ރައީސްގެ އަނބިކަނބަލުން، "އޯނިންގ މައި ތޯޓްސް: އަ ތެރަޕިއުޓިކް ޖަރނަލް" އިފްތިތާހުކޮށްދެއްވައިފި
4 ނޮވެމްބަރު 2021 | ބުރާސްފަތި 17:09ތެރަޕިއުޓިކް ބޭނުމަށް، ލިޔުމުގެ މުހިންމުކަމުގެ މައްޗަށް އަލިއަޅުއްވާލެއްވި
ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދު ފޮތް އިފްތިތާހުކޮށްދެއްވަނީ
ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދު، "އޯނިންގ މައި ތޯޓްސް: އަ ތެރަޕިއުޓިކް ޖަރނަލް" ފޮތް އިފްތިތާހުކޮށްދެއްވައިފިއެވެ.
ބުރާސްފަތި ދުވަހުގެ ހަވީރު ޝައިން ޓްރީ ބިލްޑިންގުގައި ބޭއްވި ރަސްމިއްޔާތުގައި ވާހަކަފުޅުދައްކަވަމުން ފަޒްނާ ވަނީ، ތެރަޕިއުޓިކް ބޭނުމަށް ލިޔުމުގެ މުހިންމުކަމުގެ މައްޗަށް އަލިއަޅުއްވާލައްވައި، އިފްތިތާހުކުރެވުނު ފޮތުގެ ސަބަބުން, އަލަށް ޖަރނަލް ލިޔާ މީހުންނަށްވެސް އިތުރު ބާރަކަށް ވާނެކަމަށް ވިދާޅުވެފައެވެ. މީގެ އިތުރުން އެކަމަނާ ވަނީ ތެރަޕިއުޓިކް ބޭނުމަށް ޖަރނަލް ލިޔުމަކީ އޭގެ އެތަކެއް ފައިދާތަކެއް އޮތްކަމެއްކަން ފާހަގަކުރައްވާފައެވެ. އަދި ނަފްސާނީ ދުޅަހެޔޮކަން ކުރިއެރުވުމަށް މަސައްކަތްކުރައްވާ ބޭފުޅުންނަށް އެނގޭ މައުލޫމާތާއި ވަސީލަތްތައް, އެހެން ފަރާތްތަކާވެސް ހިއްސާކުރެއްވުމަކީ ބޭނުންތެރިކަމެއް ކަމަށް ވިދާޅުވިއެވެ.
މޯލްޑިވްސް އޮސްޓްރޭލިއާ އެލަމްނައިގެ ޗެއަރޕަރސަން، ޙައްވާ ލީޝާ ލިޔުއްވި މިފޮތަކީ 12 އަހަރުން މަތީގެ ކުދިންނާއި މީހުންނަށް އަމާޒުކުރައްވައި, ޕޮޒިޓިވް މެސެޖުތަކާއި ފައްސި ވިސްނުން ކުރިއަރުވާ ފަދަ މެސެޖުތައް ހިމަނުއްވައިފައިވާ, އަދި އެމީހެއްގެ އަމިއްލަ ތަޖުރިބާތައްވެސް އޭގައި ލިޔެވޭނެގޮތަށް އޮތް ފޮތެކެވެ.
މިފޮތަކީ އޮސްޓްރޭލިއާ އެވޯޑްސްގެ ގްރާންޓްގެ އެހީގައި ޗާޕްކޮށްފައިވާ ފޮތެކެވެ. މި ފޮތުގެ 500 ކޮޕީ ހަދިޔާކުރުމަށް ހަމަޖެހިފައިވަނީ ސްކޫލްތަކަށާއި އާންމުންނަށް ފޯރުކޮށްދެވޭނެފަދަ ތަންތަނަށެވެ. އަދި މިފޮތުގެ 500 ކޮޕީ ވަނީ ވިޔަފާރި އުސޫލުން ވިއްކުމަށް ހަމަޖެހިފައެވެ. މި ފޮތްތައް ވިއްކައިގެން ލިބޭ ފައިސާ ޚާއްސައެހީއަށް ބޭނުންވާ ކުދިން ގެންގުޅޭ 10 ބެލެނިވެރިންނަށް ހަދިޔާކުރުމަށް ވަނީ ހަމަޖެހިފައެވެ.
