮނގަކުންތޯ ވިސްނާލަން ޖެހެއެވެ.

ގައުމީ ތަރައްގީގެ ޕްލޭން އެކުލަވާލައި، ރަށްރަށުގެ ވަށައިގެންވާ ފަޅުތައް ހިއްކާއިރު، އެކަމުން ނުކުންނާނެ ނަތީޖާއާމެދު ވިސްނާލެވުނުތޯއެވެ. ކޮންމެ މިފަދަ ޕްރޮޖެކްޓަކާއެކު، އެކަމުން ތިމާވެއްޓަށްކުރާ އަސަރު ދެނެގަތުމަށް ދިރާސާތަކެއް ކުރެވެއެވެ. އެހެންނަމަވެސް އެ ދިރާސާތަކަކީ، އެންމެ އެކަށީގެންވާ މުއްދަތެއްގައި އެކަށީގެންވާ ގޮތަކަށް ހެދޭ ދިރާސާއެއްކަމާމެދު ސުވާލު އުފެދެއެވެ. ރަށެއްގެ ބަނދަރުހަދާ ދިމާއެއްގެ ސަބަބުން ގުދުރަތީ ގޮތުން އެރަށުގެ ވަށައިގެން ހިނގަމުން އަންނަ ކަންކަމަށް ބަދަލު އައިސް ރަށުގެ ތިމާވެއްޓަށް ބޮޑެތި ގެއްލުން ވެއެވެ.

ތަރައްގީގެ ނަމުގައި ގުދުރަތީގޮތުން ހެދިފައި ހުރި ރަށްތަކުގެ އުފެދުމަށް ބޮޑެތި ބަދަލުތައް ގެންނަމުންދާއިރު، ރަށްތައް ފެހިކޮށް ބޭއްވުމުގެ ޕްލޭނެއް ނެތެވެ. ކޮންނަ ބޯޓުތައް ބޭނުންކޮށްގެން ހާހަލާއި ފަޅުތައް ހިއްކަމުންދާއިރު، މި ފަޅުތައް އެކީ ހުސްވެދިއުމުން ދެންވާނެ ގޮތަކާމެދު މިއަދު ވިސްނުމެއް ނެތޭ ދެންނެވިދާނެއެވެ. ފަޅުތަކާއި ކަނޑުތަކުގެ ދިރުމާއި، ރަށްތަކުގެ ހިމާޔަތާއި، ދިވެހިންގެ ކެއިންބުއިމާއި، މިހެންގޮސް ގުޅި ލާމެހިފައި އޮތް ޗޭނުގެ ބޮޅުތައް ނެއްޓި، އެކީ ޗޭނު ބުރިބުރި ވެގެން ދިއުމުން ދެން ވެގެންދާނެ ގޮތަކާމެދު މިއަދު ވިސްނާލުމެއް ނެތި ހުރިހާ ސަރުކާރަކުންވެސް ގެންނަމުން މިދަނީ މި ތަރައްގީއެވެ.

އަދި މިތަރައްގީ ގެނައުމަށްފަހު، ގައުމުގެ ވެރިން ގައުމުން ބޭރަށް ވަޑައިގެން، ބައިނަލްއަގުވާމީ ފޯރަމްތަކުގައި ރާއްޖެ ނެތި ދާނެ ކަމުގެ ބިރުވެރި މެސެޖް ދެއްވުމުން ހަގީގަތުގައިވެސް ހިތަށް ބިރުވެރިކަން ވެރިވެއެވެ. ރަށްތައް ގިރަމުން އަންނަ ސްޕީޑަށް ބަލާއިރު، މިއީ ހަގީގަތެއްކަން އެނގެއެވެ. ރާއްޖޭގައި ރަށްގިރުމުގެ މައްސަލަ ދިމާނުވާ ހަމަ އެންމެ ރަށެއްވެސް ނެތޭ ބުނުން ދޮގަކަށް ނުވާނެއެވެ.

ތިމާވެށީގެ ބަހުސްތަކުގެ ކުރީ ސަފުގައި ރާއްޖެއިން ވަކާލާތު ކުރަމުންދާއިރު، ގުދުރަތީ ވަސީލަތްތައް ހިމާޔަތްކޮށް، ތިމާވެއްޓާއި ރައްޓެހި، އަދި ތިމާވެށި ހިމާޔަތް ކުރާ ސިޔާސަތުތައް އަމިއްލަ ގައުމުގައި ތަންފީޒު ވާން ޖެހެއެވެ. ޖައްވަށް ވިހަގޭސް ބޭރުކުރާ ކާރުޚާނާތައް ނެތެއް ކަމަކު، ތަރައްގީގެ ނަމުގައި ތިމާވެއްޓަށް ގެއްލުންދިނުން ކުޑަ ކުރަންޖެހެއެވެ.