އިންތިޚާބުގެ ނަތީޖާއާމެދު ހިތްހަމަނުޖެހިގެން އިރާގުގައި ކުރިޔަށްގެންދާ ހަމަނުޖެހުންތަކުގައި 30 މީހުންނަށް އަނިޔާވެއްޖެ

އިރާގުގައި އޮކްޓޯބަރ މަހު ކުރިޔަށްގެންދިޔަ އާންމު އިންތިޚާބުގެ ނަތީޖާއާ މެދު ހިތްހަމަނުޖެހިގެން ހިނގަމުންދާ ހަމަނުޖެހުންތަކުގައި 30 މީހުންނަށް އެކިވަރުގެ އަނިޔާ ލިބިފައިވާކަމަށް އިރާގުގެ ފުލުހުންނާއި ސިއްހީ މަސައްކަތްތެރިން ބުނެފިއެވެ.

ހަމަނުޖެހުންތައް ހިނގަމުންދަނީ ބަޣްދާދުގެ ސަލާމަތީ ބާރުތަކާއި އިރާނުން ތާއީދުކުރާ އިރާގުގެ ސިޔާސީ ޕާޓީތަކުގެ ސަޕޯޓަރުންގެ މެދުގައެވެ. އިރާނުން ވާގިވެރިވާ ސިޔާސީ ޕާޓީތަކަށް އާންމު އިންތިޚާބުގައި ވަނީ ގާނޫނު ހަދާ މަޖިލީހުގެ އެތައް ގޮނޑިއެއް ގެއްލިފައެވެ. އެހެންކަމުން އެމީހުން ވަނީ ނުރުހުންފާޅުކުރުމުގެ ގޮތުން މަގުތަކަށް ނިކުމެފައެވެ.

އިރާގު ސަރުކާރު އޮފީސްތަކާއި އެމްބަސީތައް ހުންނަ ގްރީން ޒޯންގައި މުޒާހަރާކުރަން މަސައްކަތްކުރަމުންދިޔަ މީހުންގެ ގަޔަށް އިރާގު ފުލުހުން ވަނީ ކަރުނަ ގޭސް ޖަހާފައެވެ. މިއާއެކު މުޒާހަރާގެ ބައިވެރިން ވަނީ ފުލުހުންނާ ދިމާލަށް ގައު އުކާ ގްރީން ޒޯނަށް ވަނުމަށް މަސައްކަތްކޮށްފައެވެ.

މިހަމަނުޖެހުންތަކުގައި މުޒާހަރާ ކުރި މީހުންނަށް ވަނީ ދުމުގެ އަސަރުކޮށްގެން އެކިވަރުގެ އަނިޔާ ލިބިފައެވެ. އަދި މުޒާހަރާގެ ބައިވެރިން އުކި ގަލުން ޖެހި ފުލުހުންގެ ނުވަ މީހަކަށްވެސް ވަނީ އެކި ވަރުގެ އަނިޔާލިބިފައިކަމަށް ހޮސްޕިޓަލުން ބުނެއެވެ.

އޮކްޓޯބަރ މަހުގެ 10 ވަނަ ދުވަހު ކުރިޔަށްދިޔަ އިރާގުގެ އާންމު އިންތިޚާބުގައި އެންމެ ގިނަ ގޮނޑި ކާމިޔާބުކޮށްފައިވަނީ ޝީޢީންގެ މެދުގައި މަގުބޫލު މުގްތަދާ އަލް ސަދުރުގެ ޕާޓީއެވެ. މިޕާޓީއަކީ އިރާގުގެ ކަންކަމަށް އިރާނުން ވަނުމަށް ދެކޮޅު ހަދާ ބައެކެވެ. އަދި އިރާގުގައި މިހާރު ތިބި ހުޅަނގުގެ ގައުމުތަކުގެ އަސްކަރީ ފައުޖުތައް އެގައުމުން ފޭބުމަށްވެސް އެޕާޓީން ވަނީ ގޮވާލާފައެވެ.

ނަތީޖާއާ މެދު ހިތްހަމަނުޖެހިގެން ޝުއޫރު ފާޅުކުރަމުން ދަނީވެސް ޝީޢީ ގްރޫޕްތަކުންނެވެ. ނަމަވެސް އެމީހުންނަކީ އިރާނުން ވާގިދޭ ޖަމާއަތްތަކެވެ. އަދި ސަރުކާރު ހިންގުމުގައި އިރާނުން ސަރުކާރު ހިންގަމުންދާ ގޮތަށް ސިޔާސަތުތައް ބައްޓަންކުރާ ޕާޓީތަކެވެ.

2003 ވަނަ އަހަރު އޭރު އިރާގުގައި އޮތް ސައްދާމް ހުސައިންގެ ވެރިކަން ނިމުމަކަށް ގެނައުމަށްފަހު ފާއިތުވި ދުވަސްތަކުގައި އިރާގުގައި ވެރިކަން ކުރަމުން އަންނަނީ ޝީޢީ ޖަމާއަތްތަކުންނެވެ.

އިރާގުގައި އެންމެ ފަހުން ކުރިޔަށް ގެންދިޔަ އިންތިޚާބުގެ ނަތީޖާއިން ހާމަވެގެންދިޔައީ އިރާގުގެ ކަންކަމަށް ބޭރުގެ ނުފޫޒު ވަކިން ޚާއްސަކޮށް އިރާނުގެ ނުފޫޒު އޮންނަން ރައްޔިތުން ބޭނުންނުވާކަމެވެ.

އިންތިޚާބުގެ ނަތީޖާއާ މެދު ސުވާލު އުފައްދާ ޕާޓީތަކުން ބުނަމުން އަންނަނީ ވޯޓުލުމުގެ ކަންކަމާއި ވޯޓު ގުނުމުގެ ކަންކަން ކުރިޔަށްދިޔައީ އެކަންކަން ކުރިޔަށްދާންވީ ގޮތަށް ނޫންކަމަށެވެ. ނަމަވެސް އެޕާޓީތަކުގެ މިތުހުމަތުތަކަށް ބާރުދޭ ހެއްކެއް ދެއްކިފައިނުވެއެވެ.