މެންބަރު އާދަމް ޝަރީފަށް މިނިސްޓަރ މައުސޫމުގެ ހޫނު ރައްދެއް
މިނިސްޓަރގެ އަމާޒަކީ 2022 ވަނަ އަހަރު ރާއްޖެއަށް ހޯމްސްޓޭ ފަތުރުވެރިކަން ތައާރަފުކުރުން
ޓުއަރިޒަމް މިނިސްޓަރ ޑރ. އަބްދުﷲ މައުސޫމް
ޕީއެންސީގެ ނާއިބްރައީސް އާދަމް ޝަރީފް އުމަރު ހޯމްސްޓޭ ފަތުރުވެރިކަމަށް ފާޑުވިދާޅުވުމާއި ގުޅިގެން، ޓޫރިޒަމް މިނިސްޓަރ ޑރ. އަބްދުﷲ މައުސޫމް ހޫނު ރައްދެއް ދެއްވައިފިއެވެ.
ޝަރީފަށް ރައްދުދެއްވައި މިނިސްޓަރ ވިދާޅުވީ ކުދިކުދި ހޮޓެލް ހިންގުމާއިހޯމް ސްޓޭފަތުރުވެރިކަމަކީ ދާދި އެއްވައްތަރު ދެކަންތައް ކަމަށެވެ. އަދި ޒިންމާދާރުކަމާއެކީ ރަށްރަށުގައި އެކަންކުރާތާ 10 އަހަރުވެއްޖެ ކަމަށާއި، ނަތީޖާ ރަނގަޅު ކަމަށްވެސް މިނިސްޓަރ ވިދާޅުވިއެވެ. މިނިސްޓަރ އިތުރަށް ވިދާޅުވީ ރައްޔިތުން ފޯރުންތެރިވެ ވޯޓަށް ނުފޫޒު ފޯރުވަންދަތިވާނެތީ ސިޔާސީ މަވެތިން ބޯދާވިސްނުން ގެންގުޅުމަކީ ވެދާނެ ކަމެއް ކަމަށެވެ.
ހޯމް ސްޓޭ ފަތުރުވެރިކަމާއި ގުޅިގެން މަޑުއްވަރީ ދާއިރާގެ މެމްބަރު އާދަމް ޝަރީފް ވިދާޅުވީ ހަރުދަނާ ފިޔަވަޅުތައް ދުރާލާ ނާޅައިފިނަމަ، ހޯމް ސްޓޭއިން ރާއްޖޭގެ އިޖްތިމާއީ ފޭރާން އިތުރަށް ހަލާކުވުމުގެ ފުރުސަތު ބޮޑު ކަމަށެވެ. އަދި ގެއަށް އަންނަ ފަތުރުވެރިންގެ ވަނަވަރު ބެލުމަކީ ކުރެވޭނެ ކަމެއް ނޫން ކަމަށާއި، ބޭރު މީހުން ރާއްޖޭގައި ހިންގާ ޖަރީމާތައް މިހާރުވެސް އިތުރުވެފައިވާކަަން އާދަމް ޝަރީފް ވަނީ ފާހަގަކުރައްވާފައެވެ.
ޝަރީފް މިގޮތަށް ވާހަކަފުޅު ދެއްކެވީ މާލެ އަތޮޅު މާފުށީގައި އިސްލާމީ މުޖުތަމައެއްގައި ކުރުމަށް ބަލައި ނުގަނެވޭނެފަދަ އަމަލުތައް ހިންގަމުން ގެންދާކަމަށް ބުނެ އެރަށު ކައުންސިލުން ކަންބޮޑުވުން ފާޅުކުރުމާއި ގުޅިގެންނެވެ. މާފުށީ ކައުންސިލުން ނެރުނު ބަޔާނެއްގައި ބުނެފައިވަނީ އެ ކައުންސިލުން ކުއްޔަށް ދޫކޮށްފައިވާ ބިންތަކުގައި އެއްބަސްވުމާއި ޚިލާފު އަމަލުތައް ހިންގަމުން ގެންދާ ކަމަށެވެ.
ރާއްޖެއަށް ހޯމް ސްޓޭ ފަތުރުވެރިކަން 2023 ވަނަ އަހަރު ތައާރަފް ކުރުމަކީ ރައީސް އިބްރާހިމް މުޙައްމަދު ސާލިހުގެ ވަރަށް ބޮޑު އަމާޒެކެވެ. މީގެ ސަބަބުން ފަތުރުވެރިކަމުގެ ސީދާ ފައިދާ ރައްޔިތުންނަށް ލިބިގެންދާނެއެވެ. މިއާއެކު ފޯރުންތެރި ބަޔަކަށްވެ އަމިއްލަ، ފައިމަޗަށް ތެދުވެ ތިބޭ ބަޔަކަށް ރައްޔިތުން ވެގެންދާނެއެވެ.
އެހެންކަމުން މިނިސްޓަރ ޑރ މައުސޫމް ގެންދަވަނީ ހޯމް ސްޓޭއަށް އާންމުން ހޭލުންތެރި ކުރުވަން ގިނަ މަސައްކަތްތަކެއް ކުރައްވަމުންނެވެ. އެގޮތުން މިކަމާއި ގުޅެ މައުލޫމާތު ރައްޔިތުންނާއި ހިއްސާކުރުމަށް މިނިސްޓަރ ގެންދަވަނީ ރަށްތަކަށް ދަތުރުވެސް ކުރައްވަމުންނެެވެ.
މިނިސްޓަރގެ އަމާޒަކީ 2022 ވަނަ އަހަރުގެ ޖެނުއަރީ މަހުގެ ތެރޭގައި ރާއްޖެއަށް ހޯމްސްޓޭ ފަތުރުވެރިކަން ތައާރަފްކުރުމެވެ. އެގޮތުން މިއަހަރުގެ ފަތުރުވެރިކަމުގެ ދުވަހުގެ ޚިތާބުގައި މިނިސްޓަރ މައުސޫމް ވިދާޅުވީ 2022 ވަނަ އަހަރުގެ ޖެނުއަރީ ގައި ފަތުރުވެރިކަމުގެ މަންފާ ސީދާ ރައްޔިތުންނަށް ލިބޭ ގޮތް ހަދައިދެއްވާނެ ކަމަށެވެ. އަދި އުއްމީދަކީ 2022 ވަނަ އަހަރުގެ ޖެނުއަރީ މަހުގެ ހޯމް ސްޓޭ ތައާރަފު ކުރެވިގެން ދިޔުން ކަމަށެވެ.
