ތިމާވެށި ހިމާޔަތްކުރުމަށް ގޮވާލައި އެތައް ހާސް ޒުވާން އެކްޓިވިސްޓުންތަކެއް ކޮޕް26 ކޮންފަރެންސް ކުރިޔަށްދާ ސްކޮޓްލެންޑްގެ ގްލާސްގޯގެ މަގުތަކަށް ނުކުމެއްޖެއެވެ. ދުނިޔެ ސަ.ލާމަތްކުރުމަށް ލީޑަރުންވީ ވައުދުތަކަށް އަމަލީ ސިފަ ގެނައުމަށް އެ ޒުވާނުން ވަނީ ގޮވާލައިފައެވެ.
ދުނިޔެ މޫސުމީ ބޮޑު މުސީބާތަކަށް ދިޔުމުގެ ކުރިން ލީޑަރުން ދުނިޔެ ސަލާމަތްކުރުމަށް މިއެކްޓިވިސްޓުން ވަނީ ގޮވާލާފައެވެ. ދުނިޔޭގެ ގައުމުތަކުގެ ލީޑަރުން ވަނީ ކޮޕް26 ކޮންފަރެންސްގައި ވާހަކަދައްކަވާ އެތައް ވައުދުތަކެއް ވެވަޑައިގަންނަވާފައެވެ. ދެ ހަފުތާގެ މުއްދަތަށް ކުރިޔަށްދާ މި ކޮންފަރެންސްގައި ބޯޓުދެލި ބޭނުންކުރުން ހުއްޓާލުމަށާއި މީތޭން ބޭރުކުރުން ހުއްޓާލުމުގެ އިތުރުން ބޮޑެތި ޖަންގަލިތަކުން ގަސް ކެނޑުން މަދުކުރުމަށް ވަނީ ވައުދުވެފައެވެ.
ނަމަވެސް އެކްޓިވިސްޓުންނާއި ޕްރެޝަރ ގްރޫޕްތަކުން އަދި މިހާތަނަށް ކޮޕް26 ގައި ގައުމުތަކުން ވެފައިވާ ވައުދުތަކާމެދު ހިތްހަމައެއް ނުޖެހެއެވެ. އެއީ މިކަންކަމުގައި ދުނިޔެއަށް އެންމެ ބޮޑަށް ނުރައްކާތެރި ގޭސް ދޫކުރާ ބޮޑެތި ގައުމުތަކުގެ މާބޮޑު ޝާމިލުވުމެއްނެތީމައެވެ. އަދި ލަނޑުދަނޑިތައް ހާސިލުކުރުމަށް ކަނޑައަޅާފައިވާ ތާރީޚުތަކަކީ މާދުރު ތާރީޚުތަކަކަށް ވުމުން އެކަމުގެ ހިތްހަމަނުޖެހުން ތިމާވެށީގެ އެކްޓިވިސްޓުންނާއި ޕްރެޝަރ ގްރޫޕްތަކުން އަންނަނީ ފާޅުކުރަމުންނެވެ.
ތިމާވެއްޓާ ބެހޭ ގޮތުން ވަކާލާތުކުރާ ސްވިޑިޝްގެ އެކްޓިވިސްޓް ގްރެޓާ ތުންބާގު ބުނީ ލީޑަރުން އެއްވެ މަސައްކަތް ކުރަނީ މޫސުމީ ބަދަލުތައް ހުއްޓުވުމަށް އަޅާފިޔަވަޅުތައް ނޭޅޭނެ ގޮތްގޮތަށް ކަމަށެވެ. ސިސްޓަމްގެ ތެރެއިން އަމިއްލައަށް ލޫޕްހޯލްސްތައް ހަދައިގެން އެމީހުން ބޭނުންވާ ފައިދާތައް ތިމާވެއްޓަށް ގެއްލުންދީގެން ހާސިލުކުރުމަށް މަސައްކަތް ކުރާކަމަށް ތުންބާގު ބުންޏެވެ. ވީއެންމެ އަވަހަކަށް ޖައްވަށް ދޫކުރާ ގޭސް އަހަރުން އަހަރަށް މަދުކުރަންޖެހޭކަމަށް ވެސް ބުންޏެވެ.
އެމެރިކާގެ ކުރީގެ ވައިސް ޕްރެޒިޑެންޓް އަލްގޯރ ވިދާޅުވީ އަދި މިކަމުގައި ކާމިޔާބު ހާސިލުވީކަމަށް އިއުލާންކޮށްގެންނުވާނެ ކަމަށެވެ. ކޮންމެސް ވަރެއްގެ ކުރިއެރުންތަކެއް ހޯދިއްޖެކަމަށާއި ނަމަވެސް އަދިވެސް ހާސިލުކުރަންޖެހޭ ލަނޑުދަނޑިތަކާ ހިސާބަށް ދިޔުމަށް ދިގު މުއްދަތެއް ނަގާނެކަމަށް އަލްގޯރ ވިދާޅުވިއެވެ.
ކޮޕް26 ކޮންފަރެންސްގެ ތެރެއިން މަސައްކަތް ކުރަމުންދަނީ ވީއެންމެ ގިނަ ގައުމަކުން ޖައްވަށްދޫކުރާ ގޭހުގެ މިންވަރު މަދުކުރުމަށް ވައުދުވުމަށެވެ. ވަކިން ޚާއްސަކޮށް ބޯޓުދެލި އަންދައިގެން ހަކަތަ އުފެއްދުން ހުއްޓުމަކަށް ގެނައުމަށް އަންނަނީ މަސައްކަތްތަކެއް ކުރަމުންނެވެ. އެއީ ދުނިޔޭގެ ހޫނުމިން 1.5 ޑިގްރީގައި ހިފެހެއްޓުމަށް އެންމެ މުހިންމު ކަންތަކެވެ.
ސައިންސްވެރިން ބުނާގޮތުގައި މިހާރުވެސް ދުނިޔެއަށް އަންނަނީ މޫސުމީ ބަދަލުތަކުގެ ސަބަބުން ބޮޑެތި ތޫފާންތަކާއި ހޫނުވުމާއި ހަނަފަސްކަމާއި ފެންބޮޑުވުމުގެ ހާދިސާތައް އިންތިހާއަށް ކުރިމަތިވަމުންކަމަށެވެ. އަދި މިކަންކަން ދެން އަނބުރާ ކުރިން އޮތްގޮތަށް ރުޖޫއަނުވެވޭ ހިސާބުގައި މިހާރު ހުރިކަމަށް ސައިންސްވެރިން އަންނަނީ ބުނަމުންނެވެ.
