ރާއްޖޭގެ އެންމެ އުތުރުގައި ފުލުހުންގެ ޚިދުމަތް ގާއިމުކުރުމަކީ ލިބުނު ކުރިއެރުމެއް ކަމަށް ހޯމް މިނިސްޓަރ ޢިމްރާން އަބްދުالله ވިދާޅުވެއްޖެއެވެ.

އުތުރުގެ ބައެއް ރަށްރަށުގައި ފުލުހުންގެ ޚިދުމަތް އިފްތިތާހު ކޮށްދެއްވުމަށް ކުރެއްވި ދަތުރުފުޅުތައް ނިންމަވާލެއްވުމަށްފަހު މީޑިޔާއާ ވާހަކަދައްކަމަވުން މިނިސްޓަރ ވިދާޅުވީ, ރާއްޖޭގެ އެންމެ އުތުރުގައި ފުލުހުންގެ ޚިދުމަތް ގާއިމުކުރުމަކީ ލިބުނު ކުރިއެރުމެއް ކަމަށާއި, ފުލުހުންގެ އައު ގާނޫނުގެ ދަށުން, ކުރިއަށް އޮތް ދެ އަހަރުގެ ތެރޭގައި ހުރިހާ ރަށެއްގައި ފުލުހުންގެ ޚިދުމަތް ގާއިމުވެގެންދާނެ ކަމަށެވެ. އުންމީދަކީ ރާއްޖޭގެ ހުރިހާ ރަށަކީވެސް ރައްޔިތުންނަށް އަމާން ރައްކާތެރި ރަށްތަކަކަށް ވެގެން ދިޔުން ކަމުގައެވެ.

ޕޮލިސް ކޮމިޝަނަރ މުހައްމަދު ހަމީދު ވިދާޅުވީ, ގާނޫނުގެ ދަށުން ލޯކަލް ޕޮލިސިންގެ ޚިދުމަތް އަންނަނީ ފުޅާވަމުން ކަމަށެވެ. ފުލުހުން ކުރަމުން އަންނަ މަސައްކަތް ތަރުތީބު ކުރުމަށް ކުރާ މަސައްކަތުގެ ދަށުން ހުރިހާ ސިޓީއެއްގައި ފުލުހުންގެ ޚިދުމަތް ގާއިމު ކުރެވިފައިވާކަން ފާހަގަކުރައްވައި ސީޕީ ވިދާޅުވީ, ރައްޔިތުންނާ ގާތުން މަސައްކަތްކޮށް, ކުށާއި, ކުށުގެ ސަބަބުން އުފެދޭ މައްސަލަތައް ހައްލު ކުރެވިގެންދާނެ ކަމަށެވެ.

މި މަހުގެ ތެރޭގައި އެލްޖީއޭއާއި ކައުންސިލްތަކާ މަޝްވަރާ ކުރުމަށްފަހު ލޯކަލް ޕޮލިސިންގެ ފްރޭމް ވޯރކެއް އެކުލަވާލެވޭނެ ކަމަށާއި, ލޯކަލް ލެވެލްގައި ފުލުހުންގެ މަސައްކަތްތަކަށް ފަސޭހަވެ ރަނގަޅު ނަތީޖާއެއް ނެރެވޭނެ ކަމުގެ ޔަގީންކަން އެބައޮތް ކަަމަށް އޭނާ ވިދާޅުވިއެެވެ. ސީޕީ ވިދާޅުވީ, އަވަށްޓެރި ފުލުހުންގެ މޮޑެލްގެ ނަތީޖާ ވަރަށް އަވަހަށް ފެނިގެންދާނެ ކަމަށެވެ.

ރާއްޖޭގެ ހުރިހާ ރަށެއްގައި ފުލުހުންގެ ޚިދުމަތް ގާއިމްކުރުމަށް ކުރާ މަސައްކަތުގެ ތެރެއިން, މިހާރު އަލަށް އުތުރުގެ 3 ރަށެއްގައި ޕޯސްޓް ލެވެލްގައި ފުލުހުންގެ ޚިދުމަތް ގާއިމްކުރެވި, 1 ރަށުގައި ފުލުހުންގެ ޑެސްކެއް ގާއިމުކުރެވިފައިވެއެވެ. ޖުމްލަ 106 ރަށެއްގައި ފުލުހުންގެ ޚިދުމަތް ގާއިމު ކުރެވިއްޖެކަން ސީޕީ ފާހަގަކުރެއްވިއެވެ. އަލަށް ފުލުހުންގެ ޚިދުމަތް ގާއިމުކުރާ ރަށްތައް ތަރުތީބު ކުރެވިފައިވަނީ ކުށުގެ ރިކޯޑަށް ބެލުމަށްފަހު ކަމަށް ސީޕީ ވިދާޅުވިއެވެ.

ފުލުހުންގެ މުއައްސަސާއަށް އޮތް އެންމެ ބޮޑު ގޮންޖެހުމަކީ ވަސީލަތްތައް ނެތުންކަން ފާހަގަކުރައްވަމުން ސީޕީ ވިދާޅުވީ, މި އަންނަ އަހަރު 60 އިމާރާތް އެޅުމަށް ނިންމާފައިވާ ކަމަށެވެ. އަދި ކަނޑު އުޅަނދުފަހަރު އިތުރުކުރުމަށް މަސައްކަތް ކުރަމުން އަންނަ ކަމަށާއި, 2022ވަނަ އަހަރުގެ 2ވަނަ ކުއާޓަރގައި އިތުރު ވަސީލަތްތައް ލިބިގެންދާނެ ކަމަށެވެ.