ކޮޕް26 ސަމިޓްގައި ކުރިޔަށްދާ މިނިސްޓަރުންގެ ބައްދަލުވުންތައް ކުރިޔަށްގެންދިޔުމަށް ޝައުނާއާ ހަވާލުކޮށްފި

މިހާރު ސްކޮޓްލެންޑްގެ ގްލާސްގޯގައި ކުރިޔަށްދާ ކޮޕް26 ކޮންފަރެންސްގައި މިނިސްޓަރުންގެ މެދުގައި ކުރިޔަށްގެންދާ މަޝްވަރާ ބައްދަލުވުންތައް ކުރިޔަށްގެންދިޔުމަށް, ރާއްޖޭގެ އެންވަޔަރަންމަންޓް މިނިސްޓަރ އައިމިނަތު ޝައުނާއާ, ކޮޕް26 ކޮންފަރެންސްގެ ރައީސް އަލޯކު ޝަރުމާ ހަވާލުކުރައްވައިފިއެވެ.

އެކަމާގުޅިގެން ރައީސް އޮފީހުގެ ތަރުޖަމާނު މަބްރޫކް ޢަޒީޒު ކުރެއްވި ޓްވީޓެއްގައި ވިދާޅުވީ, ކޮޕް26 ކޮންފަރެންސްގައި ބައިވެރިވެވަޑައިގަންނަވާ ގައުމުތަކުގެ މިނިސްޓަރުންގެ މެދުގައި މޫސުމީ ބަދަލުތަކަށް އެޑެޕްޓުވުމާ ގުޅޭ ގޮތުން ހިންގާ މަޝްވަރާތައް ކުރިއަށް ގެންދިއުމުގެ މަސްއޫލިއްޔަތު ޝައުނާއާ ހަވާލުކުރައްވާފައިވާކަމަށެވެ.

ޝައުނާގެ މަސްއޫލިއްޔަތުގެ ތެރޭގައި, މިނިސްޓަރުންގެ މެދުގައި މަޝްވަރާކޮށްގެން ޕެރިސް އެގުރީމެންޓުގެ ދަށުން މުޅި ދުނިޔެ މޫސުމީ ބަދަލުތަކަށް އެޑަޕްޓްވުމަށް މަސައްކަތްކުރާނެ ގޮތާއި, އިޖުރާއާތުތަކާމެދު އެއްބަސްވުމަކަށް ވާސިލުވުން ހިމެނެއެވެ. މީގެއިތުރުން އެ ކަމަށް ފައިސާ ހޯދާނެ ގޮތަކާމެދު އެއްބަސްވުމަކަށް ވާސިލުވުމަކީވެސް މި މަސައްކަތުގެ ތެރޭގައި ހިިމެނޭ ކަމެއްކަމަށް މަބްރޫކް ވިދާޅުވިއެވެ.

ޝައުނާ މި މަސައްކަތްކުރައްވާނީ ސްޕެއިނުގެ އިކޮލޮޖިކަލް ޓްރާންސިޝަން މިނިސްޓަރު އަދި މި ސަމިޓުގެ ނައިބުރައީސް ޓެރެސާ ރިބެރާއާ އެކުގައި ކަމަށްވެސް މަބްރޫކު ވިދާޅުވިއެވެ.

ކޮޕް26 ކޮންފަރެންސްގައި ރާއްޖޭގެ ފަރާތުން ބައިވެރިވި ވަފުދުގެ އެންމެ އިސްކޮށް ހުންނެވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހެވެ. ކޮންފަރެންސްގެ ފުރަތަމަ ހަފްތާގައި އޮތީ ގައުމުތަކުގެ ލީޑަރުންގެ ވާހަކަފުޅު ދެއްކެވުމާއި ލީޑަރުންގެ މަޝްވަރާތަކެވެ. ނޮވެމްބަރ މަހުގެ 12 ވަނަ ދުވަހާ ހަމައަށް ކުރިޔަށްދާ މިކޮންފަރެންސްގައި މިހަފުތާގައި ކުރިޔަށްދަނީ, ޕެރިސް އެގްރީމެންޓަށް ވާސިލުވެވޭނެ ގޮތްތައް ކަނޑައެޅުމާއި މޫސުމީ ބަދަލުތަކުގެ އަސަރު އެންމެ ބޮޑަށް ކުރާ ގައުމުތަކަށް ފައިސާ ހަމަޖެއްސުމާއި ގުޅޭގޮތުން ކުރިޔަށްދާ މަޝްވަރާތަކެވެ.