ޖަންގަލިތަކުން ގަސްކެނޑުމާއި ނުރަނގަޅުގޮތުގައި ބިން ބޭނުން ކުރުން ހުއްޓާލުމަށް ދުނިޔޭގެ ގައުމުތަކުން އެއްބަސްވެއްޖެއެވެ. ސްކޮޓްލެންޑްގެ ގްލާސްގޯގައި މިހާރު ކުރިއަށްދާ ކޮޕް26 ސަމިޓުގައި ގައުމުތަކުން އެއްބަސްވެފައިވަނީ 2030 އަންނަންވާއިރަށް ޖަންގަލިތައް ހިމާޔަތްކޮށް މިހާރުގެ ނުރަނގަޅު އާދަތަކަށް ނިމުން ގެނައުމަށެވެ.
މިކަމަށް އެއްބަސްވެ އިގުރާރުވި ގައުމުތަކުގެ ތެރޭގައި ބްރެޒިލް އާއި ރަޝިޔާއާއި އިންޑޮނީޝިޔާ އަދި ޑިމޮކްރަޓިކް ރިޕަބްލިކް އޮފް ކޮންގޯ ހިމެނެއެވެ. މިއީ ދުނިޔޭގެ ބޮޑެތި ޖަންގަލިތަކުގެ 85 އިންސައްތަ ހިއްސާ ކުރާ ގައުމުތަކެވެ. ގްލާސްގޯ ލީޑަރުންގެ މި ގަރާރުގައިވާ ގޮތުން ދުނިޔޭގެ ޖަންގަލިތަކުގެ 33 މިލިޔަން އަކަ ކިލޯމިޓަރު ހިމާޔަތްކޮށް ރައްކާތެރި ކުރެވޭނެއެވެ.
ދުނިޔެ ހޫނުވުން ކޮންޓްރޯލް ކުރުމަށްޓަކައި ޖަންގަލިތަކުގެ ދައުރު ވަރަށް ބޮޑެވެ. ޖަންގަލިތައް ތުނިވެ ނެތެމުންދާ ވަރަކަށް ދުނިޔެ ހޫނުވުމަށް މަގުފަހިވެގެންދެއެވެ. ދުނިޔޭގައި މިހާރު އޮތް އެންމެ ބޮޑު ޖަންގަލި ކަމަށްވާ ބްރެޒިލްގެ އެމޭޒަން ޖަންގަލިވެސް ދާދި އަވަހަށް ނެތިގެން ދިޔުމުގެ ބިރު ތަޖުރިބާކާރުން އަންނަނީ ފާޅުކުރަމުންނެވެ. އެހެންކަމުން ޖަންގަލިތަކުގެ ހިމާޔަތަށްޓަކައި މިވެވުނު އިގުރާރަށް ތަޖުރިބާކާރުން ވަނީ މަރުހަބާ ކިޔައިފައެވެ.
މޫސުމީ ބަދަލުތަކާއެކު ދުނިޔެ ހޫނުވުމުގެ މައްސަލަ ހައްލު ކުރުމާއި ގުޅޭ ގޮތުން މަޝްވަރާކުރުމަށް ސްކޮޓްލެންޑްގެ ގްލާސްގޯގައި ކުރިއަށްދާ ކޮޕް-26ގައި ދުނިޔޭގެ ގިނަ ގައުމުތަކުން ބައިވެރިވެއެވެ. ދުނިޔޭގެ ބޮޑެތި ގައުމުތަކުގެ ބައިވެރިވުމާއެކު މިސަމިޓަށްފަހު ތިމާވެށީގެ ގިނަ މައްސަލަތައް ހައްލުކުރުމަށް އަމަލީގޮތުން ގިނަ މަސައްކަތްތަކެއް ފެށިގެންދާނެ ކަމަށް ވަނީ ބެލެވިފައެވެ.
ދުނިޔެ ހޫނުވުމުގެ މައްސަލަ ހައްލުކުރުމަށް ގިނަ މަސައްކަތްތަކެއް ކުރަންޖެހޭއިރު، މިކަމަށް ގިނަ އަދަދެއްގެ ފައިސާ ބޭނުންވާނެއެވެ. ކޮޕް-26ގައި ގައުމުތަކުގެ އިސްވެރިން އިއްޔެ ކުރެއްވި މަޝްވަރާތަކުގެ ތެރޭގައި، ދުނިޔޭގެ ބޮޑެތި އިގްތިސާދުތަކުން މިކަމަށް މާލީ އެހީތެރިކަން ފޯރުކޮށްދިނުމާމެދު ވަނީ ޚިޔާލު ބަދަލުކޮށްފައެވެ. އަދި ބްރެޒިލް އާއި އިންޑިއާ ފަދަ ގިނަ އަދަދެއްގެ ވިހަ ގޭސް ޖައްވުގެ ތެރެއަށް ދޫކުރަމުންދާ ގައުމުތަކުން މިކަން މަދުކުރުމާއި މެދު ވަނީ މަޝްވަރާ ކުރެވިފައެވެ.
މި މަޝްވަރާތަކަށް ފަހު ދުނިޔޭގެ އެންމެ މުއްސަނދި ގައުމުތައް ހިމެނޭ ގޮތުން 12 ގައުމަކުން ވަނީ ޖަންގަލިތައް ހިމާޔަތް ކުރުމަށްޓަކައި ތަރައްގީވަމުން އަންނަ ގައުމުތަކަށް ބޭނުންވާ އެހީތެރިކަން ފޯރުކޮށްދިނުމަށް 12 ބިލިޔަން ޑޮލަރު ދޭނޭ ކަމަށް ބުނެފައެވެ. މިއީ 2021 ވަނަ އަހަރުން 2025 ވަނަ އަހަރާ ހަމަޔަށް މކަމަށްޓަކައި ހޭދަކުރަން ނިންމާފައިވާ އަދަދެވެ.
